ཨ་རིའི་ཕྱི་སྲིད་དྲུང་ཆེས་འབར་མར་འཚམས་གཟིགས།

༄༅༎དེ་རིང་གཟའ་ལྷག་པའི་ཉིན་ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཀྲེན་མཆོག་འབར་མའི་ནང་ཕེབས་འབྱོར་བྱུང་ནས་ཉིན་གྲངས་གསུམ་རིང་འདས་པའི་ལོ་ངོ་ལྔ་ཅུ་ཙམ་རིང་ཨ་རིའི་ཕྱི་སྲིད་དྲུང་ཆེ་འབར་མའི་ནང་འཚམས་གཟིགས་ཐོག་མ་དེ་གནང་རྒྱུ་ཡིན་ཞིང་ ལྕམ་ཀི་ལིན་ཀྲེན་འབར་མའི་ནང་འཚམས་གཟིགས་གནང་རིང་འབར་མའི་ཆེས་མཐོའི་དཔོན་རིགས་རྣམས་དང་མཇལ་འཕྲད་གནང་རྒྱུ་མ་ཟད་དམངས་གཙོ་ཚོགས་པའི་དབུ་འཁྲིད་ལྕམ་ཨང་སང་སུའུ་ཆི་མཆོག་དང་ཡང་མཇལ་འཕྲད་གནང་འཆར་ཡོད་པ་རེད་
ཨ་རིའི་ཕྱི་སྲིད་དྲུང་ཆེ་ལྕམ་ཀི་ལིན་ཀྲེན་མཆོག་འབར་མར་མ་ཕེབས་སྔོན་ལྷོ་ཀུ་རི་ཡར་འཚམས་གཟིགས་སུ་ཕེབས་ཡོད་པ་དང་ལྷོ་ཀུ་རི་ཡ་ནས་མ་ཕེབས་སྔོན་ལྕམ་ཀི་ལིན་ཀྲེན་མཆོག་གིས་གསར་འགོད་པ་ཚོར་ད་རེས་ཁོང་འབར་མའི་ནང་ཕེབས་ནས་འབར་མའི་ད་ཡོད་སྲིད་གཞུང་གིས་མུ་མཐུད་ཆབ་སྲིད་དང་དཔལ་འབྱོར་ལ་བསྒྱུར་བཅོས་བྱ་རྒྱུའི་འདུན་པ་ཡོད་མིན་དངོས་སུ་རྟོགས་ཞིབ་གནང་རྒྱུ་ཡིན་པ་གསུང་ཡོད་པ་དང་  ད་དུང་འབར་མའི་ནང་ཆབ་སྲིད་བཙོན་པ་ཡོངས་རྫོགས་གློད་བཀྲོལ་དང་ དེ་བཞིན་གྲངས་ཉུང་མི་རིགས་དང་འབར་མ་གཞུང་དབར་གྱི་དྲག་པོའི་འཐབ་རྩོད་མཇུག་སྒྲིལ་རྒྱུ་སོགས་ཀྱི་གནད་དོན་ཐོག་འབར་མའི་དཔོན་རིགས་དང་མཇལ་འཕྲད་གནང་བའི་སྐབས་བཏོན་གནང་རྒྱུ་ཡང་གསུང་འདུག གཟའ་ཕུར་བའི་ཉིན་ལྕམ་ཀི་ལིན་ཀྲེན་མཆོག་དང་འབར་མའི་སྲིད་འཛིན་ཐན་སན་རྣམ་གཉིས་མཇལ་འཕྲད་གནང་རྒྱུ་དང་  དེ་རྗེས་ལྕམ་ཨང་སང་སུའུ་ཆི་དང་ལྷན་དུ་མཇལ་འཕྲད་གནང་རྒྱུ་ཡིན་འདུག