ཧི་མ་ལ་ཡའི་འཁྱགས་རོམ་ལ་ཞིབ་འཇུག།

༄༅༎ཧི་མ་ལ་ཡའི་འཁྱགས་རོམ་འགའ་ཤས་མ་བཞུར་བར་ད་དུང་རྒྱ་ཆེ་རུ་འགྲོ་གི་ཡོད་པའི་སྐོར་ཨ་རི་དང་ཇར་མན་གྱི་ཚན་རིག་བརྟག་དཔྱད་མཁས་པ་ཚོས་ཞིབ་འཇུག་གནང་བའི་བརྒྱུད་མཁྱེན་རྟོགས་བྱུང་བཞག།

འཛམ་གླིང་གི་གངས་རི་མཐོ་ཤོས་ཧི་མ་ལ་ཡའི་རི་རྒྱུད་ཁུལ་འཁྱགས་རོམ་འགའ་ཤས་ས་དང་རྡོ་ཧྲུག་གིས་བཀབ་ནས་ལས་སླ་པོར་འཁྱགས་རོམ་བཞུ་མ་ཐུབ་པར་ལུས་ཡོད་པ་དེ་ད་ཕན་འཛམ་གླིང་ནང་ཚ་དྲོད་རྒྱས་ཀྱི་ཡོད་པའི་ཞིབ་འཇུག་སྙན་ཐོ་མང་པོའི་ནང་གསལ་མེད་པ་རེད། དེ་ཙམ་མ་ཟད་རླུང་པོའི་རྒྱབ་ཕྱོགས་ཀྱིས་ཀྱང་འཁྱགས་རོམ་འགའ་ཤས་མ་བཞུར་བའི་ཆ་རྐྱེན་ཆགས་ཀྱི་ཡོད་པ་རེད། ཇར་མ་ནི་དང་ཨ་མི་རི་ཀའི་གཙུག་ལག་སློབ་གཉེར་ཁང་འགའ་ཤས་ཀྱི་ཚན་རིག་མཁས་པ་ཚོས་ འཛམ་གླིང་ནང་གི་འཁྱགས་རོམ་༢༨༦ལ་ཞིབ་འཇུག་གནང་སྟེ་སྙན་ཐོ་ཞིག་འདོན་སྤེལ་གནང་ཡོད་པའི་ནང༌། ཧི་མ་ལ་ཡའི་འཁྱགས་རོམ་སྤྱི་ཡོངས་ལ་འཛམ་གླིང་གནམ་གཤིས་འགྱུར་ལྡོག་གིས་

ཁྱད་པར་གཅིག་མཚུངས་བཟོས་མེད་པ་དང། ས་ཆ་འགའ་ཤས་ལ་ས་དང་རྡོ་ཧྲུག་གིས་བཀབ་ནས་འཁྱགས་རོམ་བཞུ་མ་ཐུབ་པའི་གནས་ཚུལ་ཡང་ཡོད་པ་གསལ་བཏོན་གནང་བཞག། ༢༠༠༧ལོར་འཛམ་གླིང་མཉམ་སྦྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་ཞིབ་འཇུག་ཚོགས་ཆུང་གིས་འཛམ་གླིང་གི་ཚ་དྲོད་རྒྱས་པའི་རྐྱེན་གྱིས་༢༠༣༥བར་ཧི་མ་ལ་ཡའི་འཁྱགས་རོམ་ཚང་མ་བཞུར་ནས་མེད་པ་ཆགས་རྒྱུ་ཡིན་ལུགས་གསུང་ཡོད་པ་དེ་ནི་ནོར་འཁྲུལ་ཡིན་སྐོར་ ཨ་རི་དང་ཇར་མ་ནིའི་ཚན་རིག་མཁས་པ་ཚོས་ནོར་བཅོས་གནང་ཡོད་པ་མ་ཟད། ཁོང་རྣམ་པས་བཏོན་གནང་བའི་ཞིབ་འཇུག་སྙན་ཐོའི་ནང་ཧི་མ་ལ་ཡའི་ནུབ་ཕྱོགས་ ཀ་ར་ཀོ་རམ་རི་རྒྱུད་ཀྱི་འཁྱགས་རོམ་བརྒྱ་ཆ་༥༨ལ་

ཞིབ་འཇུག་གནང་སྐབས་ནུབ་ངོས་ཀྱི་ལྷག་པ་གྲང་མོས་འཁྱགས་རོམ་དེ་ཚོ་སྲ་བརྟན་གནས་ཐུབ་པ་མ་ཚད། ཁུལ་དེའི་ནང་འཁྱགས་རོམ་མ་བཞུར་བར་ད་དུང་རྒྱ་ཆེ་རུ་འགྲོ་གི་ཡོད་པ་མཁྱེན་རྟོགས་བྱུང་འདུག། དེ་མིན་ཧི་མ་ལ་ཡའི་ཁུལ་རྒྱ་གར་རྒྱ་མཚོའི་ནང་གི་རླུང་ཕོག་སའི་འཁྱགས་རོམ་དེ་ཚོ་བཞུར་ནས་ཕྱིར་བཤིག་རྒྱབ་ཀྱི་ཡོད་སྐོར་གསུངས་བཞག།