ཨོ་ལིམ་པིག་རྩེད་འགྲན་སྐབས་དམ་བསྒྲགས་ཁྲིམས་གཞི།

༄༅༎རྒྱ་ནག་གི་དཔལ་འབྱོར་ལྟེ་གནས་ཀྱི་གྲོང་ཁྱེར་ཧྲང་ཧད་ཉེན་རྟོག་ལས་ཁུངས་ནས་ གྲོང་ཁྱེར་དེའི་ནང་ཡོད་པའི་གཞུང་དང་སྲིད་དོན་གྱི་ལྟ་བ་མ་མཐུན་པའི་མི་དང་ མང་ཚོགས་ཀྱི་བདེ་སྡུག་སྙན་སེང་ཞུ་བ་པོ་ལ་སོགས་པ་ དམ་བསྒྲགས་ཡོད་པའི་མི་སྣ་ཞེས་མིང་བཏགས་པའི་མི་ཚོ་ ཨོ་ལིམ་པིག་རྩེད་འགྲན་སྐབས་གྲོང་ཁྱེར་ནང་སྡོད་མི་ཆོག་པའི་བཀའ་རྒྱ་བཏང་ཡོད་འདུག་པ་དང་ ད་དུང་བཀའ་རྒྱ་དེའི་ནང་ ཁོང་ཚོས་གསར་འགོད་པ་ཚོར་སྲིད་དོན་དང་འབྲེལ་བའི་བསམ་ཚུལ་ཤོད་མི་ཆོག་པ་དང་ རྒྱལ་ཁབ་ནས་ཕྱིར་ཐོན་དགོས་པ་ དེ་བཞིན་གོ་མཚོན་དང་འབར་རྫས་སོགས་ཡོད་ཚེ་དེ་དག་ཁང་ཁྱིམ་དུ་བཞག་པ་ལས་ཕྱིར་འཁྱེར་མི་ཆོག་པ་སོགས་བཀོད་ཡོད་ལུགས་ ཧོང་ཀོང་དུ་རྟེན་གཞི་བྱེད་པའི་འགྲོ་བ་མིའི་ཐོབ་ཐང་དང་གནས་ཚུལ་ཁྱབ་སྤེལ་ཁང་གིས་གསར་འགོད་བསྒྲགས་གཏམ་ཞིག་བཏོན་འདུག་པ་དེའི་ནང་གསལ་ཡོད་འདུག

འོན་ཀྱང་ཧྲང་ཧད་གྲོང་ཁྱེར་གྱི་ཉེན་རྟོག་ལས་ཁུངས་ཀྱི་མགྲིན་ཚབ་མ་ཞིག་གིས་ བཀའ་རྒྱ་དེ་རིགས་བཏང་ཡོད་པའི་གནས་ཚུལ་གང་ཡང་ཤེས་རྟོག་མེད་སྟབས་ འདིའི་སྐོར་འགྲེལ་བརྗོད་གང་ཡང་བྱེད་ཐུན་རྒྱུ་མིན་ཚུལ་ རོཡེ་ཀྲརིསི་གསར་སྤེལ་ལས་ཁང་གིས་གསར་འགོད་པས་དྲི་བར་ལན་འདེབས་བྱས་འདུག

རོཡེ་ཀྲརསི་གསར་སྤེལ་ལས་ཁང་ལ་ ཧོང་ཀོང་དུ་རྟེན་གཞི་བྱེད་པའི་འགྲོ་བ་མིའི་ཐོབ་ཐང་དང་གནས་ཚུལ་ཁྱབ་སྤེལ་ལྟེ་གནས་ཁང་གིས་ཉེན་རྟོག་ལས་ཁུངས་ཀྱི་བཏང་པའི་བཀའ་རྒྱའི་འདྲ་བཤུས་ཤིག་མཁོ་སྤྲོད་བྱས་འདུག་པ་དེའི་ནང་ ཨོ་ལིམ་པིག་སྐབས་མང་ཚོགས་ཀྱི་བདེ་འཇགས་སྲུང་སྐྱོབ་བྱེད་ཆེད་དང་ རྩེད་འགྲན་ཐོག་བགེགས་བར་མི་འབྱུང་བ་སོགས་ཀྱི་ཆེད་ གཤམ་གསལ་གྱི་ཁྲིམས་གཞི་ཁག་དམ་བསྒྲགས་ཡོད་པའི་མི་ཚོས་ ཕྱི་ཟླ་བཞི་པའི་ཚེས་ ༡ ནས་ བཅུ་པའི་ཚེས་ ༣༡ བར་སྲུང་བརྩི་བྱེད་དགོས་ཀྱི་རེད་ཅེས་སོགས་འཁོད་ཡོད་འདུག

བྱེད་མི་ཆོག་པའི་ལས་དོན་རྣམ་གྲངས་ཀྱི་ཁོངས་སུ་ མང་ཚོགས་ཁོད་རྒྱག་རེས་རྒྱབ་མི་ཆོག་པ་ གསར་འགོད་པར་ཆབ་སྲིད་དང་འབྲེལབའི་བསམ་ཚུལ་ཤོད་མི་ཆོག་པ་ བདེན་པར་མཁྱོགས་བཤད་བྱེད་པ་དང་ ཆེད་མངགས་དཀྲོག་གཏམ་ཁྱབ་སྤེལ་བྱེད་པའམ་ ཡང་ན་སྤྱི་ཚོགས་ཀྱི་བརྟན་ལྷིངས་མེད་པ་བཟོ་ཐབས་ཀྱི་ལས་དོན་སོགས་རྩོམ་མི་ཆོག་པ་སོགས་གསལ་འཁོད་ཡོད་འདུག།