གསེར་ཆེན་ཕྱོགས་སུ་ནང་ཁུལ་ས་རྩོད་བྱུང་ནས་མི་༩རྨས་འདུག

མཚོ་ལྷོ་ཁུལ་གསེར་ཆེན་རྫོང་གི་སྡེ་བ་གཉིས་བར་ནང་ཁུལ་ས་རྩོད་སྐོར་གྱི་གནས་ཚུལ་ཞིབ་ཕྲ་འདི་གའི་གསར་འགོད་པ་ཀུན་བཟང་བསྟན་འཛིན་གྱིས་བཏང་བ་གཤམ་ནས་གསན་རོགས

ཡིག་ཐོག་གསར་འགྱུར།

མཚོ་ལྷོ་ཁུལ་གསེར་ཆེན་རྫོང་གི་སྡེ་བ་གཉིས་བར་ནང་ཁུལ་ས་རྩོད་བྱས་ནས་བོད་མི་༩ལ་རྨས་སྐྱོན་ཕོག་ནས་གནས་སྟངས་ཛ་དྲག་འོག་ཡོད་པ་རེད། དེ་ཡང་འདི་གའི་གསར་འགོད་པས་གནས་ཚུལ་བཏང་དོན། མཚོ་སྔོན་ཞིང་ཆེན་མཚོ་ལྷོ་ཁུལ་ གསེར་ཆེན་རྫོང་ཨིར་སྟི་ཡུལ་ཚོའི་གཡང་རོང་སྡེ་བ་དང་ཆུ་རྔ་སྡེ་བ་གཉིས་བར་ལོ་མང་རིང་ས་ཆའི་རྩོད་གཞི་ཡོད་པ་དང་། ཕྱོགས་གཉིས་ཀས་འབྲེལ་ཡོད་གཞུང་གི་ལས་ཁུངས་ལ་ཐེངས་མང་ཞུ་གཏུགས་བྱས་ཀྱང་ད་ལྟའི་བར་ས་ཆའི་བདག་དབང་ལ་ཐག་གཅོད་ཁ་གསལ་མེད་པར་ལུས་ཡོད་འདུག གནས་སྟངས་དེའི་འོག་ཉེ་བའི་ཟླ་འདིའི་ཚེས་༧ཉིན་གཡག་ལུང་སྡེ་བའི་མི་གྲངས་༢༠༠ལྷག་ཆུ་རྔ་སྡེ་བའི་ས་ཐོག་ལ་སོང་ནས་ཁུལ་དེའི་བོད་མི་ཚོ་གཅར་རྡུང་བཏང་བའི་རྐྱེན་ཆུ་རྔ་སྡེ་བའི་མི་༩ལ་རྨས་སྐྱོན་ཕོག་པ་དང་། ད་ལྟ་མཚོ་ལྷོ་ཁུལ་སྨན་ཁང་དུ་མྱུར་སྐྱོབ་སྨན་བཅོས་བྱེད་བཞིན་ཡོད་འདུག ས་གནས་བོད་མི་ཞིག་གིས་བརྗོད་དོན། ཉེ་སྔོན་ཕྱོཊ་གཉིས་བར་ས་ཆའི་རྩོད་གླེང་གི་གནས་ཚུལ་ཡོས་སྐབས་ནས་ས་གནས་རྒྱ་གཞུང་ལ་ཞུ་གཏུགས་བྱས་ཀྱང་། སྐབས་དེར་དྲག་ཆས་དམག་མི་དང་ཉེན་རྟོག་པ་བཅས་རླངས་འཁོར་༣༠ཙམ་ས་གནས་སུ་འབྱོར་ཙམ་བྱས་བ་ལས་ སྡེ་བ་གཉིས་འཁྲུག་འཛིང་ཤོར་བའི་ཉིན་དེར་དམག་མི་དང་ཉེན་རྟོག་པ་ཚོས་གནས་སྟངས་ལྷིང་འཇགས་ཡོང་ཐབས་བར་འདུམ་ལ་སོགས་པའི་ཐེ་བྱུས་གང་ཡང་མ་བྱས་པར་ཕྱིར་ལོག་ཡོད་པ་དང་། དེའི་རྗེས་སྡེ་བ་གཉིས་བར་རྡོ་དང་། དབྱུག་པ། ལྕགས་ཁེམ་སོགས་འཁྱེར་ནས་འཁྲུག་འཛིང་ཤོར་རྗེས་ཟླ་འདིའི་ཚེས་༡༤ཡས་མས་སུ་རྒྱ་ནག་གཞུང་གི་ཉེན་རྟོག་པས་ གཡང་རོང་སྡེ་བའི་སྡེ་དཔོན་དང་། སྡེ་དཔོན་གཞོན་པ་གཉིས་འཛིན་བཟུང་བྱས་ཡོད་པ་མ་ཟད། ད་དུང་གཡང་རོང་སྡེ་བའི་བོད་མི་ཁ་ཤས་ཤིག་ལ་འཛིན་བཟུང་བཀའ་རྒྱ་བཏང་ཡོད་པ་རེད་འདུག གསར་འགོད་པ་དོན་གྲུབ་རྣམ་རྒྱལ།