ཚོགས་གཙོ་གཉིས་དང་ཚོགས་གཞོན་གཅིག་འདེམས་ཐོན་བྱུང་བ།

ཚོགས་གཞོན་ལ་བདམས་པ་ཨ་ཅཱརྱ་ཡེ་ཤེས་ཕུན་ཚོགས་ལགས། ༢༠༡༦།༥།༣༠

དེ་ཡང་སྤྱི་ལོ་༢༠༡༦་ཟླ་༥་ཚེས་༣༠་ཉིན་གང་དབུས་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་གིས་སྟངས་འཛིན་འོག་སྐབས་༡༦པའི་བོད་མི་མང་སྤྱི་འཐུས་རྣམ་པས། འོས་བསྡུ་ཐེངས་གསུམ་དང་བཞུགས་མོལ་ཚོགས་འདུ་ཚོུད་གཅིག་ལྷག་ཙམ་རིང་གནང་རྗེས། མཁན་པོ་བསོད་ནམས་བསྟན་འཕེལ་དང་པདྨ་འབྱུང་གནས་གཉིས་ལོ་གཉིས་དང་ཕྱེད་ཀ་རེ་མོས་ཀྱིས་ཚོགས་གཙོ་གནང་རྒྱུའི་སྤྱི་མོས་ཀྱི་གཏན་འབེབས་བྱུང་འདུག
བོད་མི་མང་སྤྱི་འཐུས་སྐབས་༡༦་པའི་ཚོགས་གཙོའི་ལས་ཡུན་ལས་ཆེས་ཐོག་མར་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ནས་༢༠༡༦་ལོའི་ཟླ་༥་ཚེས་༣༡་ནས་༢༠༡༨་ལོའི་ཟླ་༡༡་ཚེས་༣༠་བར་ལས་ཡུན་རིང་ཚོགས་གཙོའི་ཐུགས་འགན་བཞེས་དགོས་པ་དང་། དེ་རྗེས་སྤྱི་འཐུས་པདྨ་འབྱུང་གནས་ལགས་ནས་༢༠༡༨་ལོའི་ཟླ་༡༢་ཚེས་༡་ཉིན་ནས་༢༠༢༡་ལོའི་ཟླ་༥ ཚེས་༢༩་བར་བཅས་ཚོགས་གཙོའི་ཐུགས་འགན་བཞེས་དགོས་པའི་སྤྱི་མོས་ཐག་ཆོད་བྱུང་ཡོད་པ་རེད།
དེ་ནས་སྐབས་བཅུ་དྲུག་པའི་བོད་མི་མང་སྤྱི་འཐུས་ཚོགས་གཞོན་གྱི་སྔོན་འགྲོའི་འོས་བསྡུའི་ཁྲོད་ཨ་ཅཱརྱ་ཡེ་ཤེས་ཕུན་ཚོགས་ལགས་ལ་འོས་གྲངས་༢༥་དང་། སྒྲོལ་མ་ཚེ་རིང་ལགས་ལ་འོས་གྲངས་༢༢། འཇུ་ཆེན་དཀོན་མཆོག་ཆོས་སྒྲོན་ལགས་ལ་འོས་གྲངས་༡༧། ཐུབ་བསྟན་ལུང་རིགས་ལགས་ལ་འོས་གྲངས་༡༧་བཅས་ཐོབ་ཡོད་པ་དང་། ཨང་རིམ་གསུམ་པ་དང་བཞི་བར་ཡང་བསྐྱར་དུ་འོས་བླུགས་རྗེས་འཇུ་ཆེན་དཀོན་མཆོག་ཆོས་སྒྲོན་ལགས་ལ་འོས་གྲངས་༢༡ དང་། ཐུབ་བསྟན་ལུང་རིགས་ལགས་ལ་འོས་གྲངས་༢༣་ཐོབ། དངོས་གཞིའི་ནང་ཨ་ཅཱརྱ་ཡེ་ཤེས་ཕུན་ཚོགས་ལགས་ལ་འོས་གྲངས་༣༨་དང་། སྒྲོལ་མ་ཚེ་རིང་ལགས་ལ་འོས་གྲངས་༤། ཐུབ་བསྟན་ལུང་རིགས་ལགས་ལ་འོས་གྲངས་༢་བཅས་ཐོབ་སྟེ། ཨ་ཅཱརྱ་ཡེ་ཤེས་ཕུན་ཚོགས་ལགས་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་ཚོགས་གཞོན་དུ་མང་མོས་འོས་འདེམས་བྱུང་ཡོད་པ་རེད།
ཤེས་གསལ་ལྟར་ན། ཚེས་༣༡་ཉིན་སྤྱི་འཐུས་ཚོགས་གཙོ་བགྲེས་གཞོན་རྣམ་གཉིས་ཀྱིས་དམ་འབུལ་དང་། རིམ་པས་ཕྱི་ཟླ་དྲུག་པའི་ཚེས་༡་ཉིན་བཀའ་ཤག་སྐབས་བཅོ་ལྔ་པའི་བཀའ་བློན་རྣམ་པའི་མཚན་ཐོ་གྲོས་ཚོགས་སུ་སྙན་སེང་ཞུ་གི་ཡོད་འདུག།

གསར་འགོད་པ་ཀླུ་འབུམ།