༸གོང་ས་མཆོག་རིང་མིན་ཧོའོ་ལེནདྲ་ནང་ཆིབས་བསྒྱུར།

༄༅༎བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རིང་མིན་ཧོའོ་ལེནདྲ་ཡུལ་གྲུའི་ནང་ཆིབས་བསྒྱུར་སྐབས་ཡུལ་དེའི་ཕྱི་སྲིད་བློན་ཆེན་མེཀ་སིམ་ལྦར་ཧེ་གེན་ཡིས་བོད་ཀྱི་དབུ་ཁྲིད་ཡིན་པའི་ངོ་བོའི་ཐོག་ནས་ཕེབས་བསུ་ཞུ་རྒྱུ་མིན་པ་དང་ཆོས་ཕྱོགས་ཀྱི་དབུ་ཁྲིད་ཅིག་ཡིན་པའི་ངོ་བོ་ཐོག་ནས་ཕེབས་བསུ་ཞུ་རྒྱུ་ཡིན་ཞེས་གསུང་ཡོད་ཀྱང་གང་ལྟར་རྒྱ་ནག་གཞུང་གི་གནོན་ཤུགས་སྤྲོད་མིན་ལ་མ་ལྟོས་པར་༸གོང་ས་མཆོག་ལ་ཧོའོ་ལེནདྲ་གཞུང་གི་ངོས་ནས་ཕེབས་བསུ་ཞུ་རྒྱུའི་ཐག་གཅོད་གནང་ཡོད་པ་རེད།

བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་དྲུག་པའི་ཚེས་ལྔ་ཉིན་ཧོའོ་ལེནདྲ་དུ་ཆིབས་བསྒྱུར་བསྐྱང་རྒྱུ་ཡིན་པ་གཏན་འཁེལ་གསལ་བསྒྲགས་བྱས་ཟིན་པ་དང་གདན་ཞུ་ཕུལ་མཁན་ཧོའོ་ལེནདྲ་ནང་གི་རང་དབང་ཐེབས་རྩ་ཞེས་པ་ཡིན་ཞིང་ཡིན་ནའང་རྒྱ་ནག་ཕྱོགས་ནས་ཧོའོ་ལེནདྲ་གྲོས་ཚོགས་ལ་ཡི་གེ་བཏང་སྟེ་༸གོང་ས་མཆོག་ཧོའོ་ལེནདྲ་ནང་ཆིབས་བསྒྱུར་བསྐྱང་རྒྱུར་རྒྱལ་ཁབ་གཉིས་ཀྱི་འབྲེལ་བར་གནོད་སྐྱོན་འགྲོ་རྒྱུ་ཡིན་པའི་ཉེན་བརྡ་བཏང་བའི་རྗེས་གཟའ་འཁོར་སྔོན་མར་ཧོའོ་ལེནདྲ་གྱི་གྲོས་ཚོགས་འོག་མས་ཁོང་ཚོའི་རྒྱལ་ཁབ་ཀྱི་ངོས་ནས་རྒྱ་ནག་གཞུང་གི་ཉེན་བརྡར་མགོ་མ་སྒུར་བར་༸གོང་ས་༸སྐྱབས་མགོན་ཆེན་པོ་མཆོག་བོད་ཀྱི་དབུ་ཁྲིད་ཅིག་ཡིན་པའི་ངོ་བོའི་ཐོག་ནས་ཕེབས་བསུ་ཞུ་དགོས་ཞེས་འབོད་སྐུལ་ཞུས་ཡོད་པ་རེད།