ཨ་རིའི་ས་གནས་༢༤ཙམ་དུ་གསུམ་བཅུའི་དུས་དྲན་སྲུང་བརྩི།

༄༅༎གྲོང་ཁྱེར་ནིའུ་ཡོག་ནང་ཡོད་པའི་བྱང་ཨ་རིའི་སྐུ་ཚབ་དོན་གཅོད་ཁང་ནས་བཏང་གནང་བའི་གནས་ཚུལ་ནང༌། ད་ལོའི་གསུམ་བཅུའི་དུས་དྲན་ཐེངས་༥༣ཉིན་ བྱང་ཨ་རིའི་ས་གནས་ཁག་༢༤ཙམ་ནང་གནས་སྡོད་གནང་མཁན་བོད་མི་ཚོས་ རང་རང་གནས་ཡུལ་ས་གནས་སུ་བརྗེད་པར་དཀའ་བའི་གལ་ཆེའི་ལོ་རྒྱུས་ཀྱི་ཉི་མོ་དེར་དྲན་གསོའི་ཆེད་འདུ་འཛོམས་ཀྱིས་ལས་འགུལ་གཞི་རྒྱ་ཆེ་ཆུང་སྣ་ཚོགས་ཤིག་སྤེལ་གནང་འདུག།
གཙོ་བོ་ཨ་རིའི་གྲོང་ཁྱེར་ནིའུ་ཡོག་ནང་ཡོད་པའི་གཞུང་འབྲེལ་མིན་པའི་ཚོགས་པ་ཁག་ཐུན་མོང་ནས་ ཕྱི་ཟླ་༣ཚེས་༡༠ཉིན་འཛམ་གླིང་མཉམ་སྦྲེལ་རྒྱལ་ཚོགས་ཀྱི་མདུན་དུ་གསུམ་བཅུའི་དུས་དྲན་ཐེངས་༥༣པ་དྲན་གསོའི་མཛད་སྒོ་ཚུགས་གནང་ཡོད་པར། ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང༌། བྱང་ཨ་རིའི་སྤྱི་འཐུས་བཀྲིས་རྣམ་རྒྱལ་ལགས་ཀྱིས་དབུས་སེར་སྐྱང་མང་ཚོགས་དང༌། བོད་ལ་རྒྱབ་སྐྱོར་གནང་མཁན་ཕྱི་རྒྱལ་བ། མཉམ་སྦྲེལ་རྒྱལ་ཚོགས་མདུན་དུས་ཚོད་ངེས་མེད་བར་ཟས་བཅད་ངོ་རྒོལ་གནང་བཞིན་པའི་ལྷག་བསམ་ཅན་གྱི་བོད་མི་གསུམ་བཅས་ཁྱོན་མི་གྲངས་༣༠༠༠བརྒལ་བ་མཉམ་ཞུགས་གནང་ཡོད་པ་རེད།