སྐལ་བཟང་བསྟན་འཛིན་བཙོན་གྲོལ་ཐོབ་པར་ཕེབས་བསུ།

དཀར་མཛེས་ཕྱོགས་ཀྱི་ཆབ་སྲིད་བཙོན་པ་སྐལ་བཟང་བསྟན་འཛིན་ལགས་བཙོན་གྲོལ་ཐོབ་པར་ས་གནས་མང་ཚོགས་ཚོས་ཕེབས་བསུ་གཟབ་རྒྱས་བྱས་འདུག
འདི་ག་རླུང་འཕྲིན་ཁང་ལ་གནས་ཚུལ་འབྱོར་དོན། ཁམས་དཀར་མཛེས་ཁུལ་དཀར་མཛེས་རྫོང་ནས་ཡིན་པའི་སྐལ་བཟང་བསྟན་འཛིན་ལགས་ཀྱིས་སྤྱི་ལོ་༢༠༡༢ལོའི་སྤྱི་ཟླ་༧པའི་ཚེས་༤ ཉིན་དཀར་མཛེས་རྫོང་གི་ཁྲོམ་གཞུང་དུ་རྒྱ་ནག་སྲིད་གཞུང་ལ་ཞི་རྒོལ་དང་མཉམ་༧རྒྱལ་བ་ཡིད་བཞིན་ནོར་བུ་བོད་ལ་གདན་འདྲེན་ཞུ་དགོས། ང་ཚོ་བོད་ལ་རང་དབང་དགོས་ཞེས་འབོད་སྒྲ་བསྒྲགས་ནས་ངོ་རྒོལ་བྱེད་སྐབས་རྫོང་ཉེན་རྟོག་པས་གཅར་རྡུང་གཏོང་ཞོར་འཛིན་བཟུང་གིས་ལོ་གསུམ་གྱི་དུས་བཀག་ཁྲིམས་ཆད་བཅད་པ་དང་། ཟི་ཁྲོན་མེན་ཡཱང་བཙོན་ཁང་དུ་བཅུག་ཡོད་ཀྱང་། ད་ཆ་རྒྱ་ནག་སྲིད་གཞུང་གིས་མེན་ཡཱང་བཙོན་ཁང་དེར་བསྒྱུར་བཅོས་གཏོང་དགོས་པ་སོགས་ཀྱི་ཆབ་སྲིད་ཀྱི་འགྱུར་བའི་དབང་གིས་བཙོན་ཁང་དེའི་ནང་གི་བཙོན་པ་མང་པོ་ཞིག་གློད་གྲོལ་གཏོང་གི་ཡོད་པ་ལྟར། ཟླ་བ་འདིའི་ཚེས་༡༥་ཉིན་བོད་མི་ཆབ་སྲིད་བཙོན་པ་སྐལ་བཟང་བསྟན་འཛིན་ལགས་ཡང་བཙོན་དུས་མ་ཚང་ཡང་གློད་གྲོལ་བཏང་ནས་ཕྱིར་རང་ཡུལ་དུ་ལོག་སྐབས་ནང་མི་གཉེན་ཉེ་དང་། ཡུལ་མི་ས་གནས་བོད་མི་ཚོས་ཁ་བཏགས་སྒྲོན་པ་སོགས་ཀྱིས་ཕེབས་བསུ་ཟབ་རྒྱས་ཞུས་ཡོད་འདུག
ཁོང་ད་ལྟ་དགུང་ལོ་༢༣་ཡིན་པ་དང་། སྐལ་བཟང་བསྟན་འཛིན་ནམ་མཚན་གཞན་ལ་སྐལ་བོ་ལགས་ནི་དཀར་མཛེས་རྫོང་མཐིང་ཁ་ཤང་རུ་ཁག་གཉིས་པའི་ཕ་བློ་བཟང་རྒྱལ་མཚན་དང་། མ་བཀྲ་ཤིས་མཁའ་འགྲོ་གཉིས་ཀྱི་བུ་ཡིན་པ་རེད་འདུག

གསར་འགོད་པ་ལྕགས་མོ་འཚོ།