བོད་དུ་ས་ཞིང་འདེབས་ལས་ལ་བསྒྱུར་བཅོས་བྱུང་ཚུལ།

༄༅༎དེང་རབས་ཅན་གྱི་ས་ཞིང་འདེབས་ལས་ཀྱི་ཡོ་ཆས་བོད་ཀྱི་གྲོང་གསེབ་ས་ཁུལ་དུ་མཁོ་འདོན་བྱས་པ་དེ་ཡིས་ས་གནས་ཞིང་པ་ཚོའི་སོ་ནམ་འདེབས་ལས་ལ་བསྒྱུར་བཅོས་ཆེན་པོ་བྱུང་བར་ངོས་འཛིན་བྱེད་ཀྱི་ཡོད་པའི་སྐོར་དེ་རིང་རྒྱ་ནག་གཞུང་གི་ཤིང་ཧྰ་གསར་ཤོག་ཐོག་གནས་ཚུལ་སྤེལ་ཡོད་པ་རེད།
ཤིང་ཧྰ་གསར་ཤོག་དེའི་ཐོག་གནས་ཚུལ་བཀོད་པར་གཞིགས་ན། བོད་ཀྱི་གཞིས་རྩེ་གྲོང་ཁྱེར་གྱི་པ་སྣམ་གྲོང་ཚོའི་ཞིང་པ་པདྨ་དོན་གྲུབ་ཀྱིས། ཞིང་པའི་སོ་ནམ་འདེབས་ལས་ཀྱི་ཡོ་ཆས། ས་སློག་རྒྱབ་མཁན་གྱི་འཕྲུལ་ཆས། སོན་རྩ་འདེབས་ལས་ཀྱི་འཕྲུལ་ཆས་སོགས་ལག་ཆ་རྣམས་དེང་དུས་ཅན་གྱི་ཡོ་ཆས་གསར་པར་བསྒྱུར་བཅོས་བྱུང་བ་དེ་ཡིས། བོད་རིགས་ཞིང་པ་ཚོའི་ས་ཞིང་ལག་པས་འདེབས་ལས་བྱེད་མི་དགོས་པ་མ་ཟད། ས་ཞིང་རྨོ་རྒྱབ་པར་དུས་རྒྱུན་གཟའ་འཁོར་དྲུག་འགོར་གཞི་ཡོད་པ་ནས་ཉིན་གྲངས་༡༢ ནང་རྒྱབ་ཐུབ་པ་སོགས་རྨོས་རྒྱབ་པའི་དུས་ཚོད་ཀྱང་ཐུང་དུ་ཕྱིན་ཏེ་ཞིང་པ་ཚོའི་སོ་ནམ་འདེབས་ལས་ལ་སྟབས་བདེ་རུ་ཕྱིན་ཡོད་ཚུལ་དང༌། ད་དུང་སོ་ནམ་འདེབས་ལས་ཀྱི་འཕྲུལ་ཆས་དེ་རྣམས་ནི། ས་ཞིང་རྨོ་རྒྱབ་པའི་སྐབས་དང༌། སོན་འདེབས་པའི་དུས། སྟོན་ཐོག་རྔ་བའི་དུས་ཚོད་སོ་སོར་གཞུང་གིས་ཞིང་པར་རིན་འབབ་ལེན་ཏེ་གཡར་པོ་གཏོང་གི་ཡོད་པ་ཡིན་ཞིང༌། འོན་ཀྱང་གཞུང་གིས་འཕྲུལ་ཆས་གཡར་བའི་རིན་འབབ་ནས་བརྒྱ་ཆ་དྲུག་ཅུ་ཆག་ཡང་གཏོང་གི་ཡོད་ཚུལ་འགྲེལ་བརྗོད་བྱས་པ་ལུགས་འདྲེན་བྱས་ཡོད་པ་རེད།