ས་གནས་རྒྱ་གར་ཡུལ་མི་དང་འབྲེལ་ལམ་དམ་ཟབ་བྱ་གལ།

༄༅༎དབུས་བོད་མིའི་སྒྲིག་འཛུགས་ཀྱི་ཁྱབ་ཁོངས་ས་གནས་འགོ་འཛིན་དང་འབྲེལ་མཐུད་པ་རྣམས་ཀྱི་འཛིན་སྐྱོང་ཚོགས་ཆེན་ཐོག་ ཕྱི་འབྲེལ་བཀའ་བློན་མཆོག་གིས་ གནས་ཡུལ་ས་གནས་རྒྱ་གར་གྱི་ཡུལ་མི་ཚོ་དང་འབྲེལ་ལམ་དམ་ཟབ་བྱ་རྒྱུའི་གལ་གནད་སྐོར་ནན་བརྗོད་གསུངས་བཤད་གནང་འདུག་༎

དབུས་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་དོན་ལྟར་ན་ ཟླ་བ་འདིའི་ཚེས་ ཚེས་ ༡༤ ཉིན་ བོད་མིའི་སྒྲིག་འཛུགས་ཀྱི་ལྟེ་གནས་བཞུགས་སྒར་རྡ་རམ་ས་ལར་ ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་དང་འབྲེལ་མཐུད་པ་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༨ འགོ་འཛུགས་གནང་ཡོད་པ་རེད་ ཚོགས་འདུ་དབུ་འབྱེད་མཛད་སྒོར་ སྐུ་མགྲོན་གཙོ་བོ་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་ལགས་ཀྱིས་ཚོགས་བཅར་བརྣམས་ལ་འཚམས་འདྲི་དང་འབྲེལ་ ཕྱི་འབྲེལ་ལས་ཁུངས་ཀྱི་ལས་དོན་ངོ་སྤྲོད་གནང་འདུག་ ཕྱི་འབྲེལ་བཀའ་བློན་མཆོག་གི་གསུངས་བཤད་ནང་ ཕྱི་འབྲེལ་ལས་ཁུངས་ཀྱི་ཁྱབ་ཁོངས་སྐུ་ཚབ་དོན་གཅོད་ལས་ཁུངས་ཁག་གིས་ལས་དོན་གྱི་འགན་ཁུར་གཙོ་བོ་དེ་བཞིན་ ༸གོང་ས་སྐྱབས་མགོན་ཆེན་པོ་མཆོག་ ཕྱིའི་ཡུལ་གྲུ་ཁག་ཏུ་ཆིབས་སྒྱུར་བསྐྱངས་སྐབས་ ཆིབས་སྒྱུར་གྲ་སྒྲིག་གི་ལས་འགན་གཙོ་བོར་གྱུར་བའི་རྒྱལ་སྤྱིའི་ཐོག་གཞུང་དང་གྲོས་ཚོགས་ བོད་དོན་རྒྱབ་སྐྱོར་ཚོགས་པ་ ས་གནས་རྒྱ་རིགས་ཚོར་འབྲེལ་བ་ཉར་ཚགས་ དེ་བཞིན་སྤྱི་ཚོགས་དང་རིག་གཞུང་དང་འབྲེལ་བའི་འགན་ཁུར་ ས་གནས་ཀྱི་བོད་རིགས་སྤྱི་མཐུན་ཚོགས་པ་སོགས་ལ་འབྲེལ་བ་གནང་རྒྱུ་སོགས་ངོ་སྤྲོད་གནང་འདུག་ ཡང་སྐུ་ངོ་བཀའ་བློན་མཆོག་སྐུ་ཉིད་ཕྱིའི་ཡུལ་གྲུ་ཁག་ཏུ་སྐོར་བསྐྱོད་གནང་སྐབས་ ས་གནས་སུ་ཡོད་པའི་བོད་མི་ཚོ་དང་གང་ཐུབ་ཀྱི་མཇལ་འཕྲད་གནང་སྟེ་ ས་གནས་བོད་རིགས་ཚོགས་པ་ཚོ་དང་བོད་དོན་རྒྱབ་སྐྱོར་ཚོགས་པ་ཚོའི་དབར་ལས་དོན་མཉམ་རུབ་ཡོང་ཐབས་ཀྱི་སྐུལ་འདེགས་ཞུས་བཞིན་ཡོད་སྐོར་གསལ་འདོན་གནད་འདུག་ བཀའ་བློན་བདེ་སྐྱིད་ཆོས་དབྱངས་ལགས་ཀྱིས་ ང་ཚོས་ཆབ་སྲིད་ཀྱི་ལས་འགུལ་སྤེལ་སྐབས་བོད་པ་གཅིག་པུ་མ་ཡིན་པར་ ས་གནས་ཀྱི་ཡུལ་མི་ཚོས་མཉམ་ཞུགས་བྱ་རྒྱུ་དེ་ཆབ་སྲིད་ཀྱི་ངོ་བོའི་ཐོག་ནས་ཧ་ཅང་གལ་ཆེན་པོ་ཆགས་ཀྱི་ཡོད།  ང་ཚོ་བོད་མི་བཙན་བྱོལ་དུ་ཡོད་ཁོངས་ནས་བོད་མི་མང་ཤོས་རྒྱ་གར་དུ་གནས་ཡོད། དེར་བརྟེན་ང་ཚོས་བོད་པའི་གཞིས་ཆགས་གནས་ཡུལ་རྒྱ་གར་གྱི་ཡུལ་མི་དང་འབྲེལ་བ་དམ་ཟབ་བྱ་རྒྱུ་གལ་ཆེན་པོ་ཆགས་ཡོད་ཅེས་ནན་བརྗོད་གནང་བཞག་  བཀའ་བློན་བདེ་སྐྱིད་ཆོས་དབྱངས་ལགས་ཀྱིས་མུ་མཐུད་གསུངས་ན་ རྒྱ་ནག་གི་གནོན་ཤུགས་རྐྱེན་པས་  བལ་ཡུལ་ནང་གནས་སྡོད་བོད་མི་ཚོར་ཧ་ཅང་དཀའ་ངལ་འཕྲད་བཞིན་པ་མ་ཟད་ རྒྱ་ནག་གཞུང་ནས་བོད་མི་་གནས་སའི་ས་གནས་སྤྱི་དང་ཡང་སྒོས་རྒྱ་གར་དུ་ཡོད་པའི་བོད་མི་དང་རྒྱ་གར་གྱི་ཡུལ་མི་བར་དཀྲུག་ཤིང་རྒྱག་ཉེན་ཆེ་བར་སོང་ ཚང་མས་གཟབ་ནན་བྱེད་རྒྱུ་ཧ་ཅང་གལ་ཆེན་ཆགས་ཡོད་སྐོར་གསལ་འདོན་གནང་བཞག་༎