བོད་ཀྱི་དར་རྩེ་མདོའི་ནང་གནམ་ཐང་ཞིག་སྒོ་འབྱེད་བྱས་སྐོར།

༄༅༎རྒྱ་ནག་གཞུང་གིས་ཟླ་བ་འདིའི་ནང་བོད་ཀྱི་ས་ཁུལ་དར་རྩེ་མདོའི་ནང་གནམ་ཐང་ཞིག་སྒོ་འབྱེད་བྱེད་ཀྱི་ཡོད་པའི་གསལ་བསྒྲགས་བྱས་ཡོད་པ་རེད་ གནམ་ཐང་དེ་ནི་འཛམ་གླིང་ཐོག་གི་ཆེས་མཐོ་བའི་གནམ་ཐང་ཨང་གཉིས་པ་ཡིན་སྐོར་དྲིལ་བསྒྲགས་བྱེད་ཀྱི་ཡོད་པ་དང་གནམ་ཐང་དེ་རྒྱ་ནག་གི་ཟི་ཁྲོན་ཞིང་ཆེན་ཟེར་བའི་ཁོངས་གཏོགས་རྒྱ་སྐད་ནང་ཁང་ཏུན་ཞེས་པའི་བོད་ཀྱི་དར་རྩེ་མདོའི་ས་ཁུལ་ནང་སྒོ་འབྱེད་བྱེད་ཀྱི་ཡོད་པ་དང་རྒྱ་ནག་གཞུང་གི་གསལ་བསྒྲགས་ཀྱི་ནང་དོན་ལ་གཞིགས་ཚེ་ཟླ་བ་འདིའི་ཟླ་མཇུག་ཙམ་ནས་རྒྱ་ནག་གི་ཤར་ཕྱོགས་མཁའ་འགྲུལ་གནམ་གྲུ་དར་རྩེ་མདོའི་ནང་འཕུར་འགོ་ཚུགས་རྒྱུ་དང་འགྲོ་ལམ་དེ་ཡང་ཡུ་ནན་ཞིང་ཆེན་གྱི་རྒྱལ་ས་ཁུང་མིན་ནས་ཟི་ཁྲོན་ཞིང་ཆེན་གྱི་རྒྱལ་ས་ཁྲིན་ཏུའུ་བརྒྱུད་དར་རྩེ་མདོའི་ས་ཁུལ་ནང་འཕུར་བསྐྱོད་བྱ་རྒྱུ་ཡིན་སྐོར་བརྗོད་ཀྱི་ཡོད་པ་རེད་ གནས་ཚུལ་ཐོན་ཁུངས་ལ་གཞིགས་ན་རྒྱ་ནག་གཞུང་གིས་གནམ་ཐང་འདི་འདི་ལོའི་ཕྱི་ཟླ་ལྔ་པའི་ནང་སྒོ་འབྱེད་བྱེད་འཆར་བྱས་ཀྱང་སྒོ་འབྱེད་ཐུབ་མེད་སྐོར་གསུངས་པ་ལས་རྒྱུ་མཚན་ཇི་ཆགས་གསལ་བཤད་གང་ཡང་བྱས་མེད་པ་དང་དེ་ནི་གཙོ་བོ་བོད་ཀྱི་ས་ཁུལ་ཡོངས་ལ་སྐབས་དེར་བོད་མིའི་རང་དབང་སྒེར་ལངས་ཀྱི་ཞི་བའི་ལས་འགུལ་བྱུང་བའི་ཤུགས་རྐྱེན་གྱིས་སྒོ་འབྱེད་མ་ཐུབ་པ་ཞིག་ཡིན་པ་ཤེས་རྟོགས་ཐུབ་ཀྱི་ཡོད་པ་རེད་ རྒྱ་ནག་གཞུང་གིས་གནམ་ཐང་དེ་སྒོ་འབྱེད་བརྒྱུད་ཕྱི་ཕྱོགས་ནས་མ་རྩ་འཛུགས་འཇོག་དང་ཡུལ་བསྐོར་སྤྲོ་འཆམ་པ་ཡོང་མི་བརྒྱུད་དཔལ་འབྱོར་གྱི་ཁེ་ཕན་ཡོང་རྒྱུའི་རེ་བ་རྒྱབ་ཀྱི་ཡོད་པ་དང་རྒྱ་ནག་གཞུང་གིས་གནམ་ཐང་དེར་ལོ་རེར་འགྲུལ་པ་མི་གྲངས་གསུམ་འབུམ་གསུམ་ཁྲི་ཙམ་ཡོང་རྒྱུའི་ཚོད་དཔགས་བྱེད་ཀྱི་ཡོད་སྐོར་བཀོད་ཡོད་པ་རེད།