ཡུ་གུར་འགོ་ཁྲིད་ར་སྦི་ཡ་ལ་ནིའུ་ཛི་ལེན་ཌིར་གདན་ཞུའི་སྐོར།

༄༅༎ཤིན་ཅང་མི་རིགས་ཀྱི་འགོ་འཁྲིད་ར་སྦི་ཡ་ཀ་རྡིར་ནིའུ་ཛི་ལེན་ཌི་ནང་གདན་ཞུ་གནང་བ་དེར་ཁོང་ལ་ཐོངས་མཆན་ལྦི་ས་ཕུལ་དང་མ་ཕུལ་དེ་ཉིན་ཤས་ནང་ཐག་གཅོད་གནང་རྒྱུ་ཡིན་སྐོར་ནིའུ་ཛི་ལེན་ཌིའི་སྲིད་བློན་ཇོན་ཀི་མཆོག་གིས་གསུང་འདུག

སྲིད་བློན་ཇོན་ཀི་མཆོག་གིས་གསར་འགོད་པ་ཁག་ཅིག་ལ་རྒྱ་གཞུང་གིས་ལྕམ་ར་སྦི་ཡ་ཀ་རྡིར་ལ་ལྦི་ས་འབུལ་མི་དགོས་པའི་ཞུ་བསྐུལ་དེ་རིགས་ཕུལ་འབྱོར་བྱུང་མེད་སྐོར་གསུང་འདུག ནིའུ་ཛི་ལེན་ཌི་ཡུལ་གྱི་ལྗང་ཁུ་ཚོགས་པའི་ཕྱི་སྲིད་ལས་དོན་གྱི་མགྲིན་ཚབ་པ་ཀིཐ་ལོཀ་ཡིས་ལྕམ་ཀ་རྡིར་ཡུལ་ནང་ཕྱི་ཚེས་བཅུ་གཉིས་ནས་ཕྱི་ཚེས་བཅོ་ལྔ་བར་ཉིན་གསུམ་རིང་མང་ཚོགས་ལ་བཀའ་སློབ་གསུང་བཤད་དང་གྲོས་ཚོགས་ཀྱི་འཐུས་མི་རྣམས་དང་མཇལ་འཕྲད་གནང་རྒྱུའི་འཆར་གཞི་ཡོད་སྐོར་གསུང་འདུག མགྲིན་ཚབ་པ་སྐུ་ཞབས་ལོཀ་ཡིས་ལྕམ་ཀ་རྡིར་ལ་ལྦི་ས་ཐོངས་མཆན་ཐོབ་མ་དགོས་པའི་རྒྱུ་མཚན་གང་ཡང་ཡོད་པ་མ་རེད་ཅེས་དང་ཁོང་གི་མི་ཚེ་དེ་དཔེ་དེབ་བཞིན་ཁ་གསལ་རེད། ཁོང་ནི་འཚེ་མེད་ཞི་བའི་ཐོག་འཐབ་རྩོད་གནང་མཁན་ཞིག་དང་འཚེ་བའི་ལས་བྱེད་མཁན་དང་འབྲེལ་བ་གནང་མཁན་ཞིག་མ་རེད་ཅེས་གསུང་འདུག ཡང་ཁོང་གིས་གལ་སྲིད་ལྕམ་ར་སྦི་ཡ་ཀ་རྡིར་ལ་གཞུང་ཕྱོགས་ནས་ཐོངས་མཆན་ལྦི་ས་མ་གནང་བ་ཡིན་ན་ནིའུ་ཛི་ལེན་ཌི་མི་མང་གིས་དེར་ངོ་རྒོལ་ཤུགས་ཆེན་པོ་བྱེད་ཀྱི་རེད་ཅེས་གསུང་འདུག རྒྱ་ནག་པེ་ཅིང་གཞུང་གིས་ལྕམ་ར་སྦི་ཡ་ཀ་རྡིར་འཛམ་གླིང་ཡུ་གུར་ལྷན་ཚོགས་ཞེས་པའི་ཚོགས་པ་དེའི་འགོ་འཁྲིད་ཡིན་པ་དང་ཁོང་འདི་ལོ་ཕྱི་ཟླ་བདུན་པའི་ནང་ཤིན་ཅང་ནང་ངོ་རྒོལ་གྱི་ལས་འགུལ་ཤུགས་ཆེ་བྱུང་བ་དེའི་བྱེད་གཏེ་དེ་ཡིན་སྐོར་བཤད་ཀྱི་ཡོད་ཀྱང་ད་བར་ཁུངས་བསྐྱེལ་དཔར་རྟགས་གང་ཡང་བཏོན་རྒྱུ་མེད་པ་རེད། ལྕམ་ཀ་རྡིར་དེ་སྔོན་ཕྱི་ཟླ་བརྒྱད་པའི་ནང་ཨོ་སོ་ཀྲོ་ལི་ཡ་ནང་གདན་འདྲེན་ཞུས་པ་དེར་རྒྱ་གཞུང་གིས་དེར་འགོག་ཐབས་བྱས་ཀྱང་ལམ་ལྷོང་བྱུང་མེད་པ་རེད། ཡང་དེ་རྗེས་ཁོང་ཐེ་ལྦན་ནང་གདན་འདྲེན་ཞུས་པ་དེར་རྒྱ་གཞུང་གིས་གནོན་ཤུགས་འོག་ཁོང་ཐེ་ལྦན་དུ་བསྐྱོད་རྒྱུར་ཐོངས་མཆན་ལྦི་ས་ཕུལ་མེད་པ་རེད།