བཀའ་བློན་བདུན་གྱི་ལས་ཁུངས་གཏན་འབེབས་གནང་བ།

༄༅༎བཙན་བྱོལ་བོད་མིའི་སྒྲིག་འཛུགས་ཀྱི་བཀའ་ཤག་སྐབས་༡༤པའི་བཀའ་བློན་བདུན་གྱི་ལས་ཁུངས་གཏན་འབེབས་གནང་བའི་གསར་འགོད་གསལ་བསྒྲགས་ཤིག་དེ་རིང་སྤེལ་གནང་འདུག།
སྐབས་༡༤པའི་བཀའ་བློན་དུ་བསྐོ་བཞག་བྱུང་བའི་བཀའ་བློན་དྲུག་དང་བཀའ་ཁྲི་བཅས་ཀྱི་ལས་ཁུངས་གཏན་འབེབས་གནང་བའི་གསར་འགོད་གསལ་བསྒྲགས་ནང༌།  ཕྱི་ལོ་༢༠༡༡ཟླ་བ་༩ཚེས་༡༦ཉིན་སྐབས་༡༥པའི་སྤྱི་འཐུས་གྲོས་ཚོགས་ཚོགས་དུས་གཉིས་པའི་ཐོག་སྤྱི་མོས་འདེམས་ཐོན་བྱུང་བའི་བཀའ་བློན་རྣམས་བཅའ་ཁྲིམས་དོན་ཚན་༢༩འི་ནང་གསེས་༢པའི་དགོངས་དོན་བཞིན། བཀའ་བློན་འབྲོང་ཆུང་དངོས་གྲུབ་མཆོག་ བདེ་སྲུང་ལས་ཁུངས་ཀྱི་བཀའ་བློན་དང༌། བཀའ་བློན་ཚེ་རིང་དོན་གྲུབ་མཆོག་ དཔལ་འབྱོར་ལས་ཁུངས་ཀྱི་བཀའ་བློན།
བཀའ་བློན་པདྨ་ཆོས་འབྱོར་མཆོག་ཆོས་རིགས་ལས་ཁུངས་ཀྱི་བཀའ་བློན། བཀའ་བློན་རྒྱ་རི་སྒྲོལ་མ་མཆོག་ནང་སྲིད་ལས་ཁུངས་ཀྱི་བཀའ་བློན། བཀའ་བློན་བདེ་སྐྱིད་ཆོས་དབྱངས་མཆོག་ཕྱི་དྲིལ་ལས་ཁུངས་ཀྱི་བཀའ་བློན། བཀའ་བློན་ཚེ་རིང་དབང་ཕྱུག་མཆོག་འཕྲོད་བསྟེན་ལས་ཁུངས་ཀྱི་བཀའ་བློན་བཅས་ཀྱི་ལས་འཁུར་བཞེས་རྒྱུ་དང༌། ཤེས་རིག་ལས་ཁུངས་ཀྱི་བཀའ་བློན་བཀའ་ཁྲི་བློ་བཟང་སེངྒེ་མཆོག་གིས་གཅིག་ལྕོག་གནང་ཡག་རེད་འདུག།