ཉེན་སྲུང་བས་ཀཤ་མིར་སློབ་ཕྲུག་༡རྐྱེན་ལམ་དུ་བཏང་བར་ངོ་རྒོལ།

༄༅༎ཉེ་ཆར་རྒྱ་གར་གྱི་དམག་མིས་རྒྱ་གར་བྱང་ཕྱོགས་ཀཤ་མིར་ཁུལ་ལོ་ན་༢༢ལ་སོན་པའི་སློབ་ཕྲུག་ཞིག་རྐྱེན་ལམ་དུ་བཏང་པའི་དོན་རྐྱེན་དང་འབྲེལ་བའི་ཐོག་ནས་ དེ་རིང་གཟའ་སྤེན་པའི་ཉིན་ས་ཁུལ་དེའི་ནང་ཡུལ་མི་སྟོང་ཕྲག་འགའ་ཤས་ངོ་རྒོལ་རྔམ་སྟོན་གཞི་རྒྱ་ཆེ་བ་ཞིག་བྱས་འདུག་པ་དང་ སླར་ཡང་ས་ཁུལ་དེའི་ནང་སྔ་ལོ་བྱུང་བའི་དུས་ཟིངས་དེ་ལྟ་བུ་ཞིག་འབྱུང་རྒྱུར་སེམས་ཚབས་བྱེད་བཞིན་ཡོད་པ་རེད།

ཀཤ་མིར་ཁུལ་དུ་ཡོད་པའི་རྒྱ་གར་དཔུང་དམག་གི་མགྲིན་ཚབ་པས་རྐྱེན་ལམ་དུ་བཏང་པའི་སློབ་ཕྲུག་དེ་རྒྱ་གར་གྱི་དམག་དཔུང་གི་ངོས་ནས་ པ་ཀིསྟན་ནས་འཇིགས་བསྐུལ་དྲག་སྤྱོད་པ་སིམ་འཛུལ་དུ་ཡོང་མཁན་འཇུ་བཟུང་བྱ་རྒྱུའི་ཆེད་བཙུགས་པའི་དམག་མི་གབ་ཡིབ་བྱ་སའི་ས་ཁུལ་ཞིག་ཏུ་སླེབས་པ་དང་ དམག་མིས་འཇུ་བཟུང་བྱེད་ཐབས་བྱས་པའི་སྐབས་སློབ་ཕྲུག་དེ་བྲོས་ཐབས་བྱས་པར་བརྟེན་དམག་མིས་ཁོ་འཇིགས་བསྐུལ་དྲག་སྤྱོད་པ་ཡིན་པའི་དྭོགས་གཞིའི་འོག་མེ་མདའ་བརྒྱབ་སྟེ་རྐྱེན་ལམ་དུ་སོང་བ་ཡིན་པ་འགྲེལ་བརྗོད་བྱེད་བཞིན་ཡོད་པ་རེད།།