འཛམ་གླིང་གནམ་གཤིས་ཚོགས་ཆེན་གྲུབ་འབྲས་བཟང་པོ་ཐོན་རེ།

༄༅༎ཁ་ས་ཨ་མི་རི་ཀའི་སྲིད་འཛིན་ཨོ་བྷ་མ་མཆོག་གིས་ཨ་རིའི་ནང་གཞུང་དོན་འཚམས་གཟིགས་གནང་བར་ཕེབས་པའི་རྒྱ་གར་གྱི་སྲིད་བློན་ མན་མོ་ཧན་སིངྒ་མཆོག་ལ་རིང་མིན་ཌེན་མཀ་ཀྱི་རྒྱལ་ས་ཀོ་པེན་ཧ་གེན་ནང་འཚོགས་འཆར་ཡོད་པའི་འཛམ་གླིང་གནམ་གཤིས་ཚོགས་ཆེན་ཐོག་གྲུབ་འབྲས་བཟང་པོ་ཐོན་རྒྱུར་རྒྱབ་སྐྱོར་ཡོང་བའི་རེ་སྐུལ་གནང་འདུག།

སྲིད་འཛིན་ཨོ་བྷ་མ་མཆོག་གིས་རྒྱ་གར་སྲིད་བློན་སིངྒ་མཆོག་ལ་ཁ་ས་སྲིད་འཛིན་ཕོ་བྲང་དཀར་པོའི་ནང་སྣེ་ལེན་གདན་ཞུ་གནང་རྗེས་ཟུང་འབྲེལ་གསར་འགོད་ལྷན་ཚོགས་ཤིག་གནང་ཡོད་པའི་སར། དབུ་ཁྲིད་རྣམ་གཉིས་ཀྱིས་ཟུང་འབྲེལ་སྤྱི་བསྒྲགས་ཤིག་སྤེལ་གནང་ཡོད་པ་རེད། གསལ་བསྒྲགས་དེའི་ནང་ཨོ་བ་མ་མཆོག་དང་སིངྒ་རྣམ་གཉིས་ཀྱིས་ རིང་མིན་ཕྱི་ཟླ་༡༢པའི་ཚེས་༧ནས་༡༨བར་གྲོང་ཁྱེར་ཀོ་པེན་ཧ་གེན་དུ་འཛམ་གླིང་མཉམ་སྦྲེལ་རྒྱལ་ཚོགས་ཀྱི་གནམ་གཤིས་ཚོགས་ཆེན་ཐོག་ཕྱོགས་ཚང་མས་མོས་མཐུན་ཡོད་པའི་ཡོངས་ཁྱབ་མཐུན་གྲོས་ཤིག་འཇོག་ཐུབ་པའི་ཐུགས་རེ་གསལ་བཏོན་གནང་ཡོད་ཅིང༌། མཐུན་གྲོས་དེས་ཡར་རྒྱས་ཕྱིན་པའི་རྒྱལ་ཁབ་ཚོས་མཁའ་རླུང་སྦག་བཙོག་བཟོ་བའི་དུ་རླངས་ཉུང་དུ་གཏོང་རྒྱུའི་ཚད་བཀག་དམ་འཛིན་བྱ་རྒྱུ་དང༌།

ཡར་རྒྱས་འགྲོ་བཞིན་པའི་རྒྱལ་ཁབ་ཚོས་ཀྱང་མཁའ་རླུངས་བཙོག་པ་མི་བཟོ་པའི་འོས་འཚམས་ཀྱི་ལས་དོན་བྱ་དགོས་རྒྱུའི་ཚད་གཞི་བཟོ་ཐབས་གནང་དགོས་པའི་སྐོར་དབུ་འཁྲིད་རྣམ་གཉིས་ཀྱིས་མོས་མཐུན་གཅིག་གྱུར་གནང་འདུག།