ཨ་རི་དང་ཉི་ཧོང་གི་འབྲེལ་ལམ་སྔར་བས་གནད་འགག་ཆེ་བ་ཡིན།

༄༅༎རྒྱ་ནག་གི་སྟོབས་ཤུགས་ཆེ་རུ་འགྲོ་བཞིན་པའི་སྐབས་ཨ་རི་དང་ཉི་ཧོང་གཉིས་ཀྱི་འབྲེལ་ལམ་དེ་བས་གནད་འགག་ཆེ་བ་ཡིན་པའི་སྐོར་ཉི་ཧོང་གི་བློན་ཆེན་ཞིག་ནས་གསུངས་པའི་གནས་ཚུལ་ཐོན་འདུག

ཉི་ཧོང་ནང་དམངས་གཙོ་ཚོགས་པའི་གཞུང་གསར་པའི་ཐོག་ནས་ཉི་ཧོང་དང་ཨ་རི་གཉིས་དབར་ཆ་སྙོམ་ལྡན་པའི་འབྲེལ་ལམ་གྱི་ངོ་བོ་བཟུང་དགོས་དོན་གྱི་ལངས་ཕྱོགས་གསལ་སྟོན་བྱས་པ་དང་ཆབས་ཅིག་ཨ་རི་གཞུང་གིས་རྒྱ་ནག་དང་མཐུན་འབྲེལ་དམ་ཟབ་གཏོང་བའི་སྲིད་ཇུས་སོགས་ལ་བརྟེན་ཉི་ཧོང་དང་ཨ་རི་གཉིས་དབར་ལོ་རྒྱུས་ཀྱི་རང་བཞིན་ལྡན་པའི་མཐུན་འབྲེལ་གྱི་སྲིད་ཇུས་ལ་དོ་ཕོག་ཡོང་སྲིད་པར་མང་པོས་བློ་དོགས་ཡོད་པ་རེད། བདུན་ཕྲག་རྗེས་མ་ཨ་མི་རི་ཀའི་བདེ་སྲུང་དྲུང་ཆེ་རཱོ་སྦ་ཊེ་གེཊ་སི་ཉི་ཧོང་ནང་གཞུང་དོན་ཕྱོགས་སྐྱོད་གནང་རྒྱུའི་སྔོན་ཚུད་དུ་དེ་རིང་ཉི་ཧོང་གི་བདེ་སྲུང་བློན་ཆེན་ཀ་ཊ་ཛ་ལྦ་ཡིས་རྒྱལ་སྤྱིའི་ཐོག་རྒྱ་ནག་གི་སྟོབས་ཤུགས་ཆེ་རུ་འགྲོ་བའི་དུས་ཚོད་དེར་ཨ་རི་དང་ཉི་ཧོང་དབར་གྱི་འབྲེལ་ལམ་གྱི་གནད་འགག་ད་དུང་ཆེ་རུ་འགྲོ་རྒྱུ་ལས་འབྲེལ་ལམ་ཉམ་ཆགས་འགྲོ་རྒྱུའི་བློ་དོགས་གང་ཡང་མེད་པའི་སྐོར་གསལ་སྟོན་གནང་བཞག སྐུ་ཞབས་ཀ་ཊ་ཛ་ལྦས་གསུངས་ན་རྒྱ་ནག་གི་མཚོ་དམག་དང་གནམ་དམག་སྒྲིག་འཛུགས་རྒྱ་སྐྱེད་གཏོང་བཞིན་པའི་གནས་ཚུལ་དངོས་ལྡན་ཡིན་ཡང་རྒྱ་ནག་གི་དམིགས་ཡུལ་ཇི་ཡིན་ང་ཚོས་ཁ་གསལ་ཤེས་རྟོགས་མེད་ དེར་བརྟེན་ཨེ་ཤེ་ཡ་དང་ཞི་བདེ་རྒྱ་མཚོའི་ཁུལ་དུ་རྒྱ་ནག་གི་དྲག་པོའི་དམག་ཤུགས་ཀྱི་ནུས་པ་མངོན་གསལ་དོད་རུ་འགྲོ་དུས་དེ་ཁུལ་གྱི་རྒྱལ་ཁབ་མང་པོ་ཞིག་ལ་ཉེན་ཚབས་སློང་སྲིད་པ་རེད། གནས་སྟངས་འདིའི་འོག་ཉི་ཧོང་དང་ཨ་རི་གཉིས་ཀྱི་འབྲེལ་ལམ་དེ་ད་དུས་གཏིང་ཟབ་དང་གནད་འགག་ཆེ་རུ་འགྲོ་རྒྱུ་ཡིན་སྐོར་འགྲེལ་བརྗོད་བྱས་འདུག།