བལ་བོད་ས་མཚམས་ཁུལ་དམ་བསྒྲགས་ཆེ་རུ་གཏོང་འཆར།

༄༅༎རྒྱ་ནག་གཞུང་ནས་རེ་འདུན་བཏོན་པ་ལྟར་བལ་ཡུལ་གྱི་ས་མཚམས་སུ་དམ་བསྒྲགས་ཤུགས་ཆེ་རུ་གཏོང་འཆར་ཡོད་པའི་གནས་ཚུལ་ཐོན་འདུག

དེ་ཡང་བལ་ཡུལ་གྱི་ནག་རིག་དྲེ་ལི་ཞེས་པའི་ཉིན་རེའི་གསར་ཤོག་ཅིག་ནང་གནས་ཚུལ་བཀོད་ཐོན་བྱུང་བར་གཞིགས་ན་རྒྱ་ནག་གཞུང་ནས་བལ་བོད་ས་མཚམས་སུ་བོད་མི་སྐྱབས་བཅོལ་བ་འགྲུལ་ཞུད་བྱེད་རྒྱུ་དང་ཁྲིམས་འགལ་གྱི་བྱ་སྤྱོད་སྤེལ་རྒྱུར་འགོག་ཐབས་སུ་བལ་ཡུལ་གཞུང་ལ་འབོད་སྐུལ་ཞུས་པ་བཞིན་བལ་ཡུལ་བདེ་སྲུང་ལས་ཁུངས་ནས་ཏ་ཏོ་པ་ནི་དང་གློ་སྨོན་ཐང༌།དཀྱིལ་མ་ཐང་ཀ་དེ་བཞིན་ལི་མི་སོགས་གནད་འགག་ཅན་གྱི་ས་མཚམས་ས་ཁུལ་ཁག་ཅིག་ཏུ་ས་སྲུང་དམག་མི་ཆེད་འཛུགས་བྱེད་འཆར་ཡོད་འདུག

ཡང་གོང་ཞུས་གནས་ཚུལ་ནང་མུ་མཐུད་བཀོད་པར་ལྟར་ན་རྩ་བའི་རྒྱ་གར་དང་བལ་ཡུལ་ས་མཚམས་འགའ་ཤས་སུ་དམིགས་བསལ་ཉེན་རྟོག་དམག་མི་འགྲེམས་འཇོག་བྱས་ཡོད་ཀྱང་ད་བར་བལ་བོད་ས་མཚམས་སུ་ས་སྲུང་དམག་མི་ཆེད་འཛུགས་བྱེད་རྒྱུ་ད་རེས་ཐོག་མ་དེ་ཡང་ཆགས་ཀྱི་ཡོད་པ་རེད་ལ་ས་སྲུང་དམག་མི་དེ་དག་ཀྱང་གཞུང་ནས་དམིགས་བསལ་ས་མཚམས་སྲུང་སྐྱོབ་ཆེད་བཀོད་བསྒྲིགས་བྱེད་པ་ཞིག་ཡིན་འདུག

སྔ་ལོ་བོད་ནང་དོན་རྐྱེན་བྱུང་བའི་རྗེས་སུ་བལ་ཡུལ་ནང་བོད་མི་ཚོས་ངོ་རྒོལ་གྱི་ལས་འགུལ་བསྟུད་མར་སྤེལ་བར་བརྟེན་རྒྱ་ནག་གཞུང་ནས་བལ་ཡུལ་གཞུང་ལ་བོད་མི་ཚོའི་ཐོག་དམ་བསྒྲགས་ཇེ་ཤུགས་ཆེ་རུ་གཏོང་དགོས་པའི་གནོན་ཤུགས་སྤྲད་བཞིན་ཡོད་པ་རེད།