ཡེ་ཤུའི་བླ་ཆེན་ནས་དྲ་རྒྱ་བེད་སྤྱོད་གཏོང་སྟངས་ཐོག་འབོད་སྐུལ།

༄༅༎དེ་རིང་ཡེ་ཤུའི་བླ་ཆེན་པོཔ་སྦེ་ནེ་ཌིཀ་༡༧པ་Pope Benedict XVIམཆོག་གིས་ཡེ་ཤུའི་གནམ་བདག་ཆོས་ལུགས་ཀྱི་རྗེས་འབྲང་པ་ཚོར་འགན་ཡོད་པའི་ཐོག་ནས་གནས་འཕྲིན་དྲ་རྒྱ་བེད་སྤྱོད་གཏོང་དགོས་རྒྱུའི་འབོད་སྐུལ་གནང་བཞག།

འཛམ་གླིང་འབྲེལ་མཐུད་ཉི་མོ་ཐེངས་༤༥པ་སྲུངབརྩི་གནང་རྒྱུར་བླ་ཆེན་པོཔ་མཆོག་གིས་མང་ཚོགས་ལ་གསུང་འཕྲིན་ཞིག་གནང་ཡོད་པའི་ནང༌། སྤྱི་ཚོགས་ནང་གི་མི་རྒན་གཞོན་ཚང་མས་དངོས་སུ་ཕན་ཚུན་ཐུག་འཕྲད་བྱས་ནས་འབྲེལ་བ་བྱེད་ཡག་དེ་གལ་ཆེན་པོ་ཡིན་པ་དེ་ཚང་མས་དུས་རྟག་ཏུ་སེམས་ལ་དྲན་དགོས་རྒྱུ་དང། གནས་འཕྲིན་དྲ་ལམ་བརྒྱུད་འབྲེལ་བ་བྱེད་ཡག་དེ་དངོས་སུ་ངོ་ཐུག་བྱེད་ཡག་གི་ཚབ་བྱས་ན་འགྲིག་གི་མེད་པའི་སྐོར་བཀའ་གནང་འདུག།

གོང་ཞུས་འཛམ་གླིང་འབྲེལ་མཐུད་ཉི་མོ་དེ་བཞིན་རིང་མིན་ཕྱི་ཟླ་༦པའི་ཚེས་༥ཉིན་སྲུང་བརྩི་ཞུ་རྒྱུ་ཡིན་ནའང༌། བླ་ཆེན་པོཔ་མཆོག་གིས་ཉིན་དེའི་གསུང་འཕྲིན་དེ་རིང་སྩལ་གནང་ཡོད་པའི་ནང༌། དེང་སང་གི་དུས་སྐབས་འདིར་གནས་འཕྲིན་དྲ་རྒྱ་དེ་བཞིན་འགྲོ་བ་མིའི་འཚོ་བའི་ཆ་ཤས་མེད་དུ་མི་རུང་བ་ཞིག་ཆགས་ཡོད་ནའང༌། དྲ་རྒྱ་བེད་སྤྱོད་ཚུལ་བཞིན་གཏོང་དགོས་པའི་སྐོར་གསུངས་ཏེ། ལྷག་པར་དུ་གཞོན་སྐྱེས་ཚོས་འགན་ཡག་པོ་འཁྱེར་བའི་ཐོག་ནས་ཕན་ཚུན་གུས་བརྩི་དང་དྲང་བདེན་གྱི་སྒོ་ནས་དྲ་རྒྱའི་ཐོག་བསམ་ཚུལ་བརྗོད་རེས་དང་འབྲེལ་ལམ་ཚུལ་མཐུན་བྱེད་་དགོས་རྒྱུའི་སློབ་སྟོན་གནང་འདུག།