རྒྱ་གར་རྒྱལ་ཡོངས་གྲོས་ཚོགས་ཀྱི་འོས་བསྡུ་སྐོར།

༄༅༎རྒྱ་གར་གྱི་གཞུང་འཛིན་ཀོང་རེ་སི་ཚོགས་པས་རྒྱལ་ཡོངས་གྲོས་ཚོགས་ཀྱི་འོས་བསྡུའི་ནང་རྒྱལ་ཁ་ཐོབ་ན་སྲིད་བློན་མན་མོ་ཧན་སིང་མཆོག་གིས་སྲིད་བློན་མུ་མཐུད་གནང་རྒྱུའི་གསལ་བསྒྲགས་གནང་ཡོད་པ་རེད།

ཀོང་རེ་སི་ཚོགས་པའི་ཚོགས་གཙོ་སོ་ནི་ཡ་གན་རྡི་མཆོག་གིས་ཚོགས་པའི་འོས་བསྡུའི་བསྒྲགས་གཏམ་དེ་ཕྱིར་བཏོན་གནང་སྐབས་གསར་འགོད་པར་རང་ཉིད་ཀྱི་སྲས་ར་ཧུལ་གན་རྡི་ཡིས་མན་མོ་ཧན་སིང་མཆོག་གི་ཚབ་གནང་རྒྱུའི་མཆལ་གཏམ་དེ་བདེན་པ་མིན་སྐོར་གསལ་བཤད་གནང་ཡོད་པ་རེད། དེའི་བར་མན་མོ་ཧན་སིང་མཆོག་གིས་རང་ཉིད་སྲིད་བློན་གནང་སྐབས་ཡུལ་གྱི་དཔལ་འབྱོར་དང་ཕྱི་སྲིད་ཐོག་གྲུབ་འབྲས་ཇི་སོན་ཁག་གསལ་བསྒྲགས་དང་འབྲེལ་ཕྱོགས་འགལ་ཚོགས་པ་གཙོ་བོ་སྦི་ཇེ་པི་ཡིས་ཡུལ་གྱི་ཧིན་རྡུ་དང་ཁ་ཆེའི་བར་འཁོན་འཁྲུགས་བསླང་རྒྱུའི་ལས་དོན་སྤེལ་གྱི་ཡོད་པའི་སྐྱོན་བརྗོད་གནང་འདུག ཁོང་གིས་ཉེ་ལམ་སྦི་ཇེ་པི་ཚོགས་པས་ཡུལ་གྱི་ཁ་ཆེའི་མི་སེར་ལ་སྡིགས་བསྐུལ་བྱེད་མཁན་ལྦ་རན་གན་རྡི་ལ་རྒྱབ་བསྐྱོར་བྱེད་བབས་དེས་ཚོགས་པ་དེས་ཡུལ་གྱི་མི་སེར་རྣམས་དུམ་བུར་གཏང་རྒྱུའི་འཆར་གཞི་ཡོད་སྐོར་སྐྱོན་བརྗོད་གནང་འདུག ཡང་ཁོང་གིས་དེ་སྔོན་སྦི་ཇེ་པི་ཚོགས་པའི་དབུ་འཁྲིད་ཨེལ་ཀེ་ཨརྡ་ལྦ་ནི་ཁ་ཆེའི་ལྷ་ཁང་ཞིག་གཏོང་བཤིག་བཏང་བའི་དོན་རྐྱེན་དེ་དང་ཡུལ་གྱི་ནུབ་ཕྱོགས་གུཇ་རཏ་མངའ་སྡེའི་ནང་ཁ་ཆེ་མང་པོ་ཞིག་ལ་སྲོག་སྐྱོན་བྱུང་བའི་དོན་རྐྱེན་ཐོག་འབྲེལ་བ་ཡོད་སྐོར་སྐྱོན་བརྗོད་གནང་ཡོད་པ་རེད། གནད་དོན་དབྱེ་ཞིབ་གནང་མཁན་རྣམས་ཀྱིས་ད་ཐེངས་ཀྱི་རྒྱ་གར་རྒྱལ་ཡོངས་ཀྱི་འོས་བསྡུ་དེར་ཚོགས་པའི་ཆེ་ཁག་ཀོང་རེ་སི་དང་སྦི་ཇེ་པི་ཚོགས་པ་གཉིས་ཀའི་དགེ་སྐྱོན་གང་ཞིག་གི་གནས་བབས་ཀྱིས་ཚོགས་པ་གཉིས་ཀར་རྒྱལ་ཁ་ཆེན་པོ་ཐོབ་དཀའ་བའི་ཚོད་དཔག་གནང་གི་ཡོད་པའི་གནས་ཚུལ་ཐོན་འདུག