རྒྱ་དཀར་ནག་དབར་དམག་འཁྲུག་བྱུང་ནས་ལོ་༥༠འཁོར་བ།

༄༅།    །ལོ་ལྔ་བཅུའི་གོང་ཕྱི་ལོ་༡༩༦༢ཕྱི་ཟླ་བཅུ་པའི་ནང།    ཡུལ་གཉིས་དབར་ཟླ་བ་གཅིག་རིང་དམག་འཁྲུག་ཤོར་སྐབས།    གོ་མཚོན་ལག་ཆ་ཧ་ཅང་ཞན་པའི་རྒྱ་གར་གྱི་དམག་མིར་ཕམ་ཉེས་ཆེན་པོ་བྱུང་ནས་རྒྱ་མིའི་དཔུང་དམག་ཨ་སམ་(Assam) གྱི་རྒྱ་ཐང་བར་དཔུང་འཇུག་གིས་རྒྱ་གར་གཞུང་མང་གཉིས་ཁ་སྐྱེངས་པོ་བཟོས་ཡོད་པ་རེད།  དེ་རྗེས་རྒྱ་མིའི་དམག་མི་ད་ཡོད་ས་མཚམས་བར་ཕྱིར་འཐེན་བྱས་ཀྱང་།    དུས་དེ་ནས་བཟུང་ད་བར་ས་མཚམས་ཀྱི་རྩོད་རྙོག་སེལ་ཐུབ་མེད་པས་མ་ཟད།    ཨ་རུ་ན་ཅལ་(Arunachal) མངའ་སྡེའི་ས་ཁུལ་ཕལ་མོ་ཆེ་རྒྱ་ནག་གི་ཁོངས་གཏོགས་ཡོད་ལུགས་རྩོད་ལེན་བྱེད་མུས་ཡིན་པ་རེད།  
དེ་སྔའི་དམག་འཁྲུག་སྐོར་འགྲེལ་བརྗོད་སྐབས།    རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ ཧོངྒ་ལེའི་(Hong Lei)ཡིས་ཡུལ་གཉིས་ཀྱི་འབྲེལ་ལམ་གྱི་ལམ་བུར་ད་ཆ་འགྱུར་བ་གཏིང་ཟབ་ཕྱིན་ཡོད་པ་དང་།  འཛམ་གླིང་ནང་ཡར་རྒྱས་དང་དཔལ་འབྱོར་འཕེལ་རྒྱས་འགྲོ་བཞིན་པའི་མི་འབོར་ཆེ་ཤོས་ཀྱི་རྒྱལ་ཁབ་གཉིས་ནང་ཡར་རྒྱས་འགྲོ་རྒྱུའི་གོ་སྐབས་བཟང་པོ་ཡོད་པར་བརྟེན།    ཕྱོགས་གཉིས་ཀས་དགྲ་བོའི་འདུ་ཤེས་དོར་ནས་ཐོུང་གི་དམིགས་ཡུལ་བསྒྲུབ་པའི་ཆེད་དུ་མཉམ་མཐུན་གྱི་བྱ་བར་འཇུག་དགོས་པ་དང་། ཐོུང་གི་བསྒྲུབ་ཆ་དཀའ་རྙོག་ལས་གནད་འགག་ཆེ་བ་དང་། ཐོུང་གི་ཁེ་ཕན་འཐབ་རྩོད་ལས་གལ་ཆེ་བ་ཆགས་ཡོད་ལུགས་གཏམ་བཤད་བྱས་འདུག  ཡུལ་གཉིས་དབར་ས་མཚམས་སྐོར་གཞུང་འབྲེལ་གྲོས་མོལ་ཐེངས་བཅུ་བཞི་གནང་ཐུབ་པ་ཙམ་ལས་དོན་འབྲས་ཡང་གང་སོན་མེད་པ་རེད༎