༧གོང་ས་མཆོག་གི་འཁྲུངས་སྐར་གཞུང་འབྲེལ་གུང་སེང་ལ་བསྒྱུར་བ།

འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་(Pawan kumar Chamling)མཆོག

རྒྱ་གར་འབྲས་ལྗོངས་ནང་༧གོང་ས་མཆོག་གི་སྐུའི་འཁྲུངས་སྐར་ཉིན་གཞུང་འབྲེལ་གུང་གསེང་ཞུ་ཆོག་པའི་ཁྲིམས་ལུཊ་གཏན་འབེབས་གནང་ཡོད་པ།
དེ་ཡང་ཕྱི་ལོ་༢༠༡༥ཟླ་༡༡ཚེས་༢༤ཉིན་འབྲས་ལྗོངས་ཀྱི་གསར་ཤོག་Sikkim Expressཞེས་པའི་ནང་། སྒང་ཏོག་བོད་མིའི་ས་གནས་འགོ་འཛིན་དང་ཁུལ་དེར་གནས་སྡོད་བོད་མི་རྣམས་ཀྱིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་(Pawan kumar Chamling)མཆོག་དང་འབྲས་ལྗོངས་མངའ་སྡེའི་གཞུང་ལ་ཐུགས་རྗེ་ཆེ་ཞུའི་གསལ་བསྒྲགས་སྤེལ་བའི་ནང་། ང་ཚོས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་རྗེས་འབྲང་པ་སྤྱི་དང་། ལྷག་པར་དུ་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྤྱི་ཁྱབ་བློན་ཆེན་མཆོག་གིས་ཐེངས་འདིར་ང་ཚོས་རེ་འདུན་ཞུ་པ་བཞིན་ལོ་ལྟར་ཕྱི་ཟླ་༧ཚེས་༦ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་སླད། འབྲས་ལྗོངས་མངའ་སྡེའི་གཞུང་གི་ལས་ཁུངས་ཁག་གཙོ་བོར་གྱུར་བའི་གཞུང་གི་སྒྲིག་འཛུགས་ཆེ་ཕྲ་ཚང་མའི་ནང་དང་། ཤེས་ཡོན་བསྟི་གནས་ཁང་སོགས་ཀྱི་ལས་བྱེད་རྣམས་ནས་ཉིན་དེར་རྒྱལ་བའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུར་དམིགས་ནས་སྒེར་གྱི་གུང་གསེང་ཞུ་སྐབས་གཞུང་འབྲེལ་གུང་གསེང་གི་ངོ་བོར་བརྩི་རྒྱུའི་ཁྲིམས་ལུགས་གཏན་འབེབས་གནང་བ་དེར་སྙིང་ཁོངས་རུས་པའི་གཏིང་ནས་བཀའ་དྲིན་རྗེས་དྲན་ཞུ་རྒྱུ་མ་ཟད། སྐུ་ཉིད་མཆོག་གིས་༧གོང་ས་སྐྱབས་མགོན་ཆེན་པོ་མཆོག་ལ་གུས་བརྩི་ཧ་ཅང་ཞུས་དང་ཞུ་མུས་ཐོག རིང་མིན་མངའ་སྡེའི་ནང་དུ་ནང་ཆོས་སློབ་གཉེར་ཁང་གསར་འཛུགས་ཀྱི་དགོངས་བཞེས་གནང་བ་དེས་སྐྱེ་འགྲོ་ཀུན་གྱི་བདེ་སྐྱིད་ཀྱི་གཞི་རྩར་གྱུར་ངེས་སྟབས་ང་ཚོས་རྗེས་སུ་ཡི་རང་ཞུ་རྒྱུ་ཡིན་ཞེས་འཁོད་འདུག
དེ་བཞིན་སྒང་ཏོག་བོད་མིའི་ས་གནས་འགོ་འཛིན་བདུད་འདུལ་རྡོ་རྗེ་ལགས་ཀྱིས་གསུངས་ན།  སྤྱིར་འབྲས་ལྗོངས་མངའ་སྡེ་གཞུང་གི་ལོ་ཐོའི་ནང་ལས་བྱེད་རྣམས་ལ་གཞུང་འབྲེལ་ངོ་བོའི་ཐོག་ནས་སྒེར་གྱི་གུང་གསེང་ཉིན་གསུམ་ཞུ་ཆོག་པ་དང་། ཐེངས་འདིར་འབྲས་ལྗོངས་མངའ་སྡེའི་གཞུང་གིས་ཕྱི་ལོ་༢༠༡༥ཟླ་༡༡ཚེས་༥ཉིན་གཞུང་འབྲེལ་གསལ་བསྒྲགས་ཨང་༥༧སྤེལ་བའི་ནང་། ལོ་ལྟར་༧གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་སླད་དེ་ཉིན་ལས་བྱེད་སུ་རུང་གིས་རྒྱལ་བའི་འཁྲུངས་སྐར་སྲུང་བརྩི་ཞུ་རྒྱུར་དམིགས་ནས་སྒེར་གྱི་གུང་གསེང་ཞུས་ཚེ་གཞུང་འབྲེལ་ངོ་བོར་བརྩི་རྒྱུའི་ཁྲིམས་ལུགས་གཏན་འབེབས་གནང་བར་བརྟེན། ད་ཆ་མངའ་སྡེའི་གཞུང་གི་ལོ་ཐོའི་ནང་གཞུང་འབྲེལ་ངོ་བོར་བརྩི་རྒྱུའི་སྒེར་གྱི་གུང་གསེང་ཉིན་བཞི་ཡོད་ལུགས་གསལ་སྟོན་གནང་འདུག

གསར་འགོད་པ་དབྱངས་སྒྲོན།