རྒྱ་གཞུང་གིས་བོད་ནང་སྔ་ལོ་བཞིན་མི་ཡོང་བའི་འབད་བརྩོན།

༄༅༎སྔ་ལོ་ཕྱི་ཟླ་གསུམ་པའི་ནང་བོད་ས་ཡོངས་སུ་ངོ་རྒོལ་སྒེར་ལངས་བྱུང་བ་ལྟར་འདི་ལོ་མི་ཡོང་བའི་ཆེད་དུ་རྒྱ་ནག་གཞུང་གིས་བོད་ནང་དམ་བསྒྲགས་ཤུགས་ཆེ་བྱེད་བཞིན་ཡོད་པ་དང་པེ་ཅིང་ནས་ལྷ་སར་གནམ་ཐོག་བསྐྱོད་མཁན་འགྲུལ་བ་ཚོར་ཡང་དམིགས་བསལ་ཞིབ་བཤེར་བྱེད་བཞིན་ཡིན་པ་ཡིན་པ་རེད།

བོད་ཀྱི་ལོ་གསར་དང་རྒྱ་ནག་གིས་བོད་བཅིངས་འགྲོལ་བཏང་ནས་མི་ལོ་ལྔ་བཅུ་འཁོར་བའི་དུས་དྲན་སླེབས་ལ་ཉེ་བའི་སྐབས་དེར་བོད་མི་ཚོས་བསྐྱར་དུ་ཞི་བའི་ངོ་རྒོལ་བྱེད་སྲིད་པའི་དོགས་ཟོན་ཆེན་པོ་རྒྱ་ནག་དཔོན་རིགས་ཚོས་གནང་བཞིན་ཡོད་པ་རེད།

སྔ་ལོ་བོད་ས་ཡོངས་སུ་མ་གྲོས་བསམ་པ་གཅིག་མཐུན་གྱི་ངང་ནས་རྒྱ་ནག་གི་དྲག་གནོན་ལ་བོད་མི་ཚོས་ངོ་རྒོལ་བྱས་པར་རྒྱ་ནག་གཞུང་ཧ་ལས་ཧོན་ཐོར་དགོས་བྱུང་ཡོད་པར་བརྟེན་བོད་རང་སྐྱོང་ལྗོངས་ཀྱི་ཚོགས་གཞོན་ཚེ་རིང་ཞུ་བས་སྔ་ལོའི་ཉམས་མྱོང་ལ་གཞིགས་པའི་བོད་ནང་གི་བདེ་སྲུང་ལ་བལྟ་རྟོགས་བྱ་རྒྱུ་དེ་ནི་ང་ཚོའི་ལས་འགན་ཨང་དང་པོ་དེ་ཡིན་ཞེས་བཤད་ཡོད་པ་དང་དེ་བཞིན་ལྷ་ས་གྲོང་ཁྱེར་གྱི་སྤྱི་ཁྱབ་གཞོན་པ་ཀའོ་བེན་ཅང་གིས་ཀྱང་འདི་ལོ་ཡང་བོད་མི་ཚོས་ངོ་རྒོལ་གྱི་ལས་འགུལ་དེ་འདྲ་སྤེལ་མི་སྲིད་པ་མ་རེད་ཅེས་གསུངས་ཡོད་པ་རེད།

འོན་ཀྱང་མཁས་དབང་ཚོས་རྒྱ་ནག་གཞུང་གིས་དྲག་གནོན་གནང་སྟངས་དང་ད་ལྟའི་བདེ་སྲུང་གི་གནས་སྟངས་དང་དོགས་གཞི་ཡོད་པའི་བོད་མི་ཚང་མ་འཛིན་བཟུང་བྱས་སྟངས་དེ་བཞིན་དམག་མི་དང་ཉེན་རྟོགས་མི་སྣའི་མང་ཉུང་ལ་བལྟ་ན་བོད་མི་ཚོས་ཞི་བའི་ངོ་རྒོལ་གྱི་ལས་འགུལ་སྤེལ་ཐུབ་རྒྱུ་ཧ་ཅང་ཁག་པོ་ཡིན་ལུགས་འགྲེལ་བརྗོད་གནང་འདུག།