བོད་ཀྱི་གནད་དོན་སེལ་ཐབས་མུ་མཐུད་མཐུན་འགྱུར་གནང་འཆར།

༄༅༎རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཀྱི་ལྷན་ཚོགས་ཐེངས་ལྔ་པའི་ཐོག་ནས་བོད་ཀྱི་གནད་དོན་སེལ་ཐབས་སུ་མུ་མཐུད་ནས་མཐུན་འགྱུར་གནང་རྒྱུའི་གྲོས་མཐུན་བྱུང་ཡོད་འདུག

དེ་ཡང་ཨི་དྲ་ལིའི་རྒྱལ་ས་རོམ་ནང་བསྐོངས་ཚོགས་གནང་བའི་རྒྱལ་སྤྱིའི་ནང་གི་བོད་དོན་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མིའི་ལྷན་ཚོགས་དེའི་ཐོག་ཨི་དྲ་ལིས་གཙོས་ཡུལ་གྲུ་གང་ས་ནས་བོད་དོན་ཐོག་རྒྱབ་སྐྱོར་གནང་མཁན་གྱི་འཐུས་མི་ཚོ་དང་བོད་མི་མང་སྤྱི་འཐུས་ཁག་ཅིག་གཞན་ཡང་བོད་དོན་རྒྱབ་སྐྱོར་གནང་མཁན་གྱི་ཚོགས་མིའི་གནད་ཡོད་མི་སྣ་སོགས་ལྷན་ཚོགས་གནང་བའི་སྐབས་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས། བོད་མི་ཚོ་གནས་སྟངས་ཉག་ཕྲ་བའི་སྐབས་འདིར་འཛམ་གླིང་ཁྱོན་ཡོངས་ནས་གདུང་སེམས་མཉམ་སྐྱེད་ཀྱིས་ད་བར་མཐུན་འགྱུར་ཧ་ཅང་ཟབ་མོ་གནང་བས་མ་ཟད་བོད་ཀྱི་དཀའ་རྙོག་སེལ་ཐབས་སུ་ཚང་མས་ཐབས་ལམ་གང་དགའ་ཅི་ལེགས་ཀྱིས་གྲོས་བསྡུར་གནང་བ་བཅས་ལ་ཐུགས་རྗེ་ཆེ་ཞུ་གི་ཡིན་ཞེས་བཀའ་གནང་འདུག ད་རེས་ཨི་དྲ་ལིའི་ལྷོ་ཀྲེ་རོལ་ཁུལ་ཕེབས་པའི་སྐབས་མངའ་ཁུལ་འདི་ནི་ཨི་དྲ་ལིའི་ཁོངས་གཏོགས་གནས་པ་གང་ཞིག་ལ་རང་སྲིད་རང་སྐྱོང་གི་གནས་བབས་ཆ་ཚང་ཡོད་པ་ཞིག་འདུག། དེ་ལྟར་རྒྱ་ནག་གི་ངོས་ནས་ཀྱང་རྩ་ཁྲིམས་གཞིར་བཟུང་རང་དབང་ཚད་དང་ལྡན་པ་ཞིག་སྤྲད་པ་ཡིན་ན་གནས་སྟངས་རང་བཞིན་གྱི་བཟང་དུ་འགྲོ་གི་རེད་ཅེས་གསུངས་གནང་ཡོད་འདུག

ཡང་ཨི་དྲ་ལིའི་གྲོས་ཚོགས་ཀྱི་བོད་དོན་རྒྱབ་སྐྱོར་གནང་མཁན་ཚོས་ཀྱང་དེ་སྔ་ནང་བཞིན་བོད་ཀྱི་གནད་དོན་ཐོག་ཐུགས་འཁུར་དང་རྒྱབ་སྐྱོར་ཆ་ཚང་གནང་རྒྱུ་ཡིན་ལུགས་འགྲེལ་བརྗོད་གནང་ཡོད་པ་བཅས་ལྷན་ཚོགས་འདིའི་ཐོག་ནས་མུ་མཐུད་ནས་བོད་རྒྱའི་དབར་གྲོས་མོལ་ཡོང་ཐབས་དང་བོད་ཀྱི་དངོས་ཡོད་གནས་སྟངས་རྟོག་ཞིབ་གནང་རྒྱུ་བཅས་ཀྱི་གྲོས་མཐུན་བྱུང་ཡོད་འདུག