ཨ་རིིའི་ཕྱི་སྲིད་དྲུང་ཆེ་རའེ་སེ་མཆོག་རྒྱ་ནག་ཏུ་འཚམས་གཟིགས།

༄༅༎ཨ་རིའི་ཕྱི་སྲིད་དྲུང་ཆེ་ལྕམ་ཀོན་ཌོ་ལི་ཛ་རའེ་སེ་མཆོག་ཕྱི་ཟླ་དང་པོའི་ཚེས་བདུན་དང་བརྒྱད་བར་རྒྱ་ནག་ནང་རྒྱལ་དོན་འཚམས་གཟིགས་སུ་ཕེབས་འཆར་ཡོད་པ་རྒྱ་ནག་ཕྱི་སྲིད་ལས་ཁང་གིས་གཟའ་པ་སངས་ཉིན་གནས་ཚུལ་ཕྱིར་བསྒྲགས་བྱས་ཡོད་འདུག

ཨ་རིའི་ཕྱི་སྲིད་དྲུང་ཆེ་མཆོག་ད་རེས་རྒྱ་ནག་ཏུ་རྒྱལ་དོན་འཚམས་གཟིགས་སུ་ཕེབས་ཡས་དེ་ནི་གཙོ་བོ་རྒྱ་ནག་དང་ཨ་རིའི་དབར་ཕྱི་འབྲེལ་འབྲེལ་ལམ་བཙུགས་ནས་ལོ་ངོ་སུམ་ཅུ་འཁོར་བའི་དུས་དྲན་གྱི་འབྲེལ་ཡོད་མཛད་སྒོ་ཁག་ནང་ཞུགས་རྒྱུའི་ཆེད་ཡིན་ཞིང་དེ་ཡང་ཁོང་ཨ་རིའི་ཕྱི་སྲིད་དྲུང་ཆེའི་ཐུགས་འགན་བཞེས་པའི་རིང་གི་ཕྱི་རྒྱལ་ཡུལ་གྲུར་རྒྱལ་དོན་འཚམས་གཟིགས་སུ་ཕེབས་ཡས་མཐའ་མ་དེ་ཡིན་པ་རེད། ཨ་རིའི་ཕྱི་སྲིད་དྲུང་ཆེ་མཆོག་རྒྱ་ནག་ནང་རྒྱལ་དོན་འཚམས་གཟིགས་སུ་ཕེབས་འཆར་ཡོད་པའི་གནས་ཚུལ་དེ་ཕྱིར་བསྒྲགས་མ་གནང་སྔོན་ཨ་རིའི་སྲིད་འཛིན་ཇོར་ཇེ་སྦུཤི་མཆོག་དང་རྒྱ་ནག་གི་སྲིད་འཛིན་ལྦུའུ་ཇིན་ཐའོ་རྣམ་གཉིས་དབར་ཕྱི་ལོའི་ལོ་གསར་ཉིན་ཡུལ་གཉིས་དབར་ཕྱི་འབྲེལ་འབྲེལ་ལམ་བཙུགས་ནས་ལོ་ངོ་སུམ་ཅུ་འཁོར་བའི་དུས་དྲན་ལ་ཕན་ཚུན་འཚམས་འདྲིའི་འཕྲིན་ཡིག་གནང་ཡོད་པ་རེད། ༡༩༧༡འི་ཕྱི་ཟླ་དང་པོའི་ཚེས་གཅིག་ཉིན་ཨ་རི་གཞུང་གིས་ཐའེ་ལྦན་དང་གཞུང་འབྲེལ་འབྲེལ་ལམ་མཚམས་འཇོག་བྱས་ནས་རྒྱ་ནག་དང་གཞུང་འབྲེལ་འབྲེལ་ལམ་དངོས་སུ་གསར་བཙུགས་བྱས་ཡོད་ཅིང་གཟའ་པ་སངས་ཉིན་རྒྱ་ནག་ཕྱི་སྲིད་ལས་ཁང་གིས་གནས་ཚུལ་ཕྱིར་བསྒྲགས་བྱས་པའི་ནང་ཨ་རིའི་ཕྱི་སྲིད་དྲུང་ཆེ་ལྕམ་རའེ་སེ་མཆོག་རྒྱ་ནག་ནང་ཕེབས་རིང་རྒྱ་ནག་གི་ཕྱི་སྲིད་བློན་ཆེན་ཡང་ཇལ་ཁྲེ་དང་ལྷན་དུ་ཕྱོགས་གཉིས་དབར་དགོངས་ཚུལ་སྤེལ་རེས་དང་དེ་བཞིན་ཡུལ་གྲུ་གཉིས་ཀས་ཐུགས་འཁུར་གནང་སའི་གནད་དོན་ཁག་གི་ཐོག་བཀའ་བསྡུར་གནང་རྒྱུ་ཡིན་པའི་སྐོར་ཡོད་པ་ལས་ཞིབ་ཕྲ་གནད་དོན་ག་རེའི་ཐོག་ཕན་ཚུན་བཀའ་མོལ་གནང་འཆར་ཡོད་པ་སོགས་གནས་ཚུལ་གང་ཡང་གསལ་བཤད་བྱས་མེད་པ་རེད།