པོ་ལེནྜའི་གྲོང་ཁྱེར་ཞིག་ནས་༸གོང་ས་མཆོག་ལ་ཆེ་བསྟོད་འབུལ་རྒྱུ།

༄༅༎བཙན་བྱོལ་བོད་གཞུང་གི་དྲ་གནས་ཐོག་དེ་རིང་གནས་ཚུལ་སྤེལ་བར་ལྟར་ན། པོ་ལེན་དྲིའི་ལྷོ་ནུབ་ཁུལ་གྱི་ལྦོརོ་ཁོལོ་ཞེས་པའི་གྲོང་ཁྱེར་གྱི་སྤྱི་ཁྱབ་སྐུ་ཞབས་ རཱ་ཕེལ་དྲུ་ཀེ་ལྦིཛ་ མཆོག་ནས་འདི་ཚེས་༢༣ ཉིན་གསལ་བསྒྲགས་གནང་བའི་ནང་། ཏཱ་ལའི་བླ་མ་མཆོག་གིས་ལོ་ངོ་བཅུ་ཕྲག་ལྔ་ཙམ་རིང་གདུག་རྩུབ་ཅན་གྱི་སྲིད་གཞུང་འོག་གནས་པའི་ཁོང་གི་མི་མང་ཚོར་རང་དབང་ཐོབ་ཐབས་སུ་འཐབ་རྩོད་མུ་མཐུད་གནང་ཡོད་པའི་མཛད་རྗེས་ལ་ང་ཚོ་འགྲོ་བ་མིའི་ཐོབ་ཐང་དང༌། རང་དབང་ལ་དགའ་བས་མི་ཚང་མས་གུས་བཀུར་དང་ཆེ་བསྟོད་ཞུ་འོས་པ་ཞིག་རེད། དེ་འདྲ་ཡིན་དུས་ང་ཚོས་དགའ་སྤོབས་དང་ལྡན་པའི་ཐོག་ནས་༸གོང་ས་མཆོག་ལ་ཆེ་བསྟོད་ཚུལ་དུ་གྲོང་ཁྱེར་གྱི་མི་སེར་ཕྱག་འཁྱེར་འབུལ་གྱི་ཡིན་ཞེས་གསུངས་ཡོད་པ་རེད། གོང་ཞུས་ཆེ་བསྟོད་ཀྱི་ཕྱག་འཁྱེར་དེ་དག་ལོ་རྗེས་མ་༸གོང་ས་༸སྐྱབས་མགོན་ཆེན་པོ་མཆོག་གྲོང་ཁྱེར་དེའི་ནང་ཆིབས་བསྒྱུར་གནང་བའི་སྐབས་འབུལ་རྒྱུའི་འཆར་གཞི་ཡོད་ལུགས་ཀྱང་གསུངས་ཡོད་པ་རེད།