སེང་སྒྲ་ལགས་བཙོན་བཀྲོལ་བྱུང་ནས་ཕ་ཡུལ་དུ་འབྱོར་འདུག

སེང་སྒྲ་ལགས་རྒྱ་ནག་གི་བཙོན་ཁང་ནས་གློད་བཀྲོལ་ཐོབ་ཡོད་ཀྱང་སྐུ་གཟུགས་ཀྱི་གནས་སྟངས་སྐྱོ་བོ་ཡོད་པ་རེད་འདུག
དེ་ཡང་འདི་ག་རླུང་འཕྲིན་ཁང་གི་གསར་འགོད་པས་གནས་ཚུལ་བཏང་བ་ལྟར་ན། ཨ་མདོ་མགོ་ལོག་ནས་ཡིན་པའི་སེང་སྒྲ་ལགས་རྒྱ་ནག་གི་བཙོན་ཁང་ནས་གློད་བཀྲོལ་ཐོབ་ཡོད་ཀྱང་སྐུ་གཟུགས་ཀྱི་གནས་སྟངས་སྐྱོ་བོ་ཡོད་པ་རེད་འདུག ཁོང་ཕྱི་ཟླ་༡༠་བའི་ཚེས་༡༨་ཉིན་ཟི་ལིང་ཕྱོགས་ཀྱི་ཏོན་ཧྲིན་བཙོན་ཁང་ནས་གློད་བཀྲོལ་བཏང་ཡོད་པ་དང་། གློད་བཀྲོལ་ཐོབ་མ་ཐག་རྗེ་སྐུ་འབུམ་དགོན་པར་མཆོད་མཇལ་ལ་བཅར་རྗེས་རང་ཁྱིམ་དུ་ཕེབས་ཡོད་འདུག
འོན་ཀྱང་གནས་ཚུལ་ངོ་སྤྲོད་གནང་མཁན་གྱི་གསུངས་ན། དེ་སྔ་དང་མི་འདྲ་བར་ཁོང་ལ་བཙོན་ཁང་ནང་སྡུག་སྦྱོང་མནར་གཅོད་ཧ་ཅང་བཏང་བའི་རྐྱེན་གྱིས་ཁོང་གི་སྐུ་གཟུགས་ཀྱི་གནས་སྟངས་སྐྱོ་པོ་ཆགས་ཡོད་ལུགས་གསུངས་འདུག

མཚོ་སྔོན་ཞིང་ཆེན་མགོ་ལོག་ཁུལ་དགའ་བདེ་རྫོང་རྐྱང་ཆད་ཡུལ་ཚོའི་ནང་དེ་སྔ་ཕྱི་ལོ་༢༠༡༤་ལོར་ས་གནས་ཀྱི་འགོ་ཁྲིད་དུ་མང་ཚོགས་ནས་འོས་འདེམས་བྱས་པའི་ཨ་ཉག་སེང་སྒྲའམ་སེང་སྒྲ་ལགས་བདམས་ཐོན་བྱུང་ཡོད་ཀྱང་། སྐབས་དེར་རྒྱ་ནག་གཞུང་གིས་ཁོང་གིས་དེ་སྔ་ཁྲིམས་དང་འགལ་བའི་ལས་ཀ་བྱས་ཡོད་ལུགས་སོགས་བཤད་ནས་མང་ཚོགས་ནས་བདམས་པ་དེར་ངོས་ལེན་མ་བྱས་པའི་ཁར་རིམ་པས་ཕྱི་ལོ་༢༠༡༤་ཕྱི་ཟླ་༡༢་བའི་ཚེས་༡༤་ཉིན་དངོས་སུ་འཛིན་བཟུང་དང་། རྗེས་སུ་ལོ་གཅིག་དང་ཟླ་གསུམ་གྱི་བཙོན་འཇུག་ཁྲིམས་ཆད་བཀལ་ཡོད་འདུག།

གསར་འགོད་པ་རིག་འཛིན་ཆོས་སྒྲོན།