དོན་ལྡན་གླིང་གཞིས་སྒར་དུ་སྨན་ཁང་ཞིག་དབུ་འབྱེད།

༄༅༎བཙན་བྱོལ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེངྒེ་མཆོག་གིས་ རྒྱ་གར་ལྷོ་ཕྱོགས་ ཀོ་ལི་གལ་ དོན་ལྡན་གླིང་བོད་མིའི་གཞིས་སྒར་དུ་སྨན་ཁང་གསར་པ་དབུ་འབྱེད་གནང་བར་ཕེབས་པ་དང་དུས་མཚུངས། གཞིས་ཆགས་ཀྱི་མང་ཚོགས་ལ་བཙན་བྱོལ་བོད་མིའི་ཤེས་ཡོན་དང་བོད་ནང་གི་ད་ལྟའི་གནས་ཚུལ་སྐོར་གསུངས་མོལ་གནང་བཞག།
བཀའ་བློན་ཁྲི་པ་མཆོག་གིས་བོད་པའི་ན་གཞོན་ཚོའི་ཤེས་ཡོན་སློབ་གསོ་དེ་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་ཨང་དང་པོར་རྩིས་གནང་གི་ཡོད་པ་དང༌། དབུས་བོད་མིའི་སྒྲིག་འཛུགས་བཀའ་ཤག་ནས་གཞི་ཡུལ་འདྲ་མིན་གྱི་སློབ་ཚན་ནང་བོད་པའི་ཆེད་ལས་མཁས་པ་གང་མང་ཐོན་ཐུབ་པའི་འཆར་གཞི་གསར་བཟོ་གནང་ཡོད་པ་དང༌། རིགས་གཅིག་རྐང་འཛིན་ཐོན་ཐབས་བྱེད་མཁན་གྱི་བོད་པའི་སློབ་ཕྲག་ཚོར་ཤེས་རིག་ནས་སློབ་ཡོན་གྱི་རོགས་རམ་གནང་རྒྱུའི་འབད་བརྩོན་གནང་རྒྱུ་ཡིན་སྐོར་གསུངས་འདུག།
དེ་བཞིན་བཀའ་ཁྲི་བློ་བཟང་སེངྒེ་མཆོག་གིས་གཞིས་ཆགས་ཀྱི་མི་མང་ཚོར་ད་ལྟའི་བོད་ནང་གི་ཛ་དྲག་གནས་སྟངས་ལ་བཀའ་ཤག་གིས་ཐུགས་འཚབ་ཡོད་སྐོར་གསུངས་ཏེ། བཀའ་ཤག་ངོས་ནས་ཨ་རི་དང་ཡུ་རོཔ་གཙོས་པའི་རྒྱལ་སྤྱིའི་སྤྱི་ཚོགས་ཀྱི་དབུ་འཁྲིད་རྣམ་པ་ཚོར་རྒྱ་ནག་ཐོག་གནོན་ཤུགས་སྐྱོན་ནས་བོད་ནང་གི་དཀའ་ངལ་སེལ་ཐབས་གནང་དགོས་པའི་ཞུ་སྐུལ་གནང་བཞིན་ཡོད་སྐོར་འགྲེལ་བརྗོད་གནང་བ་དང་ཆབས་ཅིག། ཕྱི་ཟླ་༢པའི་ཚེས་༨ཉིན་འཛམ་གླིང་ཁྱོན་ཡོངས་སུ་བོད་མི་གནས་འཁོད་ས་གནས་ཚང་མའི་ནང་ བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཀྱི་ཉིན་མོ་སྲུང་བརྩི་ཞུ་རྒྱུ་ཡིན་པའི་ནང་ཀོ་ལི་གལ་ཐེ་པའི་བོད་མི་ཡོངས་རྫོགས་ཀྱིས་མཉམ་ཞུགས་ཡོང་བའི་འབོད་སྐུལ་ཡང་གནང་བཞག།