སྲིད་སྐྱོང་མཆོག་གིས་རྒྱ་གར་ཤར་ཕྱོགས་ནས་གཏམ་བཤད་གནང་བ།

སྲིད་སྐྱོང་མཆོག་གིས་ང་ཚོས་སེམས་ཤུགས་ལ་བརྟེན་ནས་དམིགས་ཡུལ་འགྲུབ་ཐབས་བྱེད་དགོས་ཞེས་རྒྱ་གར་གྱི་སློབ་མ་ཚོར་གསུངས་འདུག
དེ་ཡང་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་དོན། སྤྱི་ཚེས་༥རེས་གཟའ་ཉི་མ་ཉིན་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་ཤར་ཕྱོགས་Odishaམངའ་སྡེའི་རྒྱལ་ས་ Bhubaneshwarནང་རྟེན་གཞི་བྱས་པའི་Kalinga Institute of Social Sciences ཞེས་པའི་སློབ་གཉེར་ཁང་དེའི་སློབ་ཕྲུག་རྣམས་ལ་བཀའ་སློབ་གསུང་བཤད་གནང་ཡོད་པ་དང་། སྲིད་སྐྱོང་མཆོག་གིས། ང་ཚོ་གྲོང་ཁྱེར་དང་གྲོང་གསེབ་གང་ཡང་རུང་བ་ནས་ཡིན་ནའང་ང་ཚོ་ཚང་མ་གཅིག་པ་རེད། ང་ཚོ་ཚང་མས་སེམས་ཤུགས་མ་ཆགས་པར་མ་འོངས་པའི་མདུན་ལམ་ཡག་པོ་ཞིག་ཡོང་རྒྱུར་རེ་བ་བྱེད་ཆོག་པས་ཚང་མར་ཐོབ་ཐང་གཅིག་པ་ཡོད་པ་རེད་ཅེས་གསུངས་འདུག ང་ཚོ་མི་གཉོམ་ཆུང་དང་གྲོང་གསེབ་ནས་ཡིན། བྱ་བ་ལམ་ལྷོང་ཡོང་གི་མ་རེད་སོགས་བསམ་ནས་བསྡད་ན་ཡོང་ཐབས་མེད་པ་དང་། དུས་དང་རྣམ་པ་ཀུན་ཏུ་བྱ་བ་ལམ་ལྷོང་ཡོང་རྒྱུའི་བསམ་བློའི་འཁྱེར་ཕྱོགས་དགོས་པ་དང་། ང་ཚོས་སེམས་ཤུགས་ལ་བརྟེན་ནས་དམིགས་ཡུལ་འགྲུབ་ཐབས་བྱེད་དགོས། སེམས་ཤུགས་དེ་ང་ཚོའི་ཉིན་རེའི་བྱེད་ཕྱོགས་ལ་གྱུར་ནས་རྒྱུད་ལ་འཇགས་ཐུབ་ན་བྱ་བ་ལམ་ལྷོང་ཡོང་རྒྱུར་ཕན་ཐོགས་ཡོང་རྒྱུ་ཡིན་སྐོར་གསུངས་འདུག
དེ་བཞིན་སྲིད་སྐྱོང་བློ་བཟང་སེང་གེ་མཆོག་གིས་སློབ་ཕྲུག་རྣམས་ནས་སློབ་སྦྱོང་ཡག་པོ་བྱས་ནས་མི་ཚེ་ཡག་པོ་བསྐྱལ་བའི་ཐོག་སྤྱི་ཚོགས་ཀྱི་ཞབས་ཞུ་དགོས་པའི་འབོད་སྐུལ་གནང་ཡོད་འདུག ཡང་ཁོང་གིས་བོད་དེ་རྒྱ་གར་དང་ལྷོ་ཨེ་ཤི་ཡའི་ཡུལ་ཁག་ལ་གལ་གནད་ཆེ་སྐོར་དང་། ད་ལྟའི་བོད་ནང་གི་ཛ་དྲག་གི་གནས་བབ་དང་བོད་མིའི་སྒྲིག་འཛུགས་ཀྱི་ངོས་ནས་བོད་ནང་གི་དཀའ་རྙོག་ཏེ་སེལ་རྒྱུར་དབུ་མའི་ལམ་གྱི་སྲིད་བྱུས་ཤིག་འཛིན་གྱི་ཡོད་པའི་སྐོར་སོགས་གསུངས་འདུག

གསར་འགོད་པ་ལྷུན་གྲུབ་ཚེ་རིང་།