རྒྱ་གར་ནང་ལྐོག་ཟ་རུལ་སུངས་ཀྱི་དཀའ་ངལ་ཤུགས་ཆེ།

༄༅༎རྒྱ་གར་གྱི་སྲིད་བློན་མཆོག་གིས་རྒྱལ་ཁབ་རང་དབང་རང་བཙན་ཐོབ་པའི་ཉིན་མོའི་གསུང་བཤད་ནང་ཡུལ་ནང་ལྐོག་ཟ་རུལ་སུངས་ཀྱི་་དཀའ་ངལ་ཤུགས་ཆེ་ཡོད་པ་དེར་ཉེན་བརྡ་བཏང་གནང་ཡོད་པ་རེད་ དེ་ཡང་སྲིད་བློན་མན་མོ་ཧན་སིང་མཆོག་གིས་བཀའ་སློབ་གསུང་བཤད་གནང་བའི་ནང་ཡུལ་ནང་ལྐོག་ཟ་རུལ་སུངས་་བྱེད་མཁན་ཐོག་ཁྲིམས་ཐོག་ནས་ལག་ལེན་ཤུགས་ཆེ་འགེལ་གནང་རྒྱུ་ཡིན་སྐོར་ནན་བརྗོད་གནང་ཡོད་པ་རེད་       

ཡང་ཁོང་གིས་ཡུལ་ནང་བཟའ་བཅའ་དང་དངོས་པོའི་རིན་གོང་བརྒྱ་ཆ་ ༡༠ ཙམ་གྱི་འཕར་ཆ་འགྲོ་བཞིན་པ་དེ་ཡང་དཀའ་ངལ་ཆེ་ཤོས་ཤིག་ལ་ངོས་འཛིན་གྱིས་འཆར་ཟླའི་ཟླ་ངོ་འགའ་ཤས་རིང་དཀའ་ངལ་དེ་སེལ་རྒྱུར་འབད་བརྩོན་གནང་རྒྱུ་ཡིན་སྐོར་གསུང་འདུག ཡང་སྲིད་བློན་མཆོག་གིས་དེང་སྐབས་འཛམ་གླིང་ནང་རྒྱ་གར་གྱི་ཡུལ་དེ་འཛམ་གླིང་གི་དཔལ་འབྱོར་ཆེ་ཤོས་གྲས་ཀྱི་རྒྱལ་ཁབ་ཅིག་ཆགས་རྒྱུའི་རེ་བ་གནང་གི་ཡོད་ཀྱང་ཡུལ་ནང་ལྐོག་ཟ་རུལ་སུངས་ཀྱི་དཀའ་ངལ་དེས་འགོག་རྐྱེན་དུ་འགྱུར་གྱི་ཡོད་པ་རེད་ཅེས་གསུང་ཡོད་པ་རེད་ཡང་ཁོང་གིས་ཡུལ་ནང་ལྐོག་ཟ་རུལ་སུངས་འགོག་ཐབས་ཐོག་གདོང་ལེན་གང་ཡོང་གནང་གི་ཡོད་པ་དང་རང་ཉིད་གཞུང་འཛིན་གནང་བཞིན་པའི་དུས་སྐབས་འདིར་ཡུལ་ནང་སྲིད་དོན་ཐོག་བརྟན་ལྷིང་དང་དཔལ་འབྱོར་འཕེལ་རྒྱས་ཤུགས་ཆེ་འགྲོ་བཞིན་པ་ཡོད་པའི་སྐོར་ཡང་དྲན་བསྐུལ་གནང་ཡོད་པ་རེད་ ད་ལྟའི་ཆར་ཡུལ་ནང་བཟའ་བཅའ་དང་དངོས་པོའི་རིན་གོང་ཇི་ཆེར་འཕར་མིན་ལ་མ་ལྟོས་པར་སྲིད་བློན་སིང་མཆོག་གིས་རྒྱ་གར་མང་ཚོགས་ལ་རིན་མེད་འཕྲོད་བསྟེན་གྱི་མཐུན་རྐྱེན་དང་དབུལ་ཕོངས་སྡོད་ཡུལ་ཁག་མེད་པ་བཟོས་ནས་ཁོང་ཚོར་སྡོད་གནས་ཀྱི་མཐུན་རྐྱེན་བསྐྲུན་རྒྱུ་ཡིན་སྐོར་ཁས་ལེན་གནང་ཡོད་པ་རེད་ སྲིད་བློན་མན་མོ་ཧན་སིང་མཆོག་སྲིད་བློན་གྱི་ལས་དུས་དེ་དཀྱིལ་ཙམ་ལ་སླེབས་པའི་དུས་སྐབས་དེར་རྒྱ་གར་གྱི་ཕྱོགས་འགལ་ཚོགས་པ་ཁག་དང་གསར་འགྱུར་བརྒྱུད་ལམ་ནང་ཁོང་གི་གཞུང་གི་ཕྱག་ལས་གནང་ཕྱོགས་དེར་དམིགས་ཡུལ་ངེས་ཅན་ཞིག་མེད་པའི་ཚོར་སྣང་དང་དེ་སྔོན་ཁས་ལེན་གནང་བའི་ལས་གཞི་ཁག་ལག་བསྟར་དོན་འཁྱོལ་ཡོང་གི་མེད་པའི་སྐྱོན་བརྗོད་གནང་གི་ཡོད་པ་རེད་ ཁོང་གི་འདས་ཟིན་པའི་གཞུང་འཛིན་གྱི་ལོ་དུས་དེར་ཀོང་རེ་སི་ཚོགས་པ་མ་ཟད་གཞུང་ནང་ལྐོག་ཟ་རུལ་སུངས་ཀྱི་་དཀའ་རྙོག་ཁག་ཅིག་ལ་གདོང་ལེན་གནང་དགོས་པའི་དུས་སྐབས་ཤིག་བྱུང་ཡོད་པ་རེད་