ཉི་ཧོང་དུ་མི་དམངས་ཁག་ནས་ཨ་རིའི་སྲིད་འཛིན་ལ་ངོ་རྒོལ་བྱ་རྒྱུ།

༄༅༎ཨ་རིའི་སྲིད་འཛིན་སྦ་རཀ་ཨོ་སྦ་མ་མཆོག་ཉི་ཧོང་གི་རྒྱལ་ས་ཀྲོག་ཡོ་ནང་ཆེད་ཕེབས་གནང་ཡོད་པའི་སྐབས་དེར་ཉི་ཧོང་ནང་གི་ཨ་རིའི་དམག་མིའི་རྟེན་གཞི་མེད་པ་བཟོ་རྒྱུའི་ངོ་རྒོལ་དང་རྡུལ་ཕྲན་ནུས་ཤུགས་ཁྱབ་གདལ་དུ་མི་འགྲོ་བ་དང་གནམ་གཤིས་འགྱུར་ལྡོག་འགོག་རྒྱུའི་ཐབས་ལམ་ལག་བསྟར་དགོས་པའི་འབོད་སྐུལ་ཞུ་རྒྱུའི་ངོ་རྒོལ་གྱི་ལས་འགུལ་སྤེལ་རྒྱུའི་འཆར་གཞི་འདུག

ཉི་ཧོང་ནང་རྣམ་ཀུན་ནས་སྲང་ལམ་ཁག་གི་ངོ་རྒོལ་ཕལ་ཆེ་བ་ཞི་བའི་ངོ་རྒོལ་ཡིན་ནའང་ད་ལྟའི་སྐབས་འདིར་ཉི་ཧོང་འཛིན་སྐྱོང་མི་སྣ་ཚོས་རྒྱལ་ས་ཀྲོག་ཡོའི་ནང་བདེ་འཇགས་དང་འབྲེལ་བའི་དཀའ་རྙོག་མི་ཡོང་བའི་སྔོན་འགོག་གི་ཚུལ་དུ་ས་གནས་ལྟེ་བ་ཁག་ལ་ཉེན་རྟོག་དམག་མི་༡༦༠༠༠ལྷག་ཙམ་འགྲེམས་འཇོག་གནང་བཞག

ཁ་སྔོན་རེས་གཟའ་ཉི་མའི་ཉིན་ཉི་ཧོང་ལྷོ་ཕྱོགས་ཀྱི་གླིང་ཕྲན་ཨོ་ཀི་ན་ལྦར་མི་གྲངས་ཁྲི་གཉིས་ལྷག་ཙམ་གྱིས་ངོ་རྒོལ་ཁྲོམ་སྐོར་བྱས་པའི་རྗེས་དེ་རིང་རྒྱལ་ས་ཀྲོག་ཡོའི་ནང་བསྐྱར་དུ་ཉི་ཧོང་ནང་ཨ་རིའི་དམག་མི་རྟེན་གཞི་ཡོད་པར་སྐྱོན་བརྗོད་བྱེད་མཁན་ཚོས་ངོ་རྒོལ་བྱ་རྒྱུའི་འཆར་གཞི་འདུག

འཛམ་གླིང་དམག་ཆེན་གཉིས་པའི་སྐབས་ཧི་རོ་ཤི་མ་དང་ན་ག་ས་ཀི་ཐོག་ཨ་མི་རི་ཀའི་རྡུལ་ཕྲན་འབོམ་གཡུག་ནས་མི་དམངས་འབུམ་འགའ་ཤས་ལ་སྲོག་སྐྱོན་བཏང་བའི་ནང་མི་རྗེས་ཤུལ་ཚོས་ཨ་རིའི་གཞུང་ཚབ་ཁང་བརྒྱུད་སྲིད་འཛིན་ཨོ་སྦ་མ་མཆོག་ལ་རྡུལ་ཕྲན་གོ་མཚོན་མེད་པ་བཟོ་ཐབས་གནང་དགོས་པའི་འབོད་སྐུལ་གྱི་ཞུ་སྙན་འབུལ་རྒྱུ་ཡིན་པ་དང་ཡང་ཁོར་ཡུག་སྲུང་སྐྱོབ་དོན་གཉེར་བ་ཁག་ཅིག་ནས་ཀྱང་ཨ་རིའི་སྲིད་འཛིན་ལ་གནམ་གཤིས་འགྱུར་བའི་དཀའ་ངལ་སེལ་ཐབས་གནང་དགོས་པའི་འབོད་སྐུལ་ཞུ་རྩིས་འདུག

དེ་བཞིན་ཉི་ཧོང་ནང་གི་བོད་དོན་རྒྱབ་སྐྱོར་བ་ཁག་གཅིག་གིས་ཀྲོག་ཡོའི་ནང་བོད་ལ་རང་དབང་ཆེ་ཙམ་ཐོབ་རྒྱུའི་འབད་བརྩོན་ཨ་རིའི་སྲིད་འཛིན་གྱིས་གནང་དགོས་པའི་སྐད་འབོད་ཀྱང་གནང་འདུག།