བལ་ཡུལ་་སྲིད་བློན་གྱིས་དུས་བབ་སྐོར་ལ་གསུང་གླེང༌།

༄༅༎བལ་ཡུལ་གྱི་སྲིད་བློན་སྦ་སྦུ་རམ་བ་ཏ་རའེ་མཆོག་ནས་བལ་ཡུལ་ནང་རྩ་ཁྲིམས་ཟིན་བྲིས་དང་ཞི་འགྲིག་གི་ལས་དོན་ལ་མདུན་སྐྱོད་མ་བྱུང་ཚེ་ ཁོང་སྲིད་བློན་གྱི་ལས་ཁུར་ནས་ལམ་སེང་དགོངས་ཞུ་གནང་རྒྱུ་ཡིན་སྐོར་གསུངས་པའི་གནས་ཚུལ་ཐོན་འདུག་༎

སྲིད་བློན་བ་ཏ་རའེ་མཆོག་རིང་མིན་ཨ་རིའི་གྲོང་ཁྱེར་ནིའུ་ཡོག་ཏུ་སྐོང་ཚོགས་གནང་རྒྱུའི་མཉམ་སྦྲེལ་རྒྱལ་ཚོགས་ཀྱི་འཐུས་མི་ཚོགས་ཆེན་ཐེངས་༦༥པར་ཚོགས་བཅར་ཞུ་རྒྱུའི་གྲ་སྒྲིག་གནང་བཞིན་ཡོད་པ་རེད་ ཁ་ས་ཚེས་༡༤ཉིན་སྲིད་བློན་གྱི་ལས་ཁུངས་ནང་གསར་འགོད་པའི་འདྲི་བར་ལན་འདེབས་གནང་པའི་སྐབས་ སྲིད་བློན་བ་ཏ་རའེ་མཆོག་གིས་ཁོང་མཉམ་སྦྲེལ་རྒྱལ་ཚོགས་ཀྱི་མཐུས་མི་ཚོགས་ཆེན་དུ་ཕེབས་ཐོན་མ་གནང་གོང་བལ་ཡུལ་ནང་ད་ལྟ་འགྲོ་བཞིན་པའི་ཞི་འགྲིག་གི་ལས་དོན་དེར་མདུན་སྐྱོད་ཆེན་པོ་འགྲོ་རྒྱུ་ཡིན་སྐོར་ཞེས་ཡིད་ཆེས་ཆེན་པོའི་ཐོག་ནས་གསལ་འདོན་གནང་འདུག་པ་དང་ ཆབས་ཅིག་གལ་སྲིད་ཁོང་གིས་སྲིད་བློན་ལས་དུས་རིང་བལ་ཡུལ་ནང་ཞི་འགྲིག་གི་ལས་དོན་དང་རྩ་ཁྲིམས་ཟིན་བྲིས་ཀྱི་ལས་དོན་གཉིས་ལ་མདུན་སྐྱོད་ཆེན་པོ་མ་བྱུང་ཚེ་ ཁོང་སྲིད་བློན་གྱི་ལས་ཁུར་ནས་དགོངས་ཞུ་གནང་རྒྱུའི་གྲ་སྒྲིག་ཡོད་ཅེས་འགྲེལ་བརྗོད་གནང་བཞག་ ཡང་ད་རེས་གསར་འགོད་པ་ལྷན་དང་མཇལ་འཕྲད་འདིའི་སྐབས་ སྲིད་བློན་མཆོག་གིས་དེ་སྔོན་ལོ་ངོ་བཅུ་གྲངས་རིང་བལ་ཡུལ་ནང་མའོ་གྱེན་ལངས་སྒྲིག་འཛུགས་དང་བལ་ཡུལ་གཞུང་དབར་དྲག་པོའི་འཐབ་རྩོད་སྐབས་མའོ་ལྟ་སྤྱོད་འཛིན་པའི་ཆབ་སྲིད་ཤོག་ཁག་ནས་སྤྱི་དང་སྒེར་པའི་ས་ཁང་བཙན་འཕྲོག་བྱས་པ་རྣམས་གང་མགྱོགས་དོ་བདག་སོ་སོར་ཕྱིར་སློག་བརྩིས་སྤྲོད་བྱ་རྒྱུ་དང་ དེའི་ཐད་ སྲིད་བློན་མཆོག་ནས་རྗོང་སྡེ་ལས་ཁུངས་ཁག་ལ་ས་ཁང་ཕྱིར་སྤྲོད་ཀྱི་བརྒྱུད་རིམ་ལམ་སེང་འགོ་འཛུགས་བྱ་དགོས་པའི་བཀའ་ཁྱབ་ཡང་བཏང་ཟིན་ཡོད་ལུགས་གསལ་འདོན་བྱས་འདུག་༎