རྒྱ་གར་བས་བོད་ཀྱི་སྟོད་གངས་རིན་པོ་ཆེར་གནས་མཇལ།

༄༅༎སྔར་གྱི་སྲོལ་རྒྱུན་གཞིར་བཟུང་བོད་ནང་གི་སྟོད་གངས་རིན་པོ་ཆེ་དང་མཚོ་མ་ཕམ་བཅས་སུ་རྒྱ་གར་གྱི་ཧིན་རྡུ་ཚོའི་གནས་མཇལ་རུ་ཁག་དང་པོ་དེ་དེ་རིང་རྒྱ་གར་གྱི་རྒྱལ་ས་ལྡི་ལི་ནས་རྒྱ་གར་གྱི་བྱང་ཕྱོགས་མངའ་སྡེ་ཨུ་ཏར་ཀནཏ་བརྒྱུད་བོད་དུ་ཐོན་ཚར་ཡོད་པ་རེད་ རུ་ཁག་དང་པོ་དེའི་ནང་གནས་མཇལ་བ་མི་གྲངས་༥༠ཡོད་པ་རེད་

གནས་མཇལ་གོ་སྒྲིག་གནང་མཁན་ཚོས་ན་ནིང་ལོ་དང་མི་འདྲ་བར་ད་ལོ་གནས་མཇལ་བ་ཚོའི་ཆེད་དུ་འཐུང་ཆུ་དང་རྒྱ་གར་གྱི་མངའ་སྡེ་འདྲ་མིན་གྱི་མི་མང་ཚོའི་རྣམ་ཀུན་ལོངས་སུ་སྤྱོད་པའི་ཐུན་མོང་དང་ཐུན་མོང་མ་ཡིན་པའི་ཟས་སྣའི་རིགས་དང་ སྡོད་གུར་དང་ཉལ་ཁྲི་སོགས་ཀྱི་མཐུན་རྐྱེན་རྒྱ་ནོམ་པ་གོ་སྒྲིག་སྦྱར་་ཡོད་པ་རེད་

དེ་ཡང་རྒྱ་གར་བྱང་ཕྱོགས་མངའ་སྡེ་ཨུ་ཏར་ཀནཏ་གྱི་ཁྱབ་ཁོངས་ཀུ་མའོན་ཟེར་བའི་འཛུགས་བསྐྲུན་ལས་ཁུངས་ཀྱི་འགན་འཛིན་སུའུ་རིན་རྡར་སིང་ཇི་ན་ཞུ་བས་ཨེ་ཨེན་ཨའེ་ཞེས་པའི་རྒྱ་གར་གྱི་གསར་ལས་ཁང་གི་གསར་འགོད་པར་བརྗོད་དོན་ལྟར་ན་ གནས་བསྐོར་བ་ཚོར་ དཀའ་ངལ་མི་མྱོང་རྒྱུའི་ཆེད་དུ་སྟ་གོན་གང་ལེགས་བྱས་ཡོད་པ་རེད་

འོན་ཀྱང་གནས་བསྐོར་ལ་འགྲོ་སའི་ལམ་ཁ་དེ་དག་ས་ཡོམ་དང་དབྱར་ཀའི་དུས་སུ་ས་རུད་རྒྱབ་པའི་ཉེན་ཁའི་རང་བཞིན་ཅན་ཞིག་ཡིན་པ་རེད་ དཔེར་ན་༡༩༩༨ལོར་གར་ལྦལ་ཞེས་པའི་རྒྱ་གར་གྱི་ས་ཁུལ་ནང་ས་རུད་རྒྱབ་སྟེ་རྒྱ་གར་གྱི་ཧིན་རྡུའི་གནས་བསྐོར་བ་༣༠༠ཙམ་རྐྱེན་ལམ་དུ་སོང་ཡོད་པ་རེད་ རྦ་རཏ་པ་ཐཀ་ཞུ་བའི་གནས་བསྐོར་བ་དེ་ཡིས་བརྗོད་དོན་ལྟར་ན་ གངས་རིན་པོ་ཆེ་དང་མཚོ་མ་ཕམ་སོགས་སུ་གནས་བསྐོར་ལ་འགྲོ་བའི་དམིགས་ཡུལ་ནི་འཁོར་བའི་སྡུག་བསྔལ་ལས་ཐར་བའི་དོན་དུ་ཡིན་པ་རེད།