རྒྱ་དམར་གྱིས་༸གོང་ས་མཆོག་ལ་ཁ་གཏད་གཅོག་དགོས་ལུགས།

༄༅༎རྒྱ་ནག་དམར་ཤོག་ཚོགས་པའི་འགོ་ཁྲིད་ཚོས་ཏྭ་ལའི་བླ་མ་དང་ཏྭ་ལའི་ཤོག་ཁག་ལ་ཁ་གཏད་གཅོག་རྒྱུ་ཤུགས་ཆེ་རུ་གཏོང་རྒྱུ་ཡིན་པའི་གཏམ་བཤད་བྱས་ཡོད་པ་རེད་ཤེང་ལྦ་གསར་འགྱུར་ལས་ཁང་གིས་ཕྱི་ཚེས་༢༤་ཉིན་སྤེལ་བའི་གནས་ཚུལ་ལ་གཞིགས་ན་ རྒྱ་ནག་རྒྱལ་ཡོངས་ཆབ་སྲིད་གྲོས་ཚོགས་ཀྱི་ཚོགས་གཙོ་ཅ་ཆིང་ལིན་དང་ སྤྱི་བདེ་བློན་ཆེན་མངས་ཅང་ཀྲུའུ་ འཐབ་ཕྱོགས་གཅིག་འགྱུར་ཟེར་བའི་འགོ་ཁྲིད་་ཏུའུ་ཆིང་ལོན་གི་གཙོས་རྒྱ་ནག་གཞུང་གི་ཆེས་མཐོའི་དཔོན་རིགས་ཁག་ཅིག་བོད་ནང་བོད་ཀྱི་གནད་དོན་དང་འབྲེལ་བའི་ཉིན་གཉིས་ཀྱི་ཚོགས་འདུར་སླེབས་ཡོད་པ་དང་ ཆབ་སྲིད་གྲོས་ཚོགས་ཀྱི་ཚོགས་གཙོ་ཅ་ཆིང་ལིན་གྱིས་ཏྭ་ལའི་ཤོག་ཁག་ལ་ཁ་གཏད་གདོང་ལེན་བྱ་རྒྱུ་སྔར་ལྷག་ཤུགས་ཆེ་རུ་གཏོང་དགོས་ཀྱི་ཡོད་པའི་སྐོར་གཏམ་བཤད་བྱས་པའི་གནས་ཚུལ་སྤེལ་ཡོད་པ་རེད་

དེ་ཡང་གནས་ཚུལ་བཀོད་དོན་ལྟར་ན་ ཅ་ཆིང་ལིན་གྱིས་འབྱུང་འགྱུར་ལོ་ལྔའི་རིང་བོད་ཀྱི་ཞིང་འབྲོག་ས་ཁུལ་ལ་འཛུགས་བསྐྲུན་གྱི་ལས་གཞི་སྤེལ་ཏེ་མང་ཚོགས་ཀྱི་འཚོ་བའི་གནས་སྟངས་ཡར་རྒྱས་གཏོང་རྒྱུ་ཡིན་པའི་གཏམ་བཤད་བྱས་ཡོད་འདུག་

ཁ་ས་རེས་གཟའ་ལྷག་པའི་ཉིན་ལྷན་ཚོགས་གནང་བའི་ཉིན་གཉིས་ཀྱི་ཚོགས་འདུ་འདིར་གོང་ཞུས་རྒྱ་ནག་དབུས་གཞུང་གི་ཆེས་མཐོའི་དཔོན་རིགས་ཁག་ཅིག་དང་ གཞན་ཡང་བོད་ཀྱི་མངའ་ཁུལ་ཁག་གི་རྒྱ་གཞུང་དཔོན་རིགས་རྣམས་ལྷན་ཚོགས་བྱས་ཡོད་པའི་གནས་ཚུལ་སྤེལ་ཡོད་པ་རེད་