༧གོང་ས་མཆོག་གིས་བོད་མི་ཚོར་མཇལ་ཁ་དང་བཀའ་སློབ་གནང་བ།

༧གོང་ས་མཆོག་གིས་བོད་མི་རིགས་ལ་ཤེས་ཡོན་གལ་ཆེན་ཡིན་པས་ཤེས་ཡོན་མེད་ན་ང་ཚོ་མུ་མཐུད་ནས་རྗེས་ལུས་སུ་གནས་རྒྱུ་ཡིན་པ་གསུངས།
དེ་ཡང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་བྷེ་ཀོབ་བོད་མིའི་གཞིས་ཆགས་སུ་ཆགས་པའི་གདན་ས་བཀྲིས་ལྷུན་པོའི་ནང་བྱང་ཆུབ་ལམ་རིམ་གྱི་བཀའ་ཆོས་དབུ་བཙུགས་མ་མཛད་གོང་དེར་ཆོས་ཞུ་བ་བོད་མི་༢༧༠ལྷག་ལ་མཇལ་ཁ་དང་བཀའ་སློབ་སྩལ་གནང་ཡོད་པ་རེད།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གདན་ས་བཀྲིས་ལྷུན་པོར་ཕྱི་ཟླ་བཅུ་གཉིས་པའི་ཚེས་༢༠ནས་བྱང་ཆུབ་ལམ་རིམ་ཆེན་མོའི་བཀའ་ཆོས་དབུ་བཙུགས་མཛད་པ་དང་། ཕྱི་ཚེས་༢༣ཉིན་བཀའ་ཆོས་ཉིན་བཞི་པ་དབུ་བཙུགས་མ་མཛད་གོང་དེར་ཆོས་ཞུ་བ་བོད་མི་མི་གྲངས་༢༧༠ལྷག་ལ་བཀའ་སློབ་སྩལ་བའི་ནང་། འདས་ཟིན་པའི་ལོ་ངོ་༦༠དང་དམིགས་བསལ་རིག་གནས་གསར་བརྗེ་ཟེར་བའི་དུས་སྐབས་སུ། རྒྱ་ནག་གི་ཕྱོགས་ནས་བོད་ནི་ཆེས་རྗེས་ལུས་ཤིག་ཏུ་ངོས་འཛིན་བྱས་ཡོད་ཀྱང་ད་ཆ་རྒྱ་ནག་ནང་དུ་ནང་པ་ས་ཡ་༤༠༠ཙམ་ཡོད་པའི་གནས་ཚུལ་ཡོད་པ་མ་ཟད་། ཁོང་ཚོ་མང་ཆེ་བ་བོད་ཀྱི་ནང་ཆོས་ལ་དོ་སྣང་ཡོད་པའི་གནས་ཚུལ་ཡོད་པ་རེད། ང་ཚོ་བོད་པ་ཚོར་མཚོན་ན་ནང་ཆོས་སློབ་གཉེར་བྱེད་པར་བོད་ཀྱི་སྐད་ཡིག་སྦྱང་མི་དགོས་པའི་ཆ་རྐྱེན་ལྡན་ཡོད་པར་བརྟེན་ནས་ནང་ཆོས་ཀྱི་བཀའ་འགྱུར་བསྟན་འགྱུར་གྱི་ཕྱག་དཔེ་རྣམས་ཁྱིམ་དུ་ཉར་ཚགས་བྱེད་པ་ཙམ་མིན་པར་ཀློག་པ་དང་། སློབ་གཉེར་བྱ་དགོས་པ་ཡིན། ངོས་ནས་ལོ་ངོ་དྲུག་ནས་ནང་ཆོས་སློབ་གཉེར་བྱས་པ་དེ་ཡིས་ཕན་ཐོགས་ཆེན་པོ་བྱུང་ཡོད་པ་མ་ཟད་། ད་ཆ་འཛམ་གླིང་གི་ཚན་རིག་པས་ནང་ཆོས་ལ་དོ་སྣང་ཇེ་ཆེར་འགྲོ་བ་དང་ཆབས་ཅིག་ནང་པའི་ཆོས་ཀྱི་ནང་དོན་དང་དེའི་ཡོན་ཏན་རྣམས་ཀྱིས་སེམས་དང་སེམས་ཀྱི་འདུ་ཤེས་ལ་ཕན་ཐོགས་སྐྲུན་ཐུབ་ཀྱི་ཡོད་པ་ངོས་འཛིན་བྱེད་ཀྱི་ཡོད་པར་བརྟེན་ནས། ནང་ཆོས་སློབ་གཉེར་བྱས་ནས་སློབ་གཉེར་བྱས་པ་དེ་མི་ཚེའི་ནང་བེད་སྤྱོད་གཏོང་ཐུབ་པ་ཞིག་བྱ་དགོས་པ་ཡིན། བཀའ་འགྱུར་བསྟན་འགྱུར་དེ་དག་ལ་བོད་ཀྱི་མཁས་པ་ཁྲི་གཅིག་གིས་ཕྱག་ལས་གནང་ཡོད་པ་སོགས་བོད་ཀྱི་ནང་ཆོས་ནི་དངོས་ཡོད་ཀྱི་རིན་ཐང་དང་ཕྱུག་པོ་ཡིན་པ་རེད་ཅེས་དང་།
ཡང་བོད་མི་རིགས་ལ་ཤེས་ཡོན་ནི་ཧ་ཅང་གི་གལ་ཆེན་པོ་ཡིན་པ་དང་། ཤེས་ཡོན་མེད་ན་ང་ཚོ་མུ་མཐུད་ནས་རྗེས་ལུས་སུ་གནས་རྒྱུ་ཡིན་ཞིང་། ང་ཚོ་བོད་མི་རིགས་ཚོར་སོ་སོའི་ཐོུང་མ་ཡིན་པའི་རིག་གཞུང་ཡོད་པ་དེ་དག་གི་ནང་དོན་རྣམས་ངེས་པར་དུ་ངེས་པ་རྙེད་པ་ཞིག་ཤེས་པ་བྱ་དགོས་གལ་ཆེན་པོ་ཡིན་པའི་སྐོར་སོགས་བཀའ་སློབ་སྩལ་གནང་ཡོད་པ་རེད་།

གསར་འགོད་པ་གཡུ་སྒྲོན།