འབར་མའི་གཞུང་ནས་ཡུལ་ནང་མུ་མཐུད་དམ་བསྒྲགས་བྱེད་པ།

༄༅༎འབར་མའི་དྲག་པོའི་གཞུང་གིས་ཡུལ་ནང་མང་གཙོའི་ལམ་ལུགས་སྤེལ་རྒྱུ་ཡིན་ལུགས་ཕྱི་བསྒྲགས་བྱེད་བཞིན་པ་དང་ཆབས་ཅིག་ཏུ་མང་གཙོའི་ལས་དོན་སྤེལ་མཁན་མི་སྣ་ཚོའི་ཐོག་དམ་བསྒྲགས་བྱེད་བཞིན་ཡོད་པ་རེད་ཅེས་མང་གཙོ་ལས་འགུལ་ཚོགས་པའི་མགྲིན་ཚབ་པས་བརྗོད་འདུག

འབར་མའི་རྒྱལ་ཡོངས་མང་གཙོ་ལས་འགུལ་ཚོགས་པའི་མགྲིན་ཚབ་པ་ནིཡེན་ལྦིན་ཡིས་དེ་རིང་རེས་གཟའ་ལྷག་པའི་ཉིན་གསལ་བསྒྲགས་གནང་བར་གཞིགས་ན་ཕྱི་ལོ་༢༠༡༠ལོའི་ནང་འབར་མའི་རྒྱལ་ཡོངས་འོས་བསྡུའི་ཕྱི་བསྒྲགས་དང་སྦྲགས་འབར་མའི་དྲག་པོའི་གཞུང་གིས་ཡུལ་ནང་མང་གཙོའི་ལམ་ལུགས་སྤེལ་རྒྱུ་ཡིན་པ་རྒྱལ་སྤྱིའི་ནང་ཕྱི་བསྒྲགས་བྱེད་བཞིན་ཡོད་རུང་དོན་དངོས་སུ་འབར་མའི་ནང་མང་གཙོའི་ལས་འགུལ་སྤེལ་མཁན་ཚོའི་ཐོག་དྲག་གནོན་ཤུགས་ཆེ་བྱེད་བཞིན་ཡོད་པ་རེད་བརྗོད་ཡོད་པ་རེད་ ཡང་ཁོང་གིས་མུ་མཐུད་གསུང་ན་ན་ནིང་ཕྱི་ཟླ་དགུ་པ་ནས་བཟུང་འབར་མའི་ནང་མང་གཙོའི་ལས་འགུལ་སྤེལ་མཁན་མང་པོ་ཞིག་དྲག་པོའི་གཞུང་གིས་འཛིན་བཟུང་བཀག་ཉར་བྱས་ཡོད་པ་ནས་ཉུང་ཐར་མི་གྲངས་གསུམ་བཅུ་ཙམ་བདུན་ཕྲག་འདིའི་རེས་གཟའ་ཟླ་བའི་ཉིན་ཁྲིམས་ཐག་བཅད་པའི་སྐབས་བཙོན་འཇུག་ལོ་ཚད་གཉིས་དང་ཕྱེད་ཀ་ཙམ་བཟོས་ཡོད་པ་རེད་ དེའི་ནང་ནས་མང་ཆེ་བ་རྒྱལ་ཁབ་ནང་མང་གཙོའི་ལས་འགུལ་སྤེལ་མཁན་དང་འབར་མའི་དྲག་པོའི་གཞུང་གི་སྲིད་བྱུས་ལ་ཐད་ཀར་ངོ་རྒོལ་གནང་མཁན་གྱི་མི་སྣ་ཤ་ཏག་ཡིན་པས་དྲག་པོའི་གཞུང་ནས་ཁོང་ཚོས་རྒྱལ་ཁབ་བརྟན་ལྷིང་མེད་པའི་བྱ་སྤྱོད་སྤེལ་གྱི་ཡོད་པར་ཉེས་བཙུགས་བྱས་ནས་ལོ་གཉིས་དང་ཕྱེད་ཀ་བཙོན་འཇུག་བྱས་ཡོད་པ་རེད་ཅེས་དང་ལྷག་པར་དུ་འབར་མའི་མང་གཙོ་ཚོགས་པའི་དབུ་ཁྲིད་ལྕམ་ཨོང་སན་སུ་ཅི་མཆོག་ཀྱང་འདས་པའི་ལོ་བཅུ་དགུའི་ནང་ནས་ལོ་བཅུ་གཉིས་རིང་བཟང་བཙོན་འོག་ཏུ་མུ་མཐུད་འཇུག་མུས་རེད་ཅེས་བརྗོད་ཡོད་པ་རེད།