བལ་ཡུལ་སྲིད་བློན་གསར་པས་དཔོན་རིགས་ཁག་མཇལ་འཕྲད།

༄༅༎བལ་ཡུལ་གྱི་སྲིད་བློན་གསར་པ་སྐུ་ཞབས་སྦ་སྦུ་རམ་བ་ཏ་རའེ་མཆོག་གིས། རྒྱལ་ཁབ་ཀྱི་ཞི་བདེ་བརྟན་ལྷིངས་དང་རྩ་ཁྲིམས་གསར་བཟོའི་ལས་དོན་མདུན་བསྐྱོད་བྱེད་ཕྱོགས་ཐད། ཕྱི་ལོ་ ༡༩༩༠ ཐམ་པའི་ལོར་བལ་ཡུལ་ནང་མང་གཙོ་སླར་གསོ་བྱུང་རྗེས་རྒྱལ་ཁབ་ཀྱི་སྲིད་བློན་གནང་མཁན་ཆབ་སྲིད་མི་སྣ་ཚོ་དང་དྭོགས་འདྲི་བཀའ་བསྡུར་ཞུ་བཞིན་ཡོད་པ་ བལ་ཡུལ་གྱི་ཧི་མ་ལ་ཡན་དུས་བབས་གསར་ཤོག་གིས་གནས་ཚུལ་སྤེལ་འདུག

སྐུ་ཞབས་བ་ཏ་རའེ་མཆོག་གིས་ཁོང་གི་གཟིམས་ཁང་དུ། བལ་ཡུལ་གྱི་ CPN-UML དམར་ཤོག་ཚོགས་པའི་འགོ་འཁྲིད་སྟེ་འདིའི་གོང་གི་བལ་ཡུལ་གྱི་སྲིད་བློན་གནང་མཁན། མ་རྡལྦ་ཀུ་མར་ནེ་པལ་དང་མཇལ་འཕྲད་གནང་སྟེ། ཞི་བདེའི་ལས་དོན་དང་ད་ལྟའི་རྩ་ཁྲིམས་གསར་བཟོའི་གྲོས་ཚོགས་ཀྱི་དུས་ཡུན་མ་རྫོགས་གོང་རྩ་ཁྲིམས་ཀྱི་ཟིན་བྲིས་གཏན་འབེབས་འབྱུང་ཐབས་སུ་ཚད་མཐོའི་ལས་དོན་ཚོགས་ཆུང་ཞིག་གསར་འཛུགས་གནང་ཕྱོགས་ཐད་བཀའ་བསྡུར་གནང་ཡོད་འདུག

གཟའ་ཉི་མའི་ཉིན་སྲིད་བློན་བ་ཏ་རའེ་མཆོག་གིས། ནེ་པལ་ཀོང་རེསི་ཚོགས་པའི་དབུ་འཁྲིད་ཤེར་སྦ་ཧ་རྡུར་རྡེའུ་སྦ་དང་མཇལ་འཕྲད་གནང་རྒྱུ་ཡིན་འདུག་ལ། དེ་བཞིན་དེ་སྔོན་གྱི་སྲིད་བློན་སུར་ཡ་སྦ་རྡུར་ཐ་པ་དང་། ལོ་ཀེན་རྡར་སྦ་རྡུར་ཅན་རྡ་སོགས་དང་མཇལ་འཕྲད་གནང་རྒྱུ་ཡིན་འདུག།

སྐུ་ཞབས་སྦ་བུ་རམ་བ་ཏ་རའེ་ལ་གཟའ་མིག་དམར་ཉིན་བལ་ཡུལ་གྱི་སྲིད་བློན་དུ་གྲོས་ཚོགས་ནས་བསྐོ་འདེམས་བྱུང་ཞིང་། ཁོང་ནི་མའོའི་དམར་ཤོག་ཚོགས་པའི་ཚོགས་མི་རྒན་གྲས་མཐོ་ཤོས་ཨང་གཉིས་པ་དེ་ཡིན་པ་རེད། འོན་ཀྱང་ཁོང་མའོའི་དམར་ཤོག་ཚོགས་པའི་འགོ་འཁྲིད་གཞན་དང་མི་འདྲ་བར་རྒྱལ་ཁབ་ཀྱི་ལས་དོན་འགྲུབ་རྒྱུར་སྲིད་དོན་ཤོག་ཁག་གཞན་དང་མཉམ་འབྲེལ་གནང་ཐུབ་མཁན་ཞིག་ཡིན་པར་མང་པོས་ངོས་འཛིན་ཞུ་བཞིན་ཡོད་པ་རེད།

བལ་ཡུལ་གཞུང་དང་མའོའི་གྱེན་ལོག་ཤོག་ཁག་དབར་གྱི་ནང་འཁྲུགས་དེ། ཕྱི་ལོ་ ༢༠༠༦ ལོར་མཇུག་བསྒྲིལ་ཞིང་མཉམ་འབྲེལ་རྒྱལ་ཚོགས་དང་ཐོུང་དུ་བཞག་པའི་ཆིངས་དོན་དེའི་ནང་། དེ་སྔའི་གྱེན་ལོག་ཡུལ་དམག་ཁྲི་ཚོ་འགའ་ཤས་ཡོད་པ་དེ་དག་གི་མདུན་ལམ་འཚོལ་དགོས་པ་འཁོད་ཡོད་ཀྱང་། ཡུལ་དམག་དེ་དག་མང་ཆེ་བ་ད་དུང་ཡང་བལ་ཡུལ་གྱི་ས་གནས་འདྲ་མིན་ནང་གི་སྡོད་སྒར་ཁག་ནང་གནས་སྡོད་བྱེད་བཞིན་ཡོད་པ་རེད། བལ་ཡུལ་གྱི་མའོའི་དམར་ཤོག་ཚོགས་པས་ཡུལ་དམག་དེ་དག་བལ་ཡུལ་རྒྱལ་ཁབ་ཀྱི་དམག་ཁོངས་སུ་འཇུག་དགོས་པ་བརྗོད་བཞིན་ཡོད་ཀྱང་། དེར་སྲིད་དོན་ཚོགས་པ་གཞན་དང་བལ་ཡུལ་གྱི་དྲག་པོའི་དཔོན་རིགས་ཚོས་དེར་མོས་མཐུན་བྱེད་ཀྱི་མེད་པ་རེད།།