གསུམ་བཅུའི་དུས་དྲན་རྗེས་ལྷ་སར་ཅུང་གུ་ཡངས་ཀྱི་རྣམ་པ།

༄༅།།འདི་ལོའི་གསུམ་བཅུའི་དུས་དྲན་ཚར་བ་དང་ལྷ་སའི་ནང་བདེ་སྲུང་ཡང་གུ་ཡངས་སུ་བཏང་བའི་གནས་ཚུལ་འདུག དེ་ཡང་ཁ་ས་རེས་གཟའ་ཉི་མ་ནས་བཟུང་བོད་ཀྱི་རྒྱལ་ས་ལྷ་སའི་ནང་བདེ་སྲུང་གུ་ཡངས་སུ་ཕྱིན་པའི་ཚོར་སྣང་བྱུང་ཡོད་ཀྱང་ད་དུང་དགོན་པ་ཁག་དང་ལྷ་སའི་སྲང་ལམ་སོགས་ཀྱི་ནང་ཉེན་རྟོག་མི་སྣ་ཁྱོན་ཆེ་གནས་ཡོད་ལུགས་ཀྱིཡོ་དྲོ་གསར་ལས་ཁང་གིས་གནས་ཚུལ་སྤེལ་བཞག། ལྷ་སའི་ཇོ་ཁང་གི་རྒྱལ་སྒོའི་མདུན་དུ་དམིགས་བསལ་ཉེན་རྟོག་མི་སྣ་ཉི་ཤུ་ལྷག་གིས་སྲུང་བྱ་དམ་པོ་བྱེད་བཞིན་ཡིན་པ་དང་ དེ་བཞིན་བར་སྐོར་དང་ར་མོ་ཆེ་སོགས་སུ་ཉེན་རྟོག་པ་མང་པོས་སྐོར་བསྐྱོད་བྱེད་བཞིན་ཡིན་འདུག་། 
རེས་གཟའ་སྤེན་པ་གསུམ་བཅུའི་དུས་དྲན་ཉིན་སྐོར་སྲུང་དམག་མི་འཁྱེར་བའི་ཌག་འཁོར་མང་པོ་ལྷ་སའི་ནང་སྐོར་བསྐྱོད་བྱས་པ་དངོས་སུ་མཐོང་མཁན་བོད་མི་ཞིག་གིས་ཀྱིཡོ་ཀྲོ་གསར་འགོད་པར་གསུང་བཞག། དེ་བཞིན་བོད་མི་གཞན་ཞིག་གིས་ལྷ་སའི་ནང་བདེ་སྲུང་དམ་བསྒྲཌ་ཧ་ཅང་ཆེ་བའི་ཆ་ནས་ ཕྱི་ལོ་༢༠༠༨ལོར་བྱུང་བའི་ཞི་རྒོལ་ཆེན་མོ་དེ་འདྲ་བསྐྱར་དུ་ཡོང་མི་སྲིད་པ་འདྲ་པོ་འདུག་ཅེས་གསུང་བཞག། ལྷ་སར་མཆོད་མཇལ་དང་ཕ་མ་སྤུན་མཆེད་ཐུག་འཕྲད་ཆེད་ཕྱི་ནས་ཡོང་བའི་བོད་མི་རྣམས་ལ་འདྲི་ཞིབ་ནན་པོ་བྱས་ཏེ་བསུན་པོ་བཟོ་གི་ཡོད་པ་དང་ ངོ་སྤྲོད་ལག་ཁྱེར་ཚད་ལྡན་མེད་མཁན་ཚོར་དཀའ་ངལ་ཆེན་པོ་ཡང་འཕྲད་ཀྱི་ཡོད་འདུག ཡང་དགོན་པ་ཁག་གི་འགྲོ་ལམ་ཚང་མར་ཉེན་རྟོག་སྐོར་སྲུང་བ་བཞག་ཡོད་པ་དང་ ལྷ་སའི་ནང་མེ་གསོད་སྣུམ་འཁོར་ཡང་སྔར་ལས་མང་བ་མཐོང་རྒྱུ་ཡོད་འདུག དེ་ནི་རང་ལུས་མེར་བསྲེག་གཏོང་མཁན་བྱུང་ཚེ་འཕྲལ་དུ་མེ་གསོད་ཐབས་ཆེད་དུ་ཡིན་པ་རེད། དེ་བཞིན་ལྷ་སའི་ཉེ་འཁྲིས་སུ་ཡོད་པའི་གོང་དཀར་གནམ་ཐང་གི་འགྲོ་ལམ་དང་ གནམ་ཐང་སོགས་སུའང་བདེ་སྲུང་དམ་བསྒྲགས་ཆེ་རུ་བཏང་ཡོད་འདུག་།