ཨ་རིའི་སྲིད་འཛིན་དང་༸གོང་ས་མཆོག་མཇལ་རྒྱུའི་གསལ་བཤད།

༄༅༎ཉེ་ལམ་ལྦ་ཤིང་ཀྲོན་ཉིན་རེའི་གསར་ཤོག་ཐོག་༸གོང་ས་༸སྐྱབས་མགོན་ཆེན་པོ་མཆོག་དང་ཨ་མི་རི་ཀའི་སྲིད་འཛིན་རྣམ་གཉིས་དབར་མཇལ་འཕྲད་གནང་རྒྱུ་ཕྱིར་འགྱངས་གནང་ཡོད་པ་རེད་ཅེས་བཀོད་པའི་གནས་ཚུལ་དེའི་ཐད་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་རིན་པོ་ཆེ་མཆོག་ནས་དེ་རིང་བཙན་བྱོལ་བོད་གཞུང་དྲ་གནས་ཐོག་གསལ་བཤད་གནང་ཡོད་པ་རེད།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་རིན་པོ་ཆེ་མཆོག་ནས་དེ་རིང་ལྦ་ཤིང་ཀྲོན་ཕོ་ཉ་ཞེས་པའི་ལྦ་ཤིང་ཀྲོན་ཉིན་རེའི་གསར་ཤོག་རྩོམ་བྲིས་པར་ཕྱག་བྲིས་ཤིག་ཕུལ་གནང་བའི་འགོ་བརྗོད་དུ་ཕྱི་ཟླ་བཅུ་པའི་ཚེས་ལྔའི་ཉིན་ལྦ་ཤིང་ཀྲོན་ཉིན་རེའི་གསར་ཤོག་ཐོག་ཨ་རིའི་སྲིད་འཛིན་ཨོ་སྦ་མ་དང་༸གོང་ས་ཏཱ་ལའི་བླ་མ་མཆོག་རྣམ་གཉིས་མཇལ་འཕྲད་ཕྱིར་འགྱངས་གནང་བ་ཞེས་བཀོད་ཡོད་པ་ལས་གནས་ཚུལ་དེའི་ནང་བདུན་ཕྲག་འདིའི་ནང་ཨ་མི་རི་ཀའི་སྲིད་འཛིན་མཆོག་དང་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་གནང་རྒྱུ་མིན་པ་ལས་སྲིད་འཛིན་ཨོ་སྦ་མ་མཆོག་རྒྱ་ནག་ཏུ་འཚམས་འདྲིའི་གཟིགས་སྐོར་གྲུབ་པའི་རྗེས་༸གོང་ས་མཆོག་དང་མཇལ་འཕྲད་གནང་རྒྱུ་ཡིན་པའི་གནས་ཚུལ་སོགས་ཁ་གསལ་གང་ཡང་བཀོད་གནང་མི་འདུག་ཅེས་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་རིན་པོ་ཆེ་མཆོག་གིས་གསུངས་འདུག དེ་བཞིན་ཡང་གོང་ཞུས་གསར་ཤོག་ནང་ཟླ་བ་སྔོན་མ་ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གི་སློབ་སྟོན་པ་བགྲེས་པ་ལྦེ་ལེ་རི་ཇེ་རེཏ་བཞུགས་སྒར་རྡ་རམ་ས་ལར་ཕེབས་ནས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་སྟེ་ཕན་ཚུན་དབར་བཀའ་མོལ་བྱུང་བའི་གནས་ཚུལ་དང་དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་ཨ་རིའི་སྲིད་འཛིན་ཨོ་སྦ་མ་མཆོག་གི་སྲིད་གཞུང་ནས་བོད་ཐོག་འཛིན་པའི་སྲིད་ཇུས་ཀྱི་ཐོག་གཟིགས་ཕྱོགས་སྐོར་དང་དེ་ག་ནང་བཞིན་ཨ་མི་རི་ཀ་དང་རྒྱ་ནག་གཉིས་དབར་གྱི་འབྲེལ་བའི་གནས་སྟངས་དེ་གལ་འགངས་ཆེན་པོ་ཞིག་ཡིན་པའི་སྐོར་བཀའ་གནང་བ་སོགས་ཀྱི་གནས་ཚུལ་གང་ཡང་བཀོད་མེད་པ་རེད་ཅེས་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས་བྲིས་གནང་བའི་ཕྱག་བྲིས་དེའི་ནང་གནས་ཚུལ་དེ་ལྟར་བཀོད་གནང་ཡོད་པ་རེད།