བོད་མི་ཚོར་རྨ་ཁ་མེད་པའི་གཅར་རྡུང་བྱེད་ཀྱི་འདུག

ཉེ་བའི་ཆར་རྒྱའི་བཙོན་འོག་ནས་བཙོན་གྲོལ་ཐོབ་པའི་བོད་མི་ཞིག་གིས་དངོས་མྱོང་གནས་ཚུལ་འདི་ག་རླུང་འཕྲིན་ཁང་ལ་བརྗོད་དོན། ཕྱི་ལོ་༢༠༠༨་ལོའི་བོད་ནང་གི་ས་བྱི་ཞི་རྒོལ་ཆེན་མོའི་རྗེས་སམ་ཕྱི་ལོ་༢༠༠༩་ལོའི་ལོ་མཇུག་ཏུ་རྒྱ་ནག་གཞུང་གིས་འཛིན་བཟུང་བྱས་སྟེ་བོད་ཀྱི་རྒྱལ་ས་ལྷ་སའི་ཆུ་ཤུལ་བཙོན་ཁང་ནང་བཙོན་འཇུག་བྱས་པའི་བོད་མི་ཞིག་ད་ཆ་བཙོན་གྲོལ་ཐོབ་ན་ཡང་ཁོང་ནད་པར་གྱུར་ཡོད་པ་དང་། བོད་མི་ཆབ་སྲིད་བཙོན་པ་རྣམས་ཉིན་ལྟར་རྐང་ལག་བཞི་བོ་གནམ་ལ་དཔྱང་ནས་གཅར་རྡུང་ཚད་མེད་གཏོང་གི་ཡོད་པ་མ་ཟད་། ཁ་ལག་དུས་ཐོག་ཏུ་མི་སྤྲོད་པ་དང་། སྤྲད་པའི་ནང་བྱེ་མ་བསྲེས་བ། འཐུང་ཆུ་ཡུན་རིང་མི་སྤྲོད་པ་སོགས་ལྟོགས་སྐོམ་དཀའ་ངལ་སྤྲད་པར་བརྟེན་བཙོན་པ་ཚོས་བཟོད་སྒོམ་མ་ཐུབ་པར་རང་ཉིད་ཀྱི་གཅིན་པ་འཐུང་གི་ཡོད་པ་དང་། མནར་གཅོད་ཚད་མེད་བཏང་བའི་རྐྱེན་གྱིས་བོད་ཀྱི་ཆབ་སྲིད་བཙོན་པ་བརྒྱ་ཆ༩༠་མིག་ལ་སྐྱོན་ཤོར་བ་དང་། རྨ་ཤུལ་མེད་པའི་གཅར་རྡུང་དྲག་པོ་བྱེད་བཞིན་པ་རེད་ཅེས་དང་།

ད་དུང་བོད་མི་བཙོན་པ་ཚོར་ཉིན་ལྟར་ཚ་འདྲི་ནན་འདྲི་བྱེད་སྐབས་རྒྱབ་ལ་ངན་སྐུལ་བྱེད་མཁན་སུ་ཡོད་པ་དང་། སུས་བརྒྱུད་སྐུལ་བྱས་པ་ཡིན་མིན།  དེ་བཞིན་རྒྱལ་བ་རིན་པོ་ཆེ་ཡིས་ཁྱེད་ཚོར་ཕན་ཅི་ཡང་ཐོག་གི་མེད་ཚུལ་དང་། ཕན་ཐོག་མཁན་དེ་ནི་རྒྱ་ནག་གུང་ཁྲན་ཏང་ཡིན་པ་ཤེས་དགོས་སྐོར་སོགས་བཙན་གྱིས་བཤད་སྐབས་བོད་མི་ཚོས་ང་ཚོར་འགྲོ་བ་མིའི་ཐོབ་ཐང་མེད་པ་དང་ཆོས་དད་རང་དབང་མེད་སྐོར་ལན་འདེབས་བྱས་ཡོད་ཚུལ་སོགས་བརྗོད་ཡོད།