ཉི་ཧོང་གི་སྲིད་བློན་ཨོ་ལིམ་ཕིག་མཛད་སྒོར་མི་ཕེབས་པའི་རེ་སྐུལ།

༄༅༎ཉི་ཧོང་གི་ཚོང་འབྲེལ་བློན་ཆེན་ཟུར་པ་ ཀྲ་ཀི་ཡོ་ཧི་ར་ནུ་མཱ་ ཞུ་བས་ སྲིད་བློན་ཡཱ་སུ་ཨོ་ཕཱུ་ཀུ་ཌ་མཆོག་ལ་རྒྱ་ནག་གཞུང་གིས་བོད་ནང་བོད་མིར་དྲག་གནོན་གཏོང་བཞིན་པའི་གནད་དོན་དང་ རྒྱ་ནག་གིས་དམག་དོན་རྒྱ་བསྐྱེད་ཀྱི་ཆེད་ལོ་ལྟར་རྒྱུན་གྲོན་ཕོན་ཆེ་སྤར་ཆ་བྱེད་བཞིན་པའི་གནད་དོན་ཁག་ལ་ངོ་རྒོལ་ཞུ་ཆེད་ སྲིད་བློན་མཆོག་ནས་རྒྱ་ནག་ལ་ཚུགས་རྒྱུའི་ཨོ་ལིམ་ཕིག་རྩེད་འགྲན་གྱི་སྒོ་འབྱེད་མཛད་སྒོར་ཚོགས་ཞུགས་མ་གནང་བར་ངོ་རྒོལ་གནང་དགོས་ཀྱི་རེད་ཅེས་གསུངས་ཡོད་པ་རེད་

ཚོང་འབྲེལ་བློན་ཆེན་ཟུར་པ་ ཧི་ར་ནུ་མཱ་ ཁོང་ནི་ཕྱི་ཟླ་བཞི་པའི་ནང་ཉི་ཧོང་གྲོས་ཚོགས་ནང་གཞུང་འཛིན་དང་ཕྱོགས་འགལ་ཚོགས་པ་ཐོུང་གི་གྲོས་ཚོགས་འཐུས་མི་༢༤༠མཉམ་རུབ་ཀྱིས་ རྒྱ་ནག་གཞུང་ལ་བོད་ནང་གི་ཆབ་སྲིད་ཀྱི་དཀའ་ངལ་སེལ་ཆེད་ བོད་མིའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ལྷན་གྲོས་མོལ་ཞུ་དགོས་པ་དང་ བོད་ནང་བོད་མིའི་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་དགོས་པའི་གྲོས་ཆོད་འཇོག་མཁན་གྱི་གྲོས་འགོ་བཏོན་མཁན་གཙོ་བོ་དེ་ཡང་ཡིན་འདུག དེ་ཡང་ཉི་ཧོང་གི་ཀྱི་ཡོ་ཌོ་གསར་འགྱུར་ལས་ཁང་གིས་སྤེལ་བའི་གནས་ཚུལ་ལ་གཞིགས་ན་ ཚོང་འབྲེལ་བློན་ཆེན་ཟུར་པ་ཧི་ར་ནུ་མཱ་ཁོང་ནས་ རྒྱ་ནག་གཞུང་གིས་བོད་ནང་བོད་མིར་དྲག་གནོན་གཏོང་རྒྱུ་མཚམས་འཇོག་དང་ རྒྱ་ནག་གི་དམག་དོན་ལས་གཞི་རྒྱ་བསྐྱེད་གཏོང་རྒྱུ་མཚམས་འཇོག་གནང་དགོས་པའི་ཐད་ དོན་འབྲས་ཤིག་མ་བྱུང་བ་ཡིན་ན་ སྲིད་བློན་མཆོག་ནས་རྒྱ་ནག་ལ་ཚུགས་རྒྱུའི་ཨོ་ལིམ་ཕིག་ཙེད་འགྲན་གྱི་སྒོ་འབྱེད་མཛད་སྒོར་ཚོགས་ཞུགས་གནང་རྒྱུ་ཡོག་མ་རེད་ཅེས་གསུངས་ཀྱི་ཡོད་སྐོར་བཀོད་ཡོད་པ་རེད་