ལྷ་སར་ཕྱེད་རྒྱང་ཐག་རིང་བའི་རྒྱུག་འགྲན་ཚུགས་འཆར།

༄༅༎འཛམ་གླིང་ཐོག་ས་མཐོའི་Half marathon འམ་ཕྱེད་རྒྱང་ཐག་རིང་བའི་རྒྱུག་ཤར་འགྲན་བསྡུར་ཐེངས་དྲུག་པ་དེ་བཞིན་ བོད་ཀྱི་རྒྱལ་ས་ལྷ་སའི་ནང་བྱ་རྒྱུ་ཡིན་པའི་སྐོར་གནས་ཚུལ་ཐོན་བཞག་༎

དེ་ཡང་ཁ་ས་ཚེས་༣༡ཉིན་རྒྱ་ནག་གིས་ཟེར་བའི་བོད་རང་སྐྱོང་ལྗོངས་ཀྱི་ལུས་རྩལ་ལས་ཁུངས་ཀྱི་འགན་འཛིན་དབྱང་ཀྲན་ཆི་ཡི་International half- marathon འམ་རྒྱལ་སྤྱིའི་ཕྱེད་ཐག་རིང་གི་རྒྱུག་ཤར་འགྲན་བསྡུར་ཐེངས་དྲུག་པ་དེ་བཞིན་ཟླ་བ་འདིའི་ཚེས་༡༠བོད་ཀྱི་རྒྱལ་ས་ལྷ་སའི་ནང་ཚུགས་རྒྱུ་ཡིན་པའི་སྐོར་གསལ་བསྒྲགས་བྱས་ཡོད་པ་རེད་ འགྲན་བསྡུར་གོ་སྒྲིག་ཞུ་མཁན་གོང་གསལ་བོད་རང་སྐྱོང་ལྗོངས་ཀྱི་ལུས་རྩལ་ལས་ཁུངས་ཀྱི་འགན་འཛིན་ནས་རྒྱལ་སྤྱིའི་ཕྱེད་ཐག་རིང་གི་རྒྱུག་ཤར་འགྲན་བསྡུར་དེ་བཞིན་ ༢༠༠༤ལོར་ཐོག་མར་འགོ་འཛུགས་བྱུང་པ་ཞིག་དང་ ད་རེས་འགྲན་བསྡུར་ཐེངས་དྲུག་པ་འདིའི་ཐོག་འཛམ་གླིང་གི་ཡུལ་གྲུ་གང་ས་ནས་ཐག་རིང་རྒྱུག་ཤར་འགྲན་བསྡུར་ནང་མཉམ་ཞུགས་བྱ་མཁན་མི་གྲངས་༥༠༠༠ལྷག་འབྱོར་རྒྱུའི་ཚོད་དཔག་གསལ་འདོན་བྱས་བཞག བོད་ཀྱི་རྒྱལ་ས་ལྷ་ས་དེ་བཞིན་རྒྱ་མཚོ་ནས་མཐོ་ཚད་མི་ཊར་༣༤༩༠གང་ཆགས་ཞིང་ འཛམ་གླིང་སྟེང་ས་མཐོའི་གྲོང་ཁྱེར་མཐོ་ཤོས་ཤིག་ཡིན་པ་རེད་ གྲོང་ཁྱེར་དེའི་ནང་ རྒྱལ་སྤྱིའི་ཕྱེད་ཐག་རིང་རྒྱུག་ཤར་འགྲན་བསྡུར་དེ་བཞིན་ ཕོ་བྲང་པོ་ཏ་ལ་ནས་འགོ་འཛུགས་ཀྱིས་ ནོར་བུ་གླིང་ཁ་དང་ བོད་ཀྱི་འགྲེམས་སྟོན་ཁང་ བོད་ཀྱི་གཙུག་ལག་སློབ་གྲ་ སེ་ར་དགོན་པ་དང་ལྷ་སའི་བར་སྐོར་བར་བཅས་བརྒྱུད་ མཐར་རྟ་རྒྱུག་ཐང་ཆེན་དུ་མཇུག་སྒྲིལ་རྒྱུ་ཡིན་པའི་སྐོར་གནས་ཚུལ་ནང་གསལ་འདུག་༎