རྒྱལ་སྤྱིའི་ཉེས་ཡངས་ཚོགས་པས་འབར་མའི་གཞུང་ལ་རེ་འདུན།

༄༅༎རྒྱལ་སྤྱིའི་ཉེས་ཡངས་ཚོགས་པ་ནས་འབར་མའི་དྲག་པོའི་གཞུང་གིས་ལོ་འདིའི་ནང་རྒྱལ་ཡོངས་འོས་བསྡུ་མ་གཉེར་གོང་གྲངས་ཉུང་མི་རིགས་ཚོའི་ཐོག་དྲག་གནོན་བྱེད་པའི་ལས་དོན་མཚམས་འཇོག་དགོས་རྒྱུའི་དགོས་འདུན་བཏོན་འདུག།

དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱེད་པའི་རྒྱལ་སྤྱིའི་ཉེས་ཡངས་ཚོགས་པས་འབར་མའི་དྲག་པོའི་གཞུང་གིས་གཞུང་ལ་ངོ་རྒོལ་བྱེད་མཁན་འགོག་ཐབས་སུ་གྲངས་ཉུང་མི་རིགས་ཀྱི་ཐོབ་ཐང་འཐབ་རྩོད་པ་ཉེས་མེད་འཛིན་བཟུང་དང་བཙོན་འཇུག་བྱས་པ་དང་གདུག་རྩུབ་མནར་གཅོད་དང་དམར་བསད་བཏང་པ་སོགས་ཀྱི་བྱ་སྤྱོད་སྤེལ་བཞིན་ཡོད་པའི་སྙན་ཐོ་ཞིག་འདོན་སྤེལ་བྱས་ཡོད་པ་རེད།

སྙན་ཐོ་འདི་ནི་འདས་པའི་ལོ་གཉིས་ཀྱི་རིང་ཞིབ་འཇུག་བྱས་པའི་གྲུབ་ཐོ་ཞིག་ཡིན་པ་དང་ ཞིབ་འཇུག་པ་སྦེ་ཇ་མིན་ཛ་ལྦ་ཀིས་འབར་མའི་དྲག་པོའི་གཞུང་གིས་གྲངས་ཉུང་མི་རིགས་དང་དྲག་པོའི་གཞུང་ལ་ཁ་གཏད་བྱེད་མཁན་ཚོའི་ཐོག་དྲག་གནོན་བྱེད་བཞིན་པའི་བྱ་སྤྱོད་མཚམས་འཇོག་མ་བྱས་པར་ཕྱི་ལོ་༢༠༡༠ལོའི་རྒྱལ་ཡོངས་འོས་བསྡུ་འདི་ཁྲིམས་མཐུན་ཞིག་ཡོང་མི་སྲིད་པ་རེད་ལ་ འོན་ཀྱང་ཁོང་ཚོའི་ཐོག་དྲག་གནོན་གྱི་བྱ་སྤྱོད་ད་དུང་ཇེ་ཆེར་འགྲོ་སྲིད་རྒྱུར་ང་ཚོར་སེམས་ཚབས་ཆེན་པོ་ཡོད་ཅེས་གསུངས་འདུག།

འབར་མའི་ཤར་ཕྱོགས་ཀྱི་ས་མཚམས་ཁུལ་གནས་པའི་གྲངས་ཉུང་མི་རིགས་ཁག་གཅིག་གིས་འབར་མའི་གཞུང་ལ་ལོ་མང་རིགས་དྲག་པོའི་འཐབ་རྒོལ་བྱེད་བཞིན་ཡོད་པ་རེད།

དྲག་པོའི་གཞུང་གི་འགོ་འཁྲིད་ཚོས་ཕྱི་ལོ་༢༠༡༠ལོར་རྒྱལ་ཡོངས་འོས་བསྡུ་གཉེར་རྒྱུའི་གསལ་བསྒྲགས་བྱས་ཡོད་ན་ཡང་དུས་ཚོད་ད་དུང་ཡང་གཏན་འབེབས་བྱས་མེད་ལ་ དྲག་པོའི་གཞུང་གི་ཁ་གཏད་གཙོ་བོ་འབར་མའི་མང་གཙོའི་ལས་འགུལ་གྱི་དབུ་འཁྲིད་ནོ་བེལ་ཞི་བདེའི་བྱ་དགའ་བཞེས་མཁན་ལྕམ་ཨང་སང་སུ་ཅི་གཙོས་གཞུང་ལ་ངོ་རྒོལ་བྱེད་མཁན་གྱི་ལས་འགུལ་བ་མང་དག་ཅིག་ད་དུང་ཡང་བཙོན་ཁང་ནང་ཡོད་མུས་ཡིན་པ་རེད།