བལ་ཡུལ་སྲིད་བློན་གསར་པས་ཉེན་བརྡ་དང་འབོད་སྐུལ།

༄༅༎བལ་ཡུལ་གྱི་སྲིད་བློན་གསར་པ་མཆོག་གིས་དེ་རིང་རེས་གཟའ་པ་སངས་ཉིན་ཐོག་མའི་གསུང་བཤད་གནང་བའི་སྐབས། བལ་ཡུལ་དེ་བཞིན་ཞི་བདེ་མཉམ་གནས་བྱེད་དང༌། ཡང་ན་སྔར་གྱི་དམག་འཁྲུག་བསྐྱར་དུ་འགོ་འཛུགས་མིན་གྱི་ཆེས་མཐའ་མའི་གནས་སྐབས་ཤིག་རེད་ཅེས་མི་དམངས་ཚོར་ཉེན་བརྡ་བཏང་ཡོད་པ་རེད།
སྲིད་བློན་གསར་པ་སྐུ་ཞབས་སྦ་སྦུ་རམ་བ་ཏ་རའེ་ཡིས་བལ་ཡུལ་གྱི་བརྙན་འཕྲིན་ཐོག་གསུང་བཤད་གནང་སྟེ། བལ་ཡུལ་རྒྱལ་ཁབ་དེ་བཞིན་ལོ་རྒྱུས་ཀྱི་གཉན་འཕྲང་ཅན་གྱི་དུས་སྐབས་ཡིན་པ་དང༌། དེར་བརྟེན་ཕྱོགས་འགལ་ཆབ་སྲིད་ཚོགས་པ་ཚོས་རྒྱལ་ཁབ་ཀྱི་ཞི་བའི་ལས་དོན་ཆ་ཚང་བ་ལེགས་གྲུབ་ཡོང་རྒྱུ་དང༌། རྩ་ཁྲིམས་གསར་པ་བཟོ་རྒྱུའི་ལས་དོན་ལམ་ལྷོང་ཡོང་རྒྱུར་ཕྱ་གྲུ་མཉམ་འདེགས་གནང་དགོས་པའི་འབོད་སྐུལ་གནང་ཡོད་ཅིང༌། ད་དུང་ཁོང་གིས། དེ་སྔའི་གཞུང་གིས་བཞག་པའི་ལས་དོན་མཐའ་དག་ཆ་ཚང་བ་ལེགས་གྲུབ་ཡོང་མི་སྲིད་པ་ཞིག་ཡིན་ནའང། གལ་ཏེ་ཆབ་སྲིད་ཚོགས་པ་ཁག་ནང་ཁུལ་དུ་ཡིད་ཆེས་དང༌། མཉམ་ལས། བསམ་འཆར་རྩེ་མཐུན་ཡོད་ན། ལས་དོན་ལྷག་འཕྲོས་རྣམས་ཆ་ཚང་བ་ལེགས་གྲུབ་ཡོང་བ་བྱ་དགོས་ཀྱི་རེད། ངའི་ངོས་ནས་ཆབ་སྲིད་ཚོགས་པ་ཁག་ཚོས་ད་ལྟ་གཞུང་གི་དཀའ་ཚེགས་ཆེ་བའི་ལས་དོན་ལེགས་གྲུབ་ཡོང་བར་རོགས་རམ་བྱ་རྒྱུའི་ཐུགས་རེ་གནང་གི་ཡོད་ཅེས་གསུང་སྟེ། ཁོང་གིས། ད་ཆ་བལ་ཡུལ་རྒྱལ་ཁབ་དེའི་ནང་ཆབ་སྲིད་ཚོགས་པ་ཁག་དབར་འཆམ་མཐུན་མེད་པར་རྒྱལ་ཁབ་ཆིག་སྒྲིལ་ལ་འགོག་རྐྱེན་འཕྲད་བཞིན་པ་དེར་རེ་བའི་ཁ་ཕྱོགས་གསར་པ་ཞིག་ལམ་སྟོན་གནང་ཡོད་པ་རེད། དགུང་གྲངས་༥༧ ལ་ཕེབས་པའི་སྐུ་ཞབས་སྦ་སྦུ་རམ་བ་ཏ་རའེ་ནི། སྲིད་བློན་ཟུར་པ་ཇའ་ལ་ནའཐ་ཀ་ནལ་ཡིས་དགོངས་པ་ཞུས་པའི་ཚབ་ཏུ་མའོ་གྱེན་ཤོག་ཁའི་ཆབ་སྲིད་ཚོགས་པ་ནས་སྲིད་བློན་གསར་པ་འོས་འདེམས་བྱུང་སྟེ། གཟའ་འཁོར་གསུམ་ལས་འགྲོ་གི་མེད་པ་དང༌། སྲིད་བློན་ཟུར་པ་ཁ་ནལ་མཆོག་གིས་ཟླ་བ་དྲུག་རིང་ཆབ་སྲིད་ཀྱི་དབུ་ཁྲིད་ཀྱི་འགན་འཁུར་བཞེས་པའི་རྗེས། བལ་ཡུལ་རྒྱལ་ཁབ་དེ་བཞིན་ཞི་བའི་ལས་དོན་ཐོག་བསྐྱོད་ཐུབ་མེད་པར་གསུང་སྟེ། སྲིད་བློན་ནས་དགོངས་ཞུ་གནང་རྒྱུའི་ཐག་གཅོད་གནང་བ་ཞིག་ཡིན་པ་རེད།