ཤྲི་ལང་ཀའི་སྲིད་འཛིན་སླར་ཡང་འོས་འདེམས་བྱུང་ཡོད་པ།

༄༅༎ཤྲི་ལང་ཀའི་ད་ཡོད་སྲིད་འཛིན་མ་ཧིན་རྡ་ར་ཇ་པཀ་སེ་སླར་ཡང་སྲིད་འཛིན་དུ་འོས་འདེམས་བྱུང་བར་བརྟེན་ལས་ཡུན་གཉིས་པའི་དམ་འབུལ་གནང་བ་དང་སྦྲགས་དཔལ་འབྱོར་འཕེལ་རྒྱས་ཤིན་ཏུ་མྱུར་པོ་གཏང་རྒྱུའི་ཁས་ལེན་གནང་འདུག

ངོས་ཀྱིས་སྲིད་འཛིན་ལས་གནས་ཀྱི་ལས་ཡུན་དང་པོའི་རིང་འཇིགས་སྐུལ་དྲག་སྤྱོད་པ་རྩ་མེད་བཏང་སྟེ་རང་ཡུལ་སིལ་བུར་མ་གྱར་བར་ཆིག་བསྒྲིལ་བསྲ་བརྟན་བཟོས་པའི་གྲུབ་འབྲས་ཐོན་ཡོད་ཅེས་དང་།   འབྱུང་འགྱུར་གྱི་ལས་ཡུན་གཉིས་པའི་རིང་དེ་སྔ་བྱུང་མྱོང་མེད་པའི་ཤིན་ཏུ་མྱུར་བའི་དཔལ་འབྱོར་འཕེལ་རྒྱས་གཏོང་འཆར་ཡོད་ཅེས་གསལ་བསྒྲགས་གནང་འདུག    ངས་ཤྲི་ལང་ཀའི་ཡུལ་གྱི་མང་འོངས་སོན་རྩ་གཞོན་ནུ་ཚོར་ཡིད་ཆེས་བློས་འགེལ་བྱེད་ཀྱི་ཡོད་ཅིང་། ང་ཚོའི་ཡུལ་དེ་ཨེ་ཤ་ཡའི་ནང་ངོ་མཚར་ཆེ་བའི་ཡུལ་ཞིག་ཏུ་འགྱུར་ཐུབ་ཅེས་སོགས་གཏམ་བཤད་གནང་འདུག

འོན་ཀྱང་སྲིད་འཛིན་དམ་འབུལ་གྱི་མཛད་སྒོར་ཕྱོགས་འགལ་ཚོགས་པའི་དབུ་ཁྲིད་རྣམས་ལྷན་བཞུགས་གནང་མེད་པ་མ་ཟད། དམག་སྤྱི་ཟུར་པ་དང་ཕྱོགས་འགལ་ཚོགས་པའི་སྲིད་འཛིན་འོས་མི་ཟུར་པ་སེ་རཐ་ཕོན་སེ་ཀ་ལ་དྲག་པོའི་སྒྲིག་འཛུགས་ཀྱི་ཁྲིམས་ཁང་ནས་ལྐོག་ཟ་བྱས་པའི་ཉེས་འཛུགས་འོག་ཟླ་གྲངས་སུམ་ཅུའི་རིང་བཙོན་འཇུག་བྱས་ཡོད་པ་རེད། ཡང་ད་ཡོད་སྲིད་འཛིན་མ་ཧིན་རྡ་ར་ཇ་པཀ་སེ་ཡིས་སྲིད་འཛིན་ལས་ཡུན་གཏུད་མར་སྐབས་གཉིས་ལྷག་བྱེད་མི་ཆོག་པའི་རྩ་ཁྲིམས་ལ་བསྐྱར་བཅོས་གཞུང་འབྲེལ་གྲོས་འཆར་བཏོན་ནས་གྲོས་ཆོད་འཇོག་ཐུབ་ཡོད་པ་ལྟར་སྲིད་འཛིན་འོས་མིར་སླར་ཡང་ཞུགས་ཆོག་གི་ཡོད་པ་རེད།   

འདས་པའི་ལོ་ཤས་རིང་ཡུལ་ནང་དམག་འཁྲུག་བྱུང་བའི་དབང་གིས་རྒྱལ་ཡོངས་ཕྱོགས་བསྡོམས་དཔལ་འབྱོར་འཕེལ་རྒྱས་བརྒྱ་ཆ་༣་དང་ཕྱེད་ཙམ་ལས་བྱུང་མེད་ཀྱང་འདི་ལོ་བརྒྱ་ཆ་༨་ཙམ་ཡོང་བའི་མངོན་དཔག་གནང་གི་ཡོད་པ་རེད༎