བྱང་ཨ་རིར་ཉིན་རྒྱ་དུས་གཅིག་གི་ལས་འགུལ་སྤེལ་བ།

༄༅༎ཨ་རི་སྐུ་ཚབ་དོན་ཁང་གིས་གནས་ཚུལ་ཁྱབས་སྤེལ་བྱས་པའི་ནང་དབུས་བོད་མིའི་སྒྲིག་འཛུགས་ཀྱི་བཀའ་ཤག་དང་། སྤྱི་འཐུས་ལྷན་ཚོགས་ཐུན་མོང་ནས་གཞིས་ལུས་མི་མང་རྣམས་ལ་རྒྱབ་སྐྱོར་དང་། གདུང་སེམས་མཉམ་བསྐྱེད་མཚོན་ཆེད་རེས་གཟའ་ལྷག་པ་ལྷག་དཀར་གྱི་ཉིན་མོར་འཛམ་གླིང་ཁྱོན་དུ་ཉིན་རྒྱ་དུས་གཅིག་ཏུ་ཟས་བཅད་མཆོད་འབུལ་གྱི་ལས་འགུལ་སྤེལ་དགོས་པའི་འབོད་སྐུལ་གྱི་དགོངས་དོན་གསལ་བསྒྲགས་གནང་བ་ལྟར། ཕྱི་ཚེས་ ༡༩ དེ་བཞིན་རེས་གཟའ་ལྷག་པ་འཁེལ་བའི་ལྷག་དཀར་གྱི་ཉིན་མོར་བྱང་ཨ་རི་ཁུལ་དུ་བོད་མི་གནས་ཡུལ་ས་གནས་གང་སར་གཞིས་ལུས་བོད་མི་ཚོས་འུ་ཐུག་ཐབས་ཟད་ངང་རང་སྲོག་དོར་ཏེ་རྒྱ་ནག་གཞུང་གིས་བོད་ནང་འཛིན་པའི་དྲག་རྩུབ་ཀྱི་སྲིད་བྱུས་ལ་ངོ་རྒོལ་གནང་བར་གདུང་སེམས་མཉམ་སྐྱེད་དང་རྒྱབ་སྐྱོར་མཚོན་ཆེད་ ཟས་བཅད་མཆོད་འབུལ་དང་འབྲེལ་ལས་འགུལ་རྣམ་པ་སྣ་ཚོགས་སྤེལ་ཡོད་པ་རེད་ དེ་ཡང་བྱང་ཨ་མེ་རི་ཁའི་ཁྱབ་ཁོངས་སུ་ཡོད་པའི་རྒྱལ་ས་ལྦ་ཤིང་ཀྲོན་དང་ཀེ་ལི་ཕོར་ནི་ཡ། ནིའུ་ཡོག ནིའུ་ཇར་སི་ པོཏ་ལེནདྲ་ མི་ནི་སོ་ཊ་ བྱང་ཀེ་ལི་ཕོར་ནི་ཡ་ ཨི་ཐི་ཐ་ ཕི་ལ་ཌེལ་ཕི་ཡ་ སྦོ་སི་ཀྲེན་ སི་ཡ་ཀྲལ་ ལྦ་ཤིང་ཀྲོན་ ཤའར་ལོཏསི་ལྦིལ་ ཡུའུ་ཀྲའ་ སེན་ཏ་ཕེ་ ཨའེ་ཌ་ཧོ་ ཁེ་ན་ཌའི་ཊོ་རན་ཊོ་དང་ མོན་ཀྲིཡོལ་ ཁེལ་ག་རི་བཅས་ཀྱི་ས་གནས་མང་ཆེ་བའི་ནང་གི་བོད་མི་ཚོས་ཟས་བཅད་མཆོད་འབུལ་གྱི་ལས་འགུལ་སྤེལ་བ་དང་། དུས་མཚུངས་བོད་ནང་གི་གནས་སྟངས་ཧ་ཅང་ཚབས་ཆེན་པོ་ཆགས་པའི་དུས་སྐབས་འདིར་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གཙོས་རང་དབང་ལ་དགའ་བའི་རྒྱལ་ཁབ་དང་། མི་མང་ཚོས་བོད་མི་ཚོར་རྒྱབ་སྐྱོར་དང་། གདུང་སེམས་མཉམ་བསྐྱེད་གནང་རོགས་ཞེས་ཡིག་ངག་གཉིས་ནས་འབོད་སྐུལ་ཞུས་ཡོད་འདུག ཆབས་གཅིག་ད་རེས་ཀྱི་ལས་འགུལ་དེའི་ཐོག་རྒྱལ་སྤྱིའི་ཚོགས་པ་ཁག་གིས་བོད་ནང་རྒྱ་ནག་གི་དམ་བསྒྲགས་ཀྱི་སྲིད་བྱུས་མཚམས་འཇོག་ཡོང་ཐབས་དང་དྲང་བདེན་གྱི་ཞིབ་འཇུག་ཚོགས་པ་དང་། རང་དབང་གི་གསར་འགོད་པ་བོད་ནང་བསྐྱོད་ཐབས་དགོས་པའི་གཅིག་གྱུར་གྱིས་དགོས་འདུན་བཏོན་འདུག དེ་བཞིན་བྱང་ཨ་རིའི་ས་གནས་ཁག་མང་པོའི་ནང་ས་གནས་བོད་མི་ཚོས་གནས་ཡུལ་ས་གནས་གཞུང་དང་གྲོས་ཚོགས་ཉེ་འདབས་སུ་ཉིན་ཤས་སྔོན་ནས་མར་མེའི་ཁྲོམ་སྐོར་དང་།སྐད་འབོད། འདུ་འཛོམས། སྨོན་ལམ་གསུང་འདོན། སྙན་ཞུ་འབུལ་གཏོང་ས་རྟགས་བསྡུ་ལེན་ཡིག་ཆ་འགྲེམས་སྤེལ་སོགས་རྣམ་པ་འདྲ་མིན་གྱི་ལས་འགུལ་སྤེལ་ཡོད་པ་རེད༎