ཨ་རིའི་ཕྱི་སྲིད་དྲུང་ཆེ་ཇོན་ཁཱེ་རེ་རྒྱ་ནག་ལ་འབྱོར་འདུག

ཨ་རྒྱ་གཉིས་བར་འཁོན་འཛིན་ཆུང་ཚགས་རིགས་ཡོད་ཀྱང་བདེ་འཇགས་དང་དཔལ་འབྱོར་མཉམ་ལས་བྱེད་རྒྱུའི་ནན་བརྗོད་བྱས་འདུག
དེ་ཡང་ཨ་རིའི་ཕྱི་སྲིད་དྲུང་ཆེ་སྐུ་ཞབས་John Kerry ཡིས་སྣེ་ཁྲིད་གནང་ཐོག་ནོར་སྲིད་དྲུང་ཆེ་སྐུ་ཞབས་Jack Lew དང་། ཨ་རིའི་དབུས་དངུལ་ཁང་ཆེན་མོའི་སྤྱི་ཁྱབ་འགན་འཛིན་ལྕམ་Yellenབཅས་ཀྱིས་གཙོས་པའི་གཟིགས་སྐོར་སྐུ་ཚབ་ཚོགས་པ་རྒྱ་ནག་གི་རྒྱལ་ས་པེ་ཅིང་དུ་ཕེབས་ཡོད་པ་དང་། རེས་གཟའ་ལྷག་པའི་ཉིན་ཨ་རིའི་སྐུ་ཚབ་ཚོགས་པ་རྣམས་དང་རྒྱ་ནག་གི་སྲིད་འཛིན་Xi Jinping དབར་ཐབས་བྱུས་དང་། དཔལ་འབྱོར་སྐོར་གྱི་གྲོས་མོལ་མཇལ་འཛོམས་གནང་གནང་འདུག གྲོས་མོལ་དབུ་འབྱེད་སྐབས་རྒྱ་ནག་གི་སྲིད་འཛིན་མཆོག་ནས་ཡུལ་གྲུ་གཉིས་དབར་འཁོན་འཛིན་གྱི་རང་བཞིན་ལྡན་པའི་གདོང་གཏུག་རིགས་གཡོལ་ཐབས་གང་ཐུབ་བྱེད་གལ་ཆེ་བའི་སྐོར་ནན་སྐུལ་གནང་པ་དང་། ཨ་རིའི་ཕྱི་སྲིད་དྲུང་ཆེ་མཆོག་ནས་ཀྱང་དེ་ལྟར་མོས་མཐུན་གནང་འདུག གནས་ཚུལ་ནང་གསལ་ལྟར་ན། ད་རེས་ཀྱི་གྲོས་མོལ་མཇལ་འཛོམས་འདི་བརྒྱུད་ཨ་རིའི་སྐུ་ཚབ་ཚོགས་པའི་ངོས་ནས་འཛམ་གླིང་གནམ་གཤིས་འགྱུར་ལྡོག་ལ་སོགས་པའི་ཁོར་ཡུག་སྲུང་སྐྱོབ་ཀྱི་ལས་དོན་ནང་རྒྱ་ནག་གི་ལས་དོན་མཉམ་ལས་འབྱུང་ཐབས་དང་། ཨ་རིའི་བཟོ་ཚོང་ལས་ཁང་ཁག་ལ་རྒྱ་ནག་ནས་དྲ་ལམ་བརྒྱུད་གསང་འཛུལ་མཚམས་འཇོག་འབྱུང་ཐབས། དེ་བཞིན་ལྷོ་རྒྱ་ནག་རྒྱ་མཚོའི་ཁུལ་དུ་རྒྱ་ནག་དང་ཁྱིམ་མཚེས་རྒྱལ་ཁབ་དབར་མཚོ་གླིང་གི་བདག་དབང་དང་འབྲེལ་བའི་རྙོག་གླེང་སེལ་ཐབས་སུ་སྒྲོམ་གཞི་གཏན་འབེབས་འབྱུང་ཐབས་བཅས་ཀྱི་དམིགས་ཡུལ་བཞེས་ཀྱི་ཡོད་འདུག ཡིན་ནའང་གྲོས་མོལ་དངོས་གཞི་རེས་གཟའ་ཕུར་བུ་ནས་འགོ་འཛུགས་གནང་གི་ཡོད་པར་སོང་། ད་ལྟ་གྲོས་མོལ་གྱི་གྲུབ་འབྲས་ལ་སྔོན་དཔག་བྱེད་དཀའ་བའི་སྐོར་གནས་ཚུལ་དབྱེ་ཞིབ་པ་ཚོས་གཟིགས་ཀྱི་ཡོད་འདུག

གསར་འགོད་པ་དོན་གྲུབ་རྣམ་རྒྱལ།