ཨ་རིའི་སྲིད་འཛིན་རྒྱ་གར་དུ་འཚམས་འདྲིར་ཕེབས་འཆར།

༄༅༎ཨ་མི་རི་ཀའི་སྲིད་འཛིན་ཨོ་སྦ་མ་མཆོག་རིང་མིན་ཕྱི་ཟླ་༡༡པའི་འགོ་སྟོད་དུ་རྒྱ་གར་དུ་འཚམས་འདྲིར་ཕེབས་རྒྱུའི་འཆར་གཞི་ཡོད་པ་དང༌། སྲིད་འཛིན་གྱི་ལྕམ་མི་ཤེལ་རྒྱ་གར་གྱི་འཚམས་འདྲི་དེར་དོ་སྣང་ཆེན་པོ་གནང་གི་ཡོད་པའི་སྐོར་རྒྱ་གར་གྱི་དུས་བབ་ཅེས་པའི་གསར་ཤོག་དྲ་རྒྱའི་ཐོག་གནས་ཚུལ་སྤེལ་ཡོད་པ་རེད།

དེ་ཡང་ཨ་མི་རི་ཀའི་གྲོང་ཁྱེར་ནེའུ་ཡོག་ཏུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་དུ་ཕེབས་པའི་རྒྱལ་ཁབ་ཁག་སྐུ་ཚབ་ལ་ཨ་མི་རི་ཀས་གྲོང་ཁྱེར་ནེའུ་ཡོག་ཏུ་ཡོད་པའི་རང་འབྱུང་ལོ་རྒྱུས་ཀྱི་འགྲེམས་སྟོན་ཁང་དུ་ཆེ་བསྟོད་ཀྱི་སྣེ་ལེན་ཞུས་པའི་སྐབས། སྲིད་འཛིན་ཨོ་སྦ་མ་ཡིས་རྒྱ་གར་གྱི་ཕྱི་སྲིད་བློན་ཆེན་ལ་ཁོང་རྒྱ་གར་དུ་འཚམས་འདྲིར་ཕེབས་རྒྱུའི་ཐུགས་རེ་ཡོད་པའི་གནས་ཚུལ་གསུངས་ཡོད་དང་ལྕམ་མི་ཤེལ་གྱི་ཁོང་ཡང་རྒྱ་གར་དུ་འཚམས་འདྲིར་ཕེབས་རྒྱུའི་བཀའ་མོལ་གསུང་ཡོད་ལུགས་རྒྱ་གར་གྱི་ཕྱི་འབྲེལ་མི་སྣས་གསུང་ཡོད་པ་རེད། སྲིད་འཛིན་ཨོ་སྦ་མ་ཡིས་རྒྱ་གར་དུ་འཚམས་འདྲིར་ཕེབས་རྒྱུའི་འདུན་པ་ཡོད་པའི་སྐོར་དེ་རྒྱ་གར་གྱི་ཕྱི་སྲིད་བློན་ཆེན་ལ་གསུང་པ་ཙམ་མ་ཡིན་པར་ད་རེས་ནེའུ་ཡོག་ཏུ་ཚོགས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་ཐོག་སྲིད་འཛིན་ཨོ་སྦ་མ་ཡི་གསུང་བཤད་ནང་ལའང་ཁོང་འདི་ལོའི་དགུན་ཁ་ཨེ་ཤི་ཡའི་ཁུལ་དུ་འཚམས་འདྲིར་ཕེབས་རྒྱུ་དང་དེ་ཡང་རྒྱ་གར་དུ་འཚམས་འདྲིར་ཕེབས་རྒྱུ་ཡིན་ཞེས་གསུང་ཡོད་པ་རེད།