བལ་ཡུལ་ཕྱོགས་འགལ་ཚོགས་པས་ངོ་རྒོལ་སྤེལ་རྒྱུ།

༄༅༎བལ་ཡུལ་ནང་དམར་ཤོག་མའོ་ཚོགས་པའི་སྲིད་བློན་གྱིས་དབང་ཆའི་ནང་གནས་ཐབས་ཀྱི་འཐབ་བྱུས་བཟུང་སྟེ་ཁྲིམས་བཟོའི་འཐུས་མིའི་ལྷན་ཚོགས་འཕོ་འགྱུར་བཏང་བ་དེར་ཕྱོགས་འགལ་ཀོང་རེསི་ཚོགས་པས་གཙོས་པའི་ཚོགས་པ་བཅུ་དགུས་ངོ་རྒོལ་ལས་འགུལ་སྤེལ་རྒྱུ་ཡིན་འདུག

ཕྱི་ཟླ་༥པའི་ཚེས་༢༧མཚན་དགུང་ཕར་འགྱངས་གནང་བའི་ཁྲིམས་བཟོའི་འཐུས་མིའི་ལྷན་ཚོགས་ཀྱི་དུས་ཡུན་རྫོགས་རྗེས སྲིད་བློན་བྭ་བུ་རམ་བ་ཊ་རའེ་ ཡིས་ཁྲིམས་བཟོའི་འཐུས་མིའི་ལྷན་ཚོགས་རྩ་གྲོལ་བཏང་སྟེ་འདི་ལོ་ཕྱི་ཟླ་༡༡པའི་ཚེས་༢༢ཉིན་སླར་ཡང་རྒྱལ་ཡོངས་ཁྲིམས་བཟོའི་འཐུས་མིའི་ལྷན་ཚོགས་ཀྱི་འོས་བསྡུ་གསལ་བསྒྲགས་གནང་ཡོད་པ་རེད། འོན་ཀྱང་ཀོང་རེསི་ཚོགས་པ་སོགས་ལ་གྲོས་བསྡུར་མེད་པར་དམར་ཤོག་མའོ་ཚོགས་པ་ཉིད་ཀྱིས་ཁྲིམས་བཟོའི་འཐུས་མིའི་ལྷན་ཚོགས་རྩ་གྲོལ་བཏང་སྟེ་སྲིད་བློན་རང་ཉིད་བར་བརྒལ་གཞུང་གི་སྲིད་བློན་ལས་གནས་བཟུང་བཞིན་པ་ནི། དམར་ཤོག་མའོ་ཚོགས་པས་དབང་ཆ་བཟུང་ཐབས་ཀྱི་འཐབ་བྱུས་ཤིག་ཡིན་པར་ཀོང་རེས་ཚོགས་པ་གཙོས་པའི་སྲིད་དོན་ཚོགས་པ་ཁག་གིས་སྐྱོན་འཛུགས་གནང་ཡོད་འདུག ཕྱི་ལོ་༢༠༠༨་ལོར་རྩ་ཁྲིམས་གསར་བཟོའི་ཆེད་ཁྲིམས་བཟོའི་འཐུས་མི་རྣམས་འོས་འདེམས་ཀྱིས་ལས་ཡུན་ལོ་ངོ་གཉིས་ནང་ཚུད་རྩ་ཁྲིམས་གཏན་འབེབས་བྱ་རྒྱུའི་དུས་བཀག་གནང་ཡང་དུས་ཐོག་འགྲུབ་མ་ཐུབ་སྟབས། ལས་ཡུན་འཕར་འགྱངས་ཟླ་དྲུག་རེའི་མཚམས་སུ་ཐེངས་རེ་གནང་སྟེ་འཕར་འགྱངས་ཀྱིས་ད་བར་ལོ་་བཞིའི་རིང་རྩ་ཁྲིམས་གསར་བཟོའི་ལས་དོན་འགྲུབ་མེད་པ་རེད༎