འཛམ་གླིང་ནང་ཁྲིམས་ལུཊ་དྲང་བདེན་ཡོད་མེད་ཐད་ཉམས་ཞིབ།

༄༅༎འཛམ་གླིང་གི་ཡུལ་ཁག་ནང་ཁྲིམས་ལུགས་ལག་བསྟར་དེ་ཇི་འདྲ་ཡོད་པའི་ཉམས་ཞིབ་སྙན་ཐོ་ཞིག་འདོན་སྤེལ་གནང་བའི་ནང་། རྒྱ་ནག་དང་ར་ཤི་ཡ་ཨ་མི་རི་ཀའི་ཡུལ་ཁག་བཅས་པའི་ནང་ཁྲིམས་ལུགས་ལག་ལེན་བསྟར་ཕྱོགས་ཐོག་དཀའ་རྙོག་ཡོད་པའི་གནས་ཚུལ་ཐོན་ཡོད་པ་རེད། ཡར་རྒྱས་འགྲོ་བཞིན་པའི་ཡུལ་ཁག་ཁོངས་རྒྱ་ནག་ལ་ཆ་བཞག་པ་ཡིན་ན། ཡུལ་དེའི་ཁྲིམས་ལུགས་ཀྱི་ཚན་པ་ཁག་གི་སྤུས་ཚད་དང་ལག་ལེན་བསྟར་ཕྱོགས་སོགས་ཀྱི་ཐོག་ཡར་རྒྱས་གང་མཚམས་ཕྱིན་ཡོད་ཀྱང་། ཁྲིམས་ལུགས་ཀྱི་ཚན་པ་ཁག་རང་དབང་ཅན་གྱི་ཚན་པ་ཆགས་རྒྱུར་ད་དུང་ཡར་རྒྱས་གཏོང་དགོས་སྐོར། འཛམ་གླིང་ཁྲིམས་ལུགས་ཐོག་དྲན་བདེན་ཡོད་མིན་གྱི་རྟོག་ཞིབ་ཚན་པ་དེས་གསུངས་ཡོད་པ་རེད།          

གོང་ཞུས་ཀྱི་རྟོག་ཞིབ་ཚན་པ་དེས། རྒྱ་གར་ནང་སྨྲ་བརྗོད་རང་དབང་ཆེན་པོ་ཡོད་པ་དང་། ཁྲིམས་ལུགས་རང་དབང་དང་། གཞུང་གི་ཕྱག་ལས་གནང་ཕྱོགས་ཐོག་ཕྱི་གསལ་ནང་གསལ་ཡོད་ནའང་། གཞུང་གི་ལས་ཁུངས་ཁག་ལས་དོན་ཚག་འཚུད་མེད་པ་དང་ཁྲིམས་ཁང་གི་ལས་དོན་དེ་དུས་འགོར་ཆེ་བ་དང་། ལྐོག་བཟའ་རུལ་སུངས་གི་དཀའ་རྙོག་མང་པོ་ཡོད་པའི་སྐོར། སྙན་ཐོ་དེའི་ནང་བཀོད་ཡོད་པ་རེད།         

ཡང་ཡར་རྒྱས་འགྲོ་བཞིན་པའི་རྒྱལ་ཁབ་ཁུངས་ར་ཤི་ཡའི་གཞུང་གི་ཕྱག་ལས་གནང་ཕྱོགས་དེར། གཞུང་གི་ཚན་པ་ཁག་བར་དབང་ཆ་བགོས་འགྲེམས་མེད་པ་དང་། ལྐོག་བཟའ་རུལ་སུངས་དང་སྲིད་དོན་ཐོག་ཐེ་བྱུས་ཤུགས་ཆེ་ཡུལ་མིའི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་མེད་པ་མ་ཟད། སྨ་བརྗོད་རང་དབང་དང་མི་མང་འདུ་ཚོགས་ཆོག་པའི་རང་དབང་མེད་པ་སོགས་ཀྱི་དཀའ་རྙོག་དུ་མ་ཡོད་པའི་སྐོར་སྙན་ཐོ་དེའི་ནང་བཀོད་ཡོད་པ་རེད།           

ཨ་མི་རི་ཀར་ཆ་བཞག་པ་ཡིན་ན་གཞུང་གི་ལས་དོན་གནང་ཕྱོགས་དེ་ཡག་པོ་ཡོད་པ་དང་། ཡུལ་མིར་ཆབ་འབངས་ཀྱི་རང་དབང་ཡོད་པ་མ་ཟད་ཁྲིམས་ལུགས་ཀྱང་རང་དབང་ལྡན་པ་ཡོད་ནའང་། བསྐོར་སྲུང་བ་དང་ཁྲིམས་ཁང་ཁག་གིས་ཕྱི་རྒྱལ་གྱི་ཡུལ་མི་དང་གྲངས་ཉུང་མི་རིགས་ཚོར་ཁྲིམས་ལུགས་དྲང་བདེན་བྱེད་ཀྱི་མེད་པའི་སྐྱོན་བརྗོད་ཕོག་ཡོད་པ་རེད།          

ཡིན་ནའང་ཡོ་རོབ་ཀྱི་ཡུལ་གྲུ་སུད་ཌེན་དང་ནོར་ལྦེ་ཡུལ་གཉིས་འཛམ་གླིང་ནང་ཁྲིམས་ལུགས་དྲང་བདེན་གྱི་ཚད་གཞི་དེ་ལེགས་ཤོས་ཡོད་པ་གོང་ཞུས་འཛམ་གླིང་ནང་ཁྲིམས་ལུགས་དྲང་བདེན་ཉམས་ཞིབ་ཚན་པ་དེའི་སྙན་ཐོའི་ནང་བཀོད་ཡོད་པ་རེད༎