ལྷོ་ཀོརིཡ་ནང་གཏོར་རྒོལ་བྱས་མཁན་རྒྱ་མི་ཕྱིར་ལོག་བྱ་རྒྱུ་ཡིན་པ།

༄༅༎ཉེ་ཆར་ལྷོ་ཀོ་རིཡ་ཡི་རྒྱལ་ས་ སི་ཨོལ ་ནང་རྒྱ་ནག་ནང་ཚུཊ་རྒྱུའི་ཨོ་ལིམ་པིཀ་རྩེད་འགྲན་གྱི་དཔལ་འབར་འབྱོར་སྐབས་ངོ་རྒོལ་བྱས་མཁན་ཐོག་གཏོར་རྒོལ་བཏང་བའི་ལེ་ཁག་ཡོད་མཁན་རྒྱ་མི་རིགས་ཚོ་རང་ཡུལ་ལ་ཕྱིར་ལོག་གཏང་རྒྱུ་ཡིན་སྐོར་ལྷོ་ཀོ་རིཡ་ཡི་ཁྲིམས་དོན་ལྷན་ཁང་གིས་ད་རིང་གསུངས་འདུག

ལྷོ་ཀོ་རིཡ་ཡི་ཉན་རྟོག་པ་ཚོས་རེས་གཟའ་ཉི་མའི་རྩེད་འགྲེན་གྱི་དཔལ་འབར་སྐོར་བསྐྱོད་སྐབས་དྲག་ཟིང་བསླངས་བའི་བརྙན་པར་ལ་རྟོག་ཞིབ་གནང་བའི་ནང་ར་འཕྲོད་བྱུང་བའི་རྒྱ་མི་རིགས་བཞི་རྩད་གཅོད་གནང་བཞིན་ཡོད་འདུག ཡུལ་དེའི་ཁྲིམས་དོན་ལྷན་ཁང་གི་མགྲིན་ཚབ་པ་ ཀིམ་ཧེ་ཝུང་ ཡིས་འབྲེལ་ཡོད་འཛིན་སྐྱོང་དཔོན་རིགས་ཚོས་དྲག་ཟིང་གི་བྱ་སྤྱོད་སྤེལ་བའི་ནང་ལེ་ཁག་ཡོད་མཁན་ཚོ་རྩད་གཅོད་གནང་སྟེ། རྒྱལ་ཁབ་སུ་ཞིག་གི་མི་སེར་ཡིན་མིན་ལ་མ་ལྟོས་པར་ཁྲིམས་ཐོག་ནས་ཞིབ་དཔྱོད་ནན་པོ་གནང་རྒྱུ་ཡིན་པ་དང༌། ཁྲིམས་དོན་ལྷན་ཁང་གིས་ལྷོ་ཀོ་རིཡ་དང་རྒྱ་ནག་གཉིས་བར་གྱི་འབྲེལ་ལ་གུས་བརྩི་ཆེན་པོ་ཞུ་བའི་ཐོག་ནས། ཁྲིམས་འགལ་གྱི་བྱ་སྤྱོད་མཁན་རྒྱ་མི་རིགས་དེ་ཚོར་ཉེས་ཆད་ཡེམ་པོར་མ་སོང་བ་གཏང་གནང་རྒྱུ་ཡིན་སྐོར་འགྲྲེལ་བརྗོད་དང་འབྲེལ། ཁྲིམས་ཐོག་ནས་ཁོང་ཚོ་རང་ཡུལ་ཕྱིར་ལོག་གཏང་རྒྱུའི་ཁྲིམས་གཅོད་བྱ་རྒྱུ་སོགས་ཉེས་ཆད་ཚ་ནན་གཏང་གནང་རྒྱུ་ཡིན་སྐོར་གསུངས་འདུག།